Read Papantla Totonac Ezekiel 46 Bible Online

Ezekiel 46 - Papantla Totonac bible

Ezekiel 46

¹'Asina Senor DIOS ta bisa: "Porta di e plenchi paden, ku ta keda kara pariba, mester keda sera riba e seis dianan di trabou; ma e mester wordu habri riba dia di sabat, i tambe e mester wordu habri riba dia di luna nobo.

²I e prens mester drenta for di pafo via e veranda di e porta i keda para na e drempel-di-porta. E ora ei e saserdotenan mester provee su ofrenda kima i su ofrendanan di pas, i e mester adora na e drempel-di-porta i despues sali bai pafo; ma e porta lo no wordu sera te ora nochi sera.

³E pueblo di e tera tambe mester adora dilanti di SENOR, na entrada di e porta ei, riba e dianan di sabat i riba e dianan di luna nobo.

⁴I e ofrenda kima ku e prens ta ofrese na SENOR riba dia di sabat mester ta seis lamchi sin defekto i un karne chubatu sin defekto;

⁵i e ofrenda di mainshi mester ta un efa huntu ku e karne chubatu, i e ofrenda di mainshi huntu ku e lamchinan, manera e por duna, i un hin di zeta huntu ku kada efa.

⁶I riba dia di luna nobo e mester ofrese un bishe machu sin defekto, tambe seis lamchi i un karne chubatu, kualnan mester ta sin defekto.

⁷I e mester provee un ofrenda di mainshi, un efa huntu ku e bishe machu, un efa huntu ku kada karne chubatu, i huntu ku e lamchinan, manera ku e por, i un hin di zeta huntu ku un efa.

⁸I ora ku e prens drenta, e mester drenta via e veranda di e porta i sali pa e mesun kaminda.

⁹"Ma ora ku e pueblo di e tera bin dilanti di SENOR na e fiestanan stipula, esun ku drenta via e porta panort pa adora mester sali via e porta pasuit. I esun ku drenta via e porta pasuit mester sali via e porta panort. E no mag bolbe via e porta pa kual el a drenta, ma mester sali bai stret su dilanti.

¹⁰I ora nan drenta, e prens mester drenta meimei di nan, i ora nan sali, e tambe mester sali.

¹¹"I na e festivalnan i fiestanan stipula e ofrenda di mainshi mester ta un efa huntu ku un bishe machu i un efa huntu ku un karne chubatu, i huntu ku e lamchinan, mes tantu ku e por duna, i un hin di zeta huntu ku un efa.

¹²I ora ku e prens provee un ofrenda boluntario, un ofrenda kima of ofrendanan di pas komo un ofrenda boluntario na SENOR, e porta kara pariba mester wordu habri p'e. I e lo provee su ofrenda kima i su ofrendanan di pas, manera e ta hasi riba dia di sabat. Despues e mester bai pafo, i e porta lo wordu sera despues ku el a bai pafo.

¹³"I tur dia bo mester provee un lamchi sin defekto, di un ana, komo un ofrenda kima na SENOR; tur mainta lo bo provee esaki.

¹⁴Tambe bo mester provee un ofrenda di mainshi huntu kune tur mainta, un di seis parti di un efa i un di tres parti di un hin di zeta, pa muha e harina fini. E ofrenda di mainshi aki ta un ordenansa perpetuo ku mester wordu ofresi kontinuamente na SENOR.

¹⁵Asina nan lo provee e lamchi, e ofrenda di mainshi i e zeta, komo un ofrenda kima kontinuo tur mainta."

¹⁶'Asina Senor DIOS ta bisa: "Si e prens duna un regalo for di su erensia na kualke di su yu hombernan, esei lo pertenese na su yu hombernan; esei ta nan propiedat komo erensia.

¹⁷Ma si e duna un regalo for di su erensia na un di su sirbidonan, esei lo ta di dje te na e ana di libertat; e ora ei esaki lo bolbe na e prens. Su erensia ta solamente di su yu hombernan; e lo ta di nan.

¹⁸E prens no mag kohe nada for di e erensia di e pueblo dor di kore ku nan for di nan propiedat; e mester duna erensia na su yu hombernan for di su mes propiedat, pa ningun hende for di Mi pueblo no wordu separa for di su propiedat.

¹⁹E ora ei el a hibami dor di e entrada ku tabata keda banda di e porta, na e salanan santu pa e saserdotenan, kualnan tabata keda kara panort; i mira, ayanan tabatin un luga te patras, den direkshon pabou.

²⁰Anto el a bisami: "Esaki ta e luga kaminda e saserdotenan lo herebe e ofrenda pa kulpa i e ofrenda pa pika, i kaminda nan lo horna e ofrenda di mainshi, pa nan no tin mester di saka nan hiba pafo na e plenchi di pafo pa santifika e pueblo."

²¹Despues el a hibami pafo na e plenchi di pafo i a hibami na e kuater skinanan di e plenchi; i mira, den kada skina di e plenchi tabatin un plenchi chikitu.

²²Den e kuater skinanan di e plenchi tabatin plenchinan sera, kuarenta kodo largu i trinta kodo hanchu; e kuaternan aki, den e skinanan, tabatin e mesun midi.

²³I tabatin un rant di piedra ront di e parti paden di kada un di e kuater plenchinan, ku fogonnan traha tur ront bou di e rant.

²⁴E ora ei el a bisami: "Esakinan ta e kushinanan, kaminda e sirbidonan di e kas lo herebe e sakrifisionan di e pueblo."