Read Papantla Totonac Ezekiel 6 Bible Online

Ezekiel 6 - Papantla Totonac bible

Ezekiel 6

¹I e palabra di SENOR a yega na mi, bisando:

²"Yu di hende, bira bo kara wak den direkshon di e serunan di Israel, i profetisa kontra nan,

³i bisa: 'O serunan di Israel, skucha e palabra di Senor DIOS! Asina Senor DIOS ta bisa e serunan i seritunan, e roinan i e vayenan: "Mira, Mi mes ta bai trese un spada kontra boso, i lo Mi destrui boso luganan haltu.

⁴Asina boso altarnan lo keda desola i boso altarnan di sensia lo wordu kibra na pida-pida. I lo Mi hasi boso mortonan kai dilanti di boso idolonan.

⁵Tambe lo Mi pone e kadavernan di e yunan di Israel dilanti di nan idolonan, i lo Mi plama boso wesunan ront di boso altarnan.

⁶Den tur boso luganan di biba statnan lo keda ruina i e luganan haltu lo keda desola, asina ku boso altarnan lo keda ruina i desola, boso idolonan kibra i destrui, boso altarnan di sensia basha abou, i loke boso a traha lo wordu kita kompletamente.

⁷E mortonan lo kai meimei di boso i boso lo sa ku Ami ta SENOR.

⁸"Ma lo Mi laga un restante, pasobra boso lo tin meimei di e nashonnan esnan ku a skapa for di spada, ora boso wordu plama den e nashonnan.

⁹E ora ei esnan di boso ku skapa lo korda riba Mi den e nashonnan pa unda nan lo wordu hiba den koutiverio--kon Mi a sufri pa motibu di nan kurason adultero, ku a aleha for di Mi, i pa motibu di nan wowonan ku nan a prostitui kune dor di sigui tras di nan idolonan. Nan lo tin asko di nan mes pa motibu di e maldatnan ku nan a komete den tur nan abominashonnan.

¹⁰E ora ei nan lo sa ku Ami ta SENOR. No ta pornada Mi a bisa ku lo Mi trese e desaster aki riba nan."'

¹¹"Asina Senor DIOS ta bisa: 'Bati man, bati pia abou i bisa: "Ai, pa motibu di tur e abominashonnan grandi di e kas di Israel, pasobra nan lo kai pa medio di spada, hamber i pest.

¹²Esun ku ta leu lo muri pa medio di pest; esun ku ta serka lo kai pa medio di spada; i esun ku keda i ku ta tur rondona lo muri pa medio di hamber. Asina lo Mi kumpli ku Mi furia riba nan.

¹³E ora ei boso lo sa ku Ami ta SENOR, ora nan mortonan keda meimei di nan ldolonan ront di nan altarnan, riba tur seru haltu, riba tur kabes di seru, bou di tur palu berde i bou di tur palu di eik ku ta yen di blachi, e luganan kaminda nan tabata ofrese sensia di holo dushi na tur nan ldolonan.

¹⁴Asina lo Mi saka Mi man kontra nan den tur nan habitashonnan i hasi e tera desola, si, mas desola ku e desierto na Diblat. Asina nan lo sa ku Ami ta SENOR.