Read Papantla Totonac Ezekiel 44 Bible Online

Ezekiel 44 - Papantla Totonac bible

Ezekiel 44

¹E ora ei el a hibami bek na e porta di mas pafo di e santuario ku ta keda kara pariba; i esaki tabata sera.

²I SENOR a bisami: "E porta aki mester keda sera; e no mag wordu habri, i ningun hende no mag drenta dor di dje, pasobra Senor DIOS di Israel a drenta dor di dje; ta pesei e mester keda sera.

³I tokante di e prens, pasobra e ta prens e mag sinta ayanan pa kome pan dilanti di SENOR; e mester drenta via e veranda di e porta i sali pa e mesun kaminda."

⁴Despues El a hibami via e porta panort na e parti dilanti di e kas; i mi a wak, i mira, e gloria di SENOR a yena e kas di SENOR, i mi a tira mi kurpa abou ku mi kara te na suela.

⁵I SENOR a bisami: "Yu di hende, paga bon tino, mira ku bo wowo i tende ku bo orea tur loke Mi ta bisabo tokante di tur e statutonan di e kas di SENOR i tokante di tur su leinan; i paga bon tino na entrada di e kas i na tur salida di e santuario.

⁶I bisa e rebeldenan, e kas di Israel: 'Asina Senor DIOS ta bisa: "Ta basta awor ku tur boso abominashonnan, O kas di Israel,

⁷di trese stranheronan, insirkumsida di kurason i insirkumsida di karni, pa ta den Mi santuario pa profan'e, esta, Mi kas, ora boso a ofrese Mi kuminda, e vet i e sanger; pasobra nan a hasi Mi aliansa invalido, ademas di tur boso abominashonnan.

⁸I boso mes no a tuma enkargo di Mi kosnan santu, ma boso a pone stranheronan pa tuma enkargo di Mi santuario."

⁹Asina Senor DIOS ta bisa: "Ningun stranhero, insirkumsida di kurason i insirkumsida di karni, di tur e stranheronan ku ta meimei di e yunan di Israel, no mag drenta Mi santuario.

¹⁰"Ma e levitanan ku a hala leu for di Mi tempu ku Israel a desvia, i ku a desvia bai for di Mi pa sigui tras di nan idolonan, mester karga e kastigu pa nan inikidat.

¹¹I tog nan lo ta sirbidonan den Mi santuario, i lo tin enkargo di e portanan di e kas i lo sirbi den e kas. Nan lo mata bestia pa e ofrenda kima i e sakrifisio pa e pueblo, i lo para dilanti di e pueblo pa sirbi nan.

¹²Pasobra nan a sirbi nan dilanti di nan idolonan i a bira un piedra-di-trompeka di inikidat pa e kas di Israel, pesei Mi a hura kontra nan," Senor DIOS ta deklara, "ku nan lo karga e kastigu di nan inikidat.

¹³I nan lo no aserkaMi pa sirbiMi komo saserdote, ni aserka ningun di Mi kosnan santu, e kosnan di mas santu; ma nan lo karga nan berguensa i nan abominashonnan ku nan a komete.

¹⁴Tog lo Mi nombra nan pa tin enkargo di e kas, di henter su sirbishi, i di tur loke mester wordu hasi den dje.

¹⁵"Ma e saserdotenan levitiko, e yu hombernan di Sadok, kendenan tabatin Mi santuario na nan enkargo tempu ku e yunan di Israel a desvia bai for di Mi, lo bin serka Mi pa sirbiMi; i nan lo para Mi dilanti pa ofreseMi e vet i e sanger," Senor DIOS ta deklara.

¹⁶"Nan lo drenta Mi santuario; nan lo bin na Mi mesa pa sirbiMi i pa kumpli ku Mi enkargo.

¹⁷"I ora nan drenta e portanan di e plenchi paden, nan mester ta bisti na pana di lino; i nan no mag di tin nada di lana bisti mientras ku nan ta sirbi den e portanan di e plenchi paden i den e kas.

¹⁸Nan mester tin tulban di lino riba nan kabes, i pana djabou di lino na nan hep; nan no mag faha nan mes ku nada ku ta hasi nan soda.

¹⁹I ora nan sali bai den e plenchi pafo, den e plenchi pafo serka e pueblo, nan mester kita nan pananan ku nan tabata sirbi aden i pone nan den e salanan santu; e ora ei nan mester bisti otro pana, pa nan no santifika e pueblo ku nan pananan.

²⁰"Tampoko nan no mester feita nan kabes, ni laga nan kabei krese bira largu; djis rapa nan mester rapa nan kabei.

²¹Ningun di e saserdotenan no mag bebe bina ora nan ta drenta e plenchi paden.

²²I nan no mag kasa ku un biuda of ku un muhe diborsia, ma ku birgennan for di e desendientenan di e kas di Israel, of ku un biuda ku ta biuda di un saserdote.

²³Ademas, nan lo sina Mi pueblo e diferensia entre loke ta santu i loke ta profano, i hasi nan diserni entre loke ta impuru i loke ta puru.

²⁴"I den un pleitu nan mester para pa huzga; nan mester huzga esei segun Mi ordenansanan. Tambe nan mester warda Mi leinan i Mi statutonan na tur Mi fiestanan stipula, i santifika Mi sabatnan.

²⁵"I nan no mag aserka un morto, pa nan no kontamina nan mes; sinembargo, pa tata, pa mama, pa yu homber, pa yu muhe, pa ruman homber of pa ruman muhe ku no tabatin esposo, nan por kontamina nan mes.

²⁶I despues ku el a wordu purifika e mester warda shete dia,

²⁷i riba e dia ku e drenta e santuario, e plenchi paden, pa sirbi den e santuario, e mester ofrese su ofrenda pa pika," Senor DIOS ta deklara.

²⁸"I esaki mester ta pa nan komo un erensia: Ami ta nan erensia; i boso no mag duna nan poseshon na Israel--Ami ta nan poseshon.

²⁹Nan mester kome e ofrenda di mainshi, e ofrenda pa pika i e ofrenda pa kulpa; i tur kos dedika den Israel lo ta di nan.

³⁰I e prome di tur prome fruta di tur sorto i tur kontribushon di tur sorto, for di tur boso kontribushonnan, mester ta pa e saserdotenan; tambe boso mester duna e saserdote e prome porshon di boso mansa, pa por tin bendishon riba boso kas.

³¹E saserdotenan no mag kome ningun parha of bestia ku a muri morto natural of ku a wordu habraka.