Read Papantla Totonac Ezekiel 7 Bible Online

Ezekiel 7 - Papantla Totonac bible

Ezekiel 7

¹Ademas, e palabra di SENOR a yega na mi, bisando:

²"I abo, yu di hende, asina Senor DIOS ta bisa tera di Israel: 'E fin! E fin a yega na tur kuater skina di e tera.

³Awor e fin a yega pa bo, i lo Mi manda Mi rabia kontra bo. Lo Mi huzgabo segun bo kondukta, i lo Mi pone tur bo abominashonnan riba bo.

⁴Lo Mi no wak bo ku duele, ni spar bo tampoko, ma lo Mi pone bo kondukta riba bo; i bo abominashonnan lo ta meimei di bo. E ora ei boso lo sa ku Ami ta SENOR!'

⁵"Asina Senor DIOS ta bisa: 'Un desaster! Un desaster uniko! At'e ta bin!

⁶E fin ta bin! E fin a yega! El a spierta kontra bo. At'el a yega!

⁷Bo destrukshon a bin riba bo, O habitante di e tera. E tempu a yega, e dia ta serka--paniko na luga di gritu di alegria riba e serunan.

⁸Awor pronto lo Mi drama Mi furia riba bo i kumpli ku Mi rabia kontra bo; lo Mi huzgabo segun bo kondukta i pone tur bo abominashonnan riba bo.

⁹Lo Mi no wak bo ku duele, ni spar bo tampoko. Lo Mi pagabo segun bo kondukta, mientras ku bo abominashonnan ta meimei di bo. E ora ei boso lo sa ku ta Ami, SENOR, ta kastiga.

¹⁰'At'e dia! At'e ta bin! Bo destrukshon ta yegando; e bara a saka konopi, arogansia a floria.

¹¹Violensia a krese bira un bara di maldat. Ningun di nan lo no keda, ningun di nan multitut, nada di nan rikesa, ni nada meimei di nan ku ta di balor.

¹²E tempu a bin, e dia a yega. No laga e kumprado regosiha, ni laga e bendedo lamenta, pasobra tin furia riba henter nan multitut.

¹³Di berdat, e bendedo lo no rekobra loke el a bende tanten ku nan tur dos ta na bida ainda; pasobra e vishon ku ta konserni henter e multitut lo no wordu revoka. Pa motibu di nan inikidat, ni un di nan lo no preserva su bida.

¹⁴Nan a toka trompet i a prepara tur kos, ma ni un no ta bai bataya, pasobra Mi furia ta kontra henter nan multitut.

¹⁵'Tin spada pafo, pest i hamber paden. Esun ku ta den kunuku lo muri pa medio di spada; i hamber i pest lo kaba ku esnan den stat.

¹⁶Maske nan sobrebibientenan skapa, nan lo ta riba e serunan manera palomba di vaye; nan tur lo ta bou di yoramentu, kada un pa su mes inikidat.

¹⁷Tur man lo kologa slap, i tur rudia lo bira debil manera awa.

¹⁸I nan lo faha nan mes ku pana-di-saku, i temblamentu lo podera di nan. I riba tur kara lo tin berguensa, i nan kabes lo keda pelon-pelon.

¹⁹Nan lo tira nan plata riba kaya, i nan oro lo bira un kos di horor. Nan plata i nan oro lo no por libra nan den e dia di e furia di SENOR. Nan lo no por satisfase nan apetit, ni nan lo no por yena nan barika, pasobra nan inikidat a bira pa nan un piedra di trompeka.

²⁰I nan a kambia e bunitesa di Su adornonan hasie bira orguyo, i nan a traha e imagennan di nan abominashonnan i nan kosnan repugnante kune; pesei lo Mi hasi esei un kos di horor pa nan.

²¹Lo Mi entregu'e den man di stranheronan komo plunder i na e malbadonan di tera komo botin, i nan lo profan'e.

²²Tambe lo Mi kita kara pa nan i nan lo profana Mi luga sekreto; e ora ei ladron lo drenta den dje i lo profan'e.

²³'Prepara e kadena, pasobra e tera ta yen di krimen sangriente i e stat ta yen di violensia.

²⁴Pesei lo Mi trese esnan di mas malu di e nashonnan, i nan lo podera di nan kasnan. Tambe lo Mi pone un fin na e orguyo di e poderosonan, i nan luganan santu lo wordu profana.

²⁵Ora angustia bin, nan lo buska pas, ma lo no tin.

²⁶Lo bin desaster riba desaster i rumor riba rumor. E ora ei nan lo purba di hana un vishon for di un profeta, ma lei lo ta perdi pa e saserdote i konseho pa e ansianonan.

²⁷Rei lo tene rou, prens lo ta bisti ku horor, i mannan di e hendenan di e tera lo tembla. Lo Mi hasi ku nan di akuerdo ku nan kondukta, i segun nan mes huisionan lo Mi huzga nan. I nan lo sa ku Ami ta SENOR.'"