Read Papantla Totonac Ezekiel 9 Bible Online

Ezekiel 9 - Papantla Totonac bible

Ezekiel 9

¹E ora ei El a yama na bos haltu pa mi tende: "Hala serka, boso burdugunan di e stat, kada un ku su arma di destrukshon den su man."

²I mira, seis homber a bin for di direkshon di e porta di ariba, ku ta keda kara panort, kada un ku su arma di destrukshon den su man. I entre nan tabatin un homber bisti na pana di lino ku un estuche ku kos di skirbi aden mara na su hep. Nan a drenta i a bai para banda di e altar di brons.

³I e gloria di e Dios di Israel a lanta for di riba e kerubin, riba kual e tabata, i a bai na drempel di e tempel. I El a yama e homber ku tabata bisti na pana di lino, i ku tabatin e estuche ku kos di skirbi aden mara na su hep.

⁴I SENOR a bis'e: "Pasa dwars dor di e stat i dwars dor di Jerusalem, i pone un senal riba frenta di e hombernan ku ta suspira i keha pa motibu di tur e abominashonnan ku ta wordu hasi den dje."

⁵Ma na e otronan El a bisa pa mi tende: "Sigui su tras dor di e stat i dal mata. No wak nan ku duele, ni spar nan tampoko.

⁶Mata tur homber bieu i yon, mucha muhe, mucha chikitu, i tur muhe, ma no mishi ku ningun hende ku tin e marka. I bo tin ku kuminsa na Mi santuario." Asina nan a kuminsa ku e ansianonan ku tabata dilanti di e tempel.

⁷I El a bisa nan: "Profana e tempel i yena e plenchinan ku e mortonan. Sali pafo!" I nan a bai i a dal e hendenan mata den e stat.

⁸Anto a sosode ku ora nan tabata mata i ami so a keda, mi a tira mi kurpa abou ku mi kara te na suela i a sklama, bisando: "Ai Senor DIOS! Bo ta bai destrui henter e restante di Israel dor di drama Bo furia riba Jerusalem?"

⁹I El a kontestami: "E inikidat di e kas di Israel i Juda ta masha-masha grandi mes. E tera ta yen di sanger, i e stat ta yen di perversidat, pasobra nan ta bisa: 'SENOR a bandona e tera; SENOR no ta mira!'

¹⁰Ma pa loke ta Ami, lo Mi no wak nan ku duele, ni spar nan tampoko, ma lo Mi pone nan kondukta riba nan mes kabes."

¹¹E ora ei, at'e homber ku tabata bisti na pana di lino, ku tabatin e estuche ku kos di skirbi aden mara na su hep, a bin reporta, bisando: "Mi a hasi presis manera Bo a ordenami."