Read Papantla Totonac Ezekiel 5 Bible Online

Ezekiel 5 - Papantla Totonac bible

Ezekiel 5

¹"I abo, yu di hende, kohe un spada skerpi; koh'e i uz'e komo un nabaha di barbero riba bo kabes i na bo barba. Despues, kohe un balansa i parti e kabeinan.

²Kima un di tres parti den kandela meimei di e stat, ora ku e dianan di rondona e stat keda kompleta! Despues, kohe un di tres parti i korta esei ku e spada tur ront den e stat. I plama un di tres parti den bientu, i lo Mi saka spada persigui nan kune.

³Kohe tambe un par di drachi di e kabeinan ei i mara nan den e rant di bo mantel.

⁴I kohe algun mas di nan i tira nan den e kandela i kima nan ku kandela. For di esei un kandela lo plama bai den henter e kas di Israel.

⁵"Asina Senor DIOS ta bisa: 'Esaki ta Jerusalem. Mi a pon'e den sentro di e nashonnan, ku paisnan tur ront di dje.

⁶Ma el a rebeldia kontra Mi ordenansanan na un manera mas malbado ku e nashonnan, i kontra Mi statutonan mas ku e paisnan ku ta keda ront di dje; pasobra nan a rechasa Mi ordenansanan i no a kana den Mi statutonan.'

⁷"Pesei, asina Senor DIOS ta bisa: 'Pasobra boso a rebeldia mas ku e nashonnan ku ta keda ront di boso i no a kana den Mi statutonan, ni a kumpli ku Mi ordenansanan, ni a kumpli ku e ordenansanan di e nashonnan ku ta keda ront di boso,'

⁸pesei, asina Senor DIOS ta bisa: 'Mira, Mi ta kontra bo, si, Ami! I lo Mi ehekuta huisio meimei di bo den bista di e nashonnan.

⁹I pa motibu di tur bo abominashonnan lo Mi hasi meimei di bo loke nunka Mi a yega di hasi, i ku lo Mi no hasi nunka mas.

¹⁰Pesei tatanan lo kome nan yunan meimei di bo, i yunan lo kome nan tatanan. Pasobra lo Mi ehekuta huisio riba bo i plama henter bo restante den tur direkshon di bientu.

¹¹Pesei, manera Mi ta biba,' Senor DIOS ta deklara, 'siguramente, pasobra bo a profana Mi santuario ku tur bo idolonan repugnante i ku tur bo abominashonnan, pesei Ami tambe lo hal'atras. I lo Mi no wak bo ku duele, ni spar bo tampoko.

¹²Un di tres parti di bo hendenan lo muri di pest, of dor di hamber nan lo kaba na nada meimei di bo. Un di tres parti lo kai pa medio di spada tur ront di bo, i un di tres parti lo Mi plama den tur direkshon di bientu, i lo Mi saka spada persigui nan kune.

¹³'Asina Mi rabia lo wordu kumpli i lo Mi sasia Mi furia riba nan, i lo Mi keda konsola. E ora ei nan lo sa ku Ami, SENOR, a papia den Mi zelo, ora Mi a deskarga Mi furia riba nan.

¹⁴'Ademas, lo Mi hasibo un desolashon i un reproche entre e nashonnan ku ta keda ront di bo, den bista di tur ku ta pasa.

¹⁵Asina esei lo ta un reproche, un insulto, un spiertamentu i un opheto di horor pa e nashonnan ku ta keda ront di bo, ora Mi ehekuta huisio kontra bo den rabia, furia i reprendementunan furioso. Ami, SENOR, a papia.

¹⁶Ora Mi tira riba nan e flechanan mortal di hamber, ku lo ta pa destrukshon di esnan ku lo Mi manda pa destrui boso, e ora ei lo Mi intensifika e miseria di hamber riba boso i stop e provishon di pan.

¹⁷Ademas, lo Mi manda hamber i bestia feros riba boso, i eseinan lo lagabo sin yu. Pest i dramamentu di sanger tambe lo pasa meimei di bo, i lo Mi trese spada riba bo. Ami, SENOR, a papia.'"