Read Papantla Totonac Daniel 10 Bible Online

Daniel 10 - Papantla Totonac bible

Daniel 10

¹Den e di tres ana di Siro, rei di Persia, un mensahe a wordu revela na Daniel, kende tabata wordu yama Beltsasar; i e mensahe tabata berdat i un di gran konflikto, ma el a komprende e mensahe i tabatin komprendementu di e vishon.

²Den e dianan ei ami, Daniel, tabata tene rou tres siman largu.

³Mi no a kome kuminda dushi, ni karni ni bina no a drenta mi boka, tampoko mi no a uza ningun sorto di unguente, te ora ku tur e tres simannan a keda kumpli.

⁴I riba e di bint'i kuater dia di e prome luna, mientras ku mi tabata kantu di e gran riu, esta, Riu Tigris,

⁵mi a hisa mi kara wak, i ata un homber bisti na pana di lino, ku su sintura faha ku un faha di oro puru di Ufaz.

⁶Su kurpa tabata manera berilo, su kara tabatin aparensia di lamper, su wowonan tabata manera flambeu tur na flam, su brasanan i pianan manera e splendor di brons lombra, i e zonidu di su palabranan manera bos di un multitut.

⁷Awor ta ami, Daniel, so a mira e vishon, ma e hombernan ku tabata huntu ku mi no a mira e vishon; sinembargo, un gran spantu a baha riba nan, i nan a kore bai skonde.

⁸Asina mi a keda mi so i a mira e gran vishon aki; i no a keda forsa den mi, pasobra mi kolo natural a bira tur blek manera morto, i mi no tabatin forsa mas.

⁹Ma mi a tende e zonidu di su palabranan; i asina ku mi a tende e zonidu di su palabranan, mi a kai riba mi kara den un sono profundo, ku mi kara na suela.

¹⁰I mira, un man a mishi ku mi i a ponemi riba mi man i riba mi rudia, tur na temblamentu.

¹¹I el a bisami: "O Daniel, homber masha stima, komprende e palabranan ku mi ta bai bisabo, i lanta para, pasobra mi a wordu manda serka bo awor." I ora ku el a papia e palabra aki ku mi, mi a lanta para, tur na temblamentu.

¹²E ora ei el a bisami: "No tene miedu, Daniel, pasobra for di e prome dia ku bo a pone bo kurason pa komprende esaki i pa umiya bo mes dilanti di bo Dios, bo palabranan a wordu tendi, i mi a bin komo kontesta riba bo palabranan.

¹³Ma e prens di e reino di Persia tabata strobami bint'i un dia largu. I mira, Miguel, un di e prensnan prinsipal, a bin yudami, pasobra mi a keda ayanan serka e reinan di Persia.

¹⁴Awor mi a bin pa dunabo komprendementu di loke ta bai sosode ku bo pueblo den e ultimo dianan, pasobra e vishon tin di hasi ku e dianan di future."

¹⁵I ora ku el a papia e palabranan aki ku mi, mi a baha mi kabes te na suela i a keda sin abla.

¹⁶I mira, un ku tabata parse un ser humano a mishi ku mi lepnan; e ora ei mi a habri mi boka i a papia, i mi a bisa esun ku tabata para mi dilanti: "O mi senor, komo resultado di e vishon, angustia a bin riba mi i mi no tin forsa mas.

¹⁷Pasobra kon e sirbido aki di mi senor por papia ku bo, mi senor? Pa loke t'ami, awor mi no tin forsa mas den mi, ni no a keda rosea den mi."

¹⁸Anto esun aki, ku tabatin aparensia di hende, a mishi ku mi atrobe i a fortalesemi.

¹⁹I el a bisa: "O homber masha stima, no tene miedu. Pas sea ku bo; tuma kurashi i sea balente!" Awor, asina ku el a papia ku mi, mi a hana forsa i a bisa: "Papia, mi senor, pasobra bo a fortalesemi."

²⁰E ora ei el a bisa: "Bo ta komprende pakiko mi a bin serka bo? Ma lo mi bai bek awor pa bringa kontra e prens di Persia; pesei mi ta sali, i ata e prens di Gresia ta serka di bin.

²¹Sinembargo, lo mi kontabo kiko tin skirbi den e buki di berdat. (No tin ningun ku ta para firme ku mi kontra e forsanan aki, sino solamente Miguel, bo prens.