Read Papantla Totonac Ezekiel 47 Bible Online

Ezekiel 47 - Papantla Totonac bible

Ezekiel 47

¹Despues el a hibami bek na porta di e kas; i mira, awa tabata kore for di bou di drempel di e kas den direkshon pariba, pasobra e kas tabata kara pariba. I e awa tabata kore basha for djabou, for di banda drechi di e kas, pasuit di e altar.

²I el a hibami pafo via e porta panort i a hasimi dal un buelta pafo bai na entrada di e porta pafo via e porta ku ta keda kara pariba. I mira, awa tabata sipel for di e parti suit.

³Ora ku e homber a sali pafo den direkshon pariba ku un lina den su man, el a midi mil kodo; i el a hasimi pasa dor di e awa, awa ku tabata yega te na enkel.

⁴Atrobe el a midi mil i a hasimi pasa dor di e awa, awa ku tabata yega te na rudia. Atrobe el a midi mil i el a hasimi pasa dor di e awa, awa ku tabata yega te na hep.

⁵Atrobe el a midi mil; i el a bira un riu ku mi no por a krusa, pasobra e awa a subi, sufisiente awa pa landa aden, un riu ku bo no por a krusa.

⁶I el a bisami: "Yu di hende, bo a mira esaki?" E ora ei el a hibami bek kantu di e riu.

⁷Awor, ora mi a bolbe, mira, kantu di e riu tabatin masha hopi palu, na esun banda i na e otro banda.

⁸E ora ei el a bisami: "E awanan aki ta kore bai den direkshon di e region pariba i ta baha bai den Araba. Despues nan ta bai den direkshon di laman; nan ta basha den laman, i e awanan di laman ta bira awa dushi.

⁹I lo sosode ku tur ser bibu ku ta move na tur luga kaminda e riu ta bai, lo biba. I lo tin masha hopi piska, pasobra e awanan aki ta bai ayanan, i e otro awanan ta bira awa dushi; asina ta ku tur kaminda ku e riu bai, tur kos lo biba.

¹⁰I lo sosode ku piskadonan lo para kantu di dje; for di En-gadi te na En-eglaim lo tin un luga pa habri reda ariba. Lo tin tur sorto di piska, manera piska di Laman Grandi, masha hopi mes.

¹¹Ma su murasnan i lagunnan lo no bira dushi; nan lo sirbi komo salina.

¹²I na kantu di e riu, na esun banda i na e otro banda, tur sorto di palu di fruta lo krese i lo sirbi pa kuminda. Nan blachi lo no marchita i nan lo no falta fruta. Tur luna nan lo karga fruta, pasobra nan awa ta kore for di e santuario, i nan fruta lo ta pa kuminda i nan blachi pa kuramentu."

¹³Asina Senor DIOS ta bisa: "Esaki lo ta e frontera pa medio di kual bo mester parti e tera komo erensia entre e diesdos tribunan di Israel; Jose lo tin dos porshon.

¹⁴I bo mester partie komo erensia, kada un igual ku e otro; pasobra Mi a hura di dun'e na boso tatanan, i e tera aki lo ta di boso komo un erensia.

¹⁵"I esaki mester ta e frontera di e tera: "Na e banda nort, for di Laman Grandi, via Hetlon, te na e entrada di Zedad,

¹⁶Hamat, Berota, Sibraim, ku ta keda entre e frontera di Damasko i e frontera di Hamat; Hazar-hatikon, ku ta keda na e frontera di Hauran.

¹⁷I e frontera lo kore for di laman te na Hazar-enan na e frontera di Damasko, i parti panort, den direkshon panort, Hamat ta e frontera. Esaki ta e banda panort.

¹⁸"I e banda pariba: for di meimei di Hauran, Damasko, Galaad i tera di Israel, lo ta Jordan; lo bo midi for di e frontera di nort te na e laman pariba. Esaki ta e banda pariba.

¹⁹"I e banda pasuit den direkshon pasuit lo kore for di Tamar te na e awanan di Meriba-kades, te na e roi di Egipto, i te na Laman Grandi. Esaki ta e banda pasuit den direkshon pasuit.

²⁰"I e banda pabou: Laman Grandi, for di e frontera di suit te na e punto dilanti di Lebo-hamat. Esaki ta e banda pabou.

²¹"Asina boso mester parti e tera aki entre boso segun e tribunan di Israel.

²²I boso mester partie, dor di tira lot, komo un erensia entre boso i entre e stranheronan ku ta keda meimei di boso, kendenan ta engendra yunan meimei di boso. I nan mester ta pa boso manera yu di tera meimei di e yunan di Israel; pa medio di lot nan mester hana un erensia huntu ku boso meimei di e tribunan di Israel.

²³I lo sosode ku den e tribu kaminda e stranhero ta keda biba, ayanan boso mester dun'e su erensia," Senor DIOS ta deklara.