Read Papantla Totonac Daniel 1 Bible Online

Daniel 1 - Papantla Totonac bible

Daniel 1

¹Den e di tres ana di e reinado di Joakim, rei di Juda, Nabukodonosor, rei di Babilonia, a bin Jerusalem i a rondon'e.

²I Senor a entrega Joakim, rei di Juda, den su man, huntu ku algun di e artikulonan-di-uzo di e kas di Dios; i el a hiba nan na tera di Sinar, na e kas di su dios, i a pone e artikulonan-di-uzo den e luga-di-warda-tesoro di su dios.

³E ora ei rei a ordena Aspenaz, hefe di su eunukonan, pa trese algun di e yunan di Israel i algun di e famia real i di e nobelnan,

⁴hobennan ku no tabatin ningun defekto, ku tabata di bon aparensia, ku tabatin inteligensia den tur ramo di sabiduria, ku tabata yen di komprendementu i konosementu pa diserni, i ku tabatin abilidat pa sirbi den rei su korte; i el a orden'e pa sina nan e literatura i idioma di e kaldeonan.

⁵I rei a duna ordu pa nan hana un provishon diario di e miho kuminda di rei i di e bina ku rei tabata bebe, i tambe pa nan hana un edukashon di tres ana, na fin di kual nan mester a drenta e sirbishi personal di rei.

⁶Awor entre nan tabatin Daniel, Ananias, Misael i Azarias, di e yu hombernan di Juda.

⁷Anto e hefe di e eunukonan a duna nan un nomber nobo; i Daniel el a duna e nomber Beltsasar, Ananias Sadrak, Misael Mesak i Azarias Abed-nego.

⁸Ma Daniel a propone den su kurason di no kontamina su mes ku e miho kuminda di rei, ni ku e bina ku rei tabata bebe; pesei el a pidi hefe di e eunukonan permit pa e no tin mester di kontamina su mes.

⁹Awor Dios a hasi ku Daniel a hana grasia i kompashon den bista di e hefe di e eunukonan,

¹⁰i e hefe di e eunukonan a bisa Daniel: "Mi tin miedu di senor mi rei, kende a duna ordu tokante di boso kuminda i boso bibida; pasobra pakiko e mester mira boso kara ta mustra mas blek ku kara di e hobennan di boso edat? E ora ei boso lo pone mi kabes na peliger dilanti di rei."

¹¹Ma Daniel a bisa e mayordomo ku e hefe di e eunukonan a nombra riba Daniel, Ananias, Misael i Azarias:

¹²"Pa fabor, pone bo sirbidonan na prueba pa dies dia, i laga nan duna nos berdura pa kome i awa pa bebe.

¹³E ora ei, laga nos aparensia wordu kompara ku aparensia di e hobennan ku ta kome e miho kuminda di rei; i trata ku bo sirbidonan konforme loke bo ta mira."

¹⁴Asina el a skucha nan den e asunto aki i a pone nan na prueba pa dies dia.

¹⁵I na fin di dies dia nan aparensia tabata mustra miho i nan tabata den miho kondishon ku tur e hobennan ku tabata kome e miho kuminda di rei.

¹⁶Pesei e mayordomo a sigui kita nan porshon di e miho kuminda i e bina ku nan mester a bebe, i a sigui duna nan berdura.

¹⁷I na e kuater hobennan aki Dios a duna konosementu i inteligensia den tur ramo di literatura i sabiduria; i Daniel tabata komprende tur sorto di vishon i sono.

¹⁸Anto na fin di e dianan, ora rei a bisa pa presenta nan, e hefe di e eunukonan a presenta nan dilanti di Nabukodonosor.

¹⁹I rei a papia ku nan, i den nan tur no a wordu hana ni un manera Daniel, Ananias, Misael i Azarias; asina nan a drenta e sirbishi personal di rei.

²⁰I den tur asunto di sabiduria i komprendementu ku rei tabata konsulta ku nan, e tabata hana nan dies bes miho ku tur e magonan i astrologonan ku tabatin den henter su reino.

²¹I Daniel a keda einan te na e prome ana di rei Siro.