Read Papantla Totonac Ezekiel 43 Bible Online

Ezekiel 43 - Papantla Totonac bible

Ezekiel 43

¹Despues el a hibami na e porta, e porta kara pariba;

²i mira, e gloria di e Dios di Israel tabata bin for di direkshon pariba. I Su bos tabata manera e zonidu di hopi awanan; i tera tabata resplandese di Su gloria.

³I esaki tabata manera e aparensia di e vishon ku mi a mira, manera e vishon ku mi a mira tempu ku El a bin pa destrui e stat. I e vishonnan tabata manera e vishon ku mi a mira banda di Riu Kebar; i mi a tira mi kurpa abou ku mi kara te na suela.

⁴I e gloria di SENOR a drenta e kas dor di e porta kara pariba.

⁵I e Spiritu a hisami i a hibami na e plenchi paden; i mira, e gloria di SENOR a yena e kas.

⁶Despues mi a tend'E ta papia ku mi for di den e kas, mientras ku e homber tabata para banda di mi.

⁷I El a bisami: "Yu di hende, esaki ta e luga di Mi trono i e luga di Mi plant'i pia, kaminda Ami lo biba meimei di e yunan di Israel pa semper. I e kas di Israel lo no profana Mi nomber santu mas, ni nan ni nan reinan, ku nan prostitushon i ku e kadavernan di nan reinan ora nan muri,

⁸dor di pone nan drempel banda di Mi drempel i nan kosein-di-porta banda di Mi kosein-di-porta, ku solamente e muraya entre Ami i nan. I nan a profana Mi nomber santu ku nan abominashonnan ku nan a komete. Pesei Mi a kaba ku nan den Mi rabia.

⁹Awor laga nan pone nan prostitushon i e kadavernan di nan reinan leu for di Mi. I lo Mi biba meimei di nan pa semper.

¹⁰"Pa loke t'abo, yu di hende, konta e kas di Israel di e tempel, pa nan sinti berguensa di nan inikidatnan; i laga nan midi su tamano.

¹¹I si nan tin berguensa di tur loke nan a hasi, laga nan komprende e diseno di e kas, su struktura, su salidanan, su entradanan, tur su disenonan, tur su statutonan i tur su leinan. I skirbi esakinan dilanti di nan bista, pa nan keda fiel na henter su diseno i tur su statutonan, i kumpli ku nan.

¹²"Esaki ta e lei di e kas: henter su tereno riba kabes di e seru, tur ront, lo ta masha santu mes. Mira, esaki ta e lei di e kas.

¹³"I esakinan ta e midinan di e altar, na kodo. E kodo ta un kodo i un span di man. E het ta un kodo hundu i un kodo hanchu; e leishi na su rant tur ront ta un span di man. Esaki ta e haltura di e altar.

¹⁴I for di e het den tera te na e leishi mas abou mester ta dos kodo, i e hanchura un kodo; i for di e leishi mas chikitu te na e leishi mas grandi mester ta kuater kodo, i e hanchura un kodo.

¹⁵I e fogon di e altar mester ta kuater kodo; i for di e fogon di e altar bai ariba ta sali kuater kachu.

¹⁶Awor e fogon di e altar mester ta diesdos kodo largu pa diesdos kodo hanchu, di forma kuadrangular na su kuater bandanan.

¹⁷I e leishi mester ta dieskuater kodo largu pa dieskuater kodo hanchu na su kuater bandanan; e rant ront di dje mester ta mitar kodo, i su het mester ta un kodo tur ront; i su trapi mester keda kara pariba."

¹⁸Anto El a bisami: "Yu di hende, asina Senor DIOS ta bisa: 'Esakinan ta e statutonan pa e altar riba dia ku e wordu traha, pa ofrese ofrenda kima riba dje i pa sprengu sanger riba dje.

¹⁹I na e saserdotenan levita ku ta desendientenan di Sadok, kendenan ta aserkaMi pa sirbiMi,' Senor DIOS ta deklara, 'bo mester duna un bishe machu pa ofrenda pa pika.

²⁰I bo mester kohe un poko di su sanger i pone esaki na e kuater kachunan i na e kuater skinanan di e leishi, i na e rant tur ront; asina lo bo purifik'e i hasi ekspiashon p'e.

²¹Tambe bo mester kohe e bishe machu pa e ofrenda pa pika, i esei lo wordu kima na e luga apunta di e kas, pafo di e santuario.

²²'I riba e di dos dia bo mester ofrese un kabritu chubatu sin defekto pa un ofrenda pa pika; i nan lo purifika e altar, manera nan a purifik'e ku e bishe machu.

²³Ora bo a kaba di purifik'e, bo mester presenta un bishe machu sin defekto i un karne chubatu sin defekto for di e kria di bestia chikitu.

²⁴I bo mester presenta nan dilanti di SENOR, i e saserdotenan mester tira salu riba nan, i ofrese nan komo un ofrenda kima na SENOR.

²⁵'Pa shete dia bo mester prepara un kabritu tur dia komo un ofrenda pa pika; tambe mester wordu prepara un bishe machu i for di e kria di bestia chikitu un karne chubatu sin defekto.

²⁶Pa shete dia nan mester hasi ekspiashon pa e altar i purifik'e; asina nan lo konsagr'e.

²⁷I ora nan a kaba di kompleta e dianan lo sosode ku riba e di ocho dia i djei padilanti e saserdotenan mester ofrese boso ofrendanan kima riba e altar, i boso ofrendanan di pas; i lo Mi asepta boso,' Senor DIOS ta deklara."