Read Papantla Totonac Daniel 11 Bible Online

Daniel 11 - Papantla Totonac bible

Daniel 11

¹"I den e prome ana di Dario, e medo, mi a lanta pa ta un enkurashamentu i un protekshon p'e.)

²"I awor lo mi kontabo e berdat. Mira, ta bai lanta tres rei mas na Persia. Anto e di kuater lo hana muchu mas rikesa ku nan tur; asina ku e bira fuerte dor di su rikesa, e lo lanta henter e imperio kontra e reino di Gresia.

³I un rei poderoso lo lanta, i e lo goberna ku gran outoridat i hasi manera e ta hana ta bon.

⁴Ma asina ku e lanta, su reino lo wordu kibra i parti den direkshon di e kuater bientunan di shelu, ma no pa su mes desendientenan, ni segun su outoridat ku e tabata goberna kune; pasobra su soberania lo wordu ranka ku rais ku tur i duna na otronan fuera di nan.

⁵"E ora ei e rei di Suit lo bira fuerte, ma un di su prensnan lo bira mas fuerte kune i optene dominio; su dominio lo ta un dominio grandi.

⁶I despues di algun ana nan lo sera un aliansa, i e yu muhe di e rei di Suit lo bin serka e rei di Nort pa sera un kombenio di pas. Ma e yu muhe lo no keda ku su puesto di poder, ni e rei lo no keda ku su poder, ma e yu muhe lo wordu entrega, huntu ku esnan ku a tres'e, i esun ku a engendr'e, huntu ku esun ku a apoy'e den e tempunan ei.

⁷"Ma un rama for di e raisnan di e yu muhe lo lanta na luga di e rei di Suit, i esaki lo bin kontra e ehersito i drenta den e forti di e rei di Nort, i e lo bringa kontra nan i lo vense nan.

⁸I tambe nan diosnan ku nan imagennan di metal i nan artikulonan presioso di plata i di oro e lo hiba Egipto den koutiverio, i e mes lo keda sin ataka e rei di Nort pa algun ana.

⁹E ora ei e rei di Nort lo invadi reino di e rei di Suit, ma lo bolbe na su mes tera.

¹⁰I su yu hombernan lo mobilisa i reuni un multitut di forsanan grandi; i un di nan lo sigui bin i inunda i pasa dor, pa e bolbe hasi guera te na su forti.

¹¹"I e rei di Suit lo bira furioso i lo sali bringa ku e rei di Nort. Anto e rei di Nort lo lanta un gran multitut, ma e multitut ei lo wordu entrega den man di e rei di Suit.

¹²Ora ku e multitut wordu kaptura, su kurason lo halsa su mes, i e lo hasi dies milnan kai; tog e lo no vense.

¹³Pasobra e rei di Nort lo bolbe lanta un multitut mas grandi ku esun di prome, i na fin di algun ana e lo basha bin ku un ehersito grandi i ku hopi ekipo.

¹⁴"Awor den e tempunan ei hopi lo lanta kontra e rei di Suit; esnan violento entre bo pueblo tambe lo halsa nan mes pa kumpli ku e vishon, ma nan lo kai.

¹⁵Anto e rei di Nort lo bin, i lanta un baluarte i kaptura un stat bon fortifika; i e forsanan di Suit lo no por resisti, ni nan trupanan skohi tampoko, pasobra lo no tin forsa pa resisti kontra dje.

¹⁶Ma esun ku bin kontra dje lo hasi manera e kier, i ningun hende lo no por resisti kontra dje; tambe e lo keda den e Tera Bunita pa un tempu, ku destrukshon den su man.

¹⁷I e lo propone pa bin ku e poder di henter su reino, i lo trese huntu kune e kondishonnan pa sera un kombenio di pas ku e lo pone na vigor; tambe e lo duna e rei di Suit e yu muhe di muhenan pa destrui e reino. Ma e yu muhe lo no apoy'e, ni e lo no ta na su banda.

¹⁸E ora ei e rei di Nort lo bira su kara den direkshon di e teranan na kosta i lo kaptura hopi hende. Ma un komandante lo pone un fin na su insulto; ademas, e lo pagu'e bek pa su insulto.

¹⁹Despues e lo bira su kara den direkshon di e fortinan di su mes tera, ma e lo trompeka i kai i lo no wordu hana mas.

²⁰"Anto na su luga lo lanta un otro, ku lo manda un kobrado di impuesto pasa dor di e Hoya di su reino; ma denter di algun dia e lo wordu destrui, ma no den rabia ni den bataya.

²¹"I na su luga un persona despresiabel lo lanta, kende nan no a duna e onor di bira rei, ma e lo bin den un tempu di trankilidat i gara e reino pa medio di komplot.

²²I e multitut di forsanan lo wordu lastra su dilanti manera den un diluvio di awa, i lo keda kompletamente destrui, huntu ku e prens di e aliansa.

²³I despues di a sera un aliansa kune, e lo praktika engano, i e lo subi i hana poder, ku poko hende.

²⁴Den un tempu di trankilidat e lo bai den e partinan di mas riku den e reino, i lo logra hasi loke su tatanan nunka a yega di hasi, ni su antepasadonan. E lo parti entre nan e kosnan horta, e botin i e rikesa, i e lo traha komplot kontra luganan fortifika, ma solamente pa un tempu.

²⁵"I e lo lanta su forsa i kurashi kontra e rei di Suit ku un ehersito grandi; asina e rei di Suit lo mobilisa un ehersito masha grandi mes i poderoso pa guera; ma e lo no por keda para, pasobra komplotnan lo wordu traha kontra dje.

²⁶I esnan ku ta kome kuminda di rei lo kibr'e, i su ehersito lo basha bin manera un diluvio di awa, ma hopi lo wordu mata.

²⁷I intenshon di e kurason di tur dos rei lo ta pa hasi maldat so, i sinta na e mesun mesa nan lo gana otro, ma esaki lo no sirbi di nada, pasobra e fin mester bin ainda na e tempu stipula.

²⁸E ora ei e lo bolbe pa su tera ku hopi rikesa, ma su kurason lo ta kontra e aliansa santu, i e lo tuma akshon, i despues bolbe pa su mes tera.

²⁹"Na e tempu stipula e lo bolbe i drenta Suit, ma e ultimo biaha aki lo no resulta manera esun di prome.

³⁰Pasobra barkunan di Kitim lo bin kontra dje; pesei e lo keda desanima, i lo bolbe i bira furioso riba e aliansa santu i lo tuma akshon; asina e lo bin bek i mustra interes den esnan ku ta bandona e aliansa santu.

³¹"I su forsanan lo lanta, lo profana e forti di e santuario i lo deshasi di e sakrifisio di tur dia. I nan lo lanta e abominashon di desolashon.

³²I esnan ku ta viola e aliansa e lo sedusi ku labiamentu, ma e pueblo ku konose nan Dios lo ta fuerte i lo tuma akshon.

³³"I esnan den e pueblo ku tin komprendementu lo instrui hopi hende; tog nan lo kai pa medio di spada i kandela, pa medio di koutiverio i plunder, pa hopi dia.

³⁴Ma ora nan kai, nan lo hana djis un poko yudansa, i hopi lo uni ku nan den hipokresia.

³⁵I algun di esnan ku tin disernimentu lo kai, pa wordu refina, limpia i purifika, te na e tempu di e fin; pasobra esaki mester bin ainda na e tempu stipula.

³⁶"E ora ei e rei lo hasi manera e kier, i e lo halsa i engrandese su mes riba tur dios; i e lo papia blasfemia teribel kontra e Dios di diosnan; i e lo prospera te ora ku e indignashon wordu kumpli, pasobra loke ta determina lo wordu kumpli.

³⁷I e lo no hasi kaso di e diosnan di su tatanan, ni di e deseo di muhenan, ni e lo no hasi kaso di ningun otro dios, pasobra e lo engrandese su mes riba nan tur.

³⁸Alkontrario e lo onra un dios di fortinan, un dios ku su tatanan no tabata konose; e lo onr'e ku oro, plata, piedranan kostoso i tesoronan.

³⁹I e lo tuma akshon kontra e fortinan di mas fuerte, ku yudansa di un dios stranhero; e lo duna gran onor na esnan ku ta rekonos'e, i e lo hasi nan goberna riba hopi hende, i lo parti tera pa un preis.

⁴⁰"I na e tempu di e fin e rei di Suit lo atak'e, i e rei di Nort lo ranka bin kontra dje i lo drenta paisnan, inunda nan ku garoshi, ku koredo di kabai i ku hopi barku, i pasa bai.

⁴¹Tambe e lo drenta e Tera Bunita, i hopi pais lo kai; ma esakinan lo wordu reskata for di su man: Edom, Moab i e yu hombernan mas prinsipal di Amon.

⁴²E ora ei e lo ekstende su man kontra otro paisnan, i tera di Egipto lo no skapa.

⁴³Ma e lo hana kontrol riba e tesoronan skondi di oro i plata, i riba tur e kosnan presioso di Egipto; i hende di Libia i Etiopia lo sigui net su tras.

⁴⁴Ma rumornan for di Pariba i for di Nort lo molesti'e, i ku gran furia e lo sali pa destrui i kaba ku hopi hende.

⁴⁵I e lo lanta su tentnan real entre e lamannan i e bunita Seru Santu; ma e lo yega na su fin, i ningun hende lo no yud'e.