Read Papantla Totonac Daniel 12 Bible Online

Daniel 12 - Papantla Totonac bible

Daniel 12

¹"Awor e tempu ei, Miguel, e gran prens ku ta proteha e yu hombernan di bo pueblo, lo lanta. I lo tin un tempu di angustia manera nunka tabatin for di tempu ku tabata eksisti un nashon te na e tempu ei; i e tempu ei bo pueblo, tur hende ku su nomber wordu hana skirbi den e buki, lo wordu reskata.

²I hopi di esnan ku ta drumi den stof di suela lo spierta, algun pa bida eterno, ma otronan pa berguensa i despresio eterno.

³I esnan ku tin disernimentu lo briya manera e splendor di e firmamentu di shelu, i esnan ku ta guia hopi hende na hustisia lo briya manera e streanan pa semper i semper.

⁴Ma pa loke t'abo, Daniel, tene e palabranan aki skondi i seya e buki te na e tempu di e fin; hopi hende lo kore pariba-pabou, i konosementu lo oumenta."

⁵E ora ei ami, Daniel, a wak i ata, dos otro tabata para, un na e kantu aki di e riu, i e otro na e kantu aya di e riu.

⁶I un a bisa e homber bisti na lino, kende tabata ariba di e awanan di e riu: "Kuantu tempu falta ainda pa fin di e maraviyanan aki yega?"

⁷I mi a tende e homber bisti na lino, kende tabata ariba di e awanan di e riu, ora ku el a hisa su man drechi i su man robes na shelu, i a hura pa Esun ku ta biba pa semper, ku lo ta pa un tempu, tempunan i mitar di un tempu; i asina ku nan kaba di destrui e poder di e pueblo santu, tur e eventonan aki lo keda kumpli.

⁸I pa loke t'ami, mi a tende, ma no por a komprende; asina mi a bisa: "Mi senor, kiko lo ta e fin di e eventonan aki?"

⁹I el a bisa: "Sigui bo kaminda, Daniel, pasobra e palabranan aki ta keda skondi i seya te na e tempu di e fin.

¹⁰Hopi lo wordu limpia, purifika i refina; ma e malbadonan lo hasi maldat, i ningun di e malbadonan lo komprende, ma esnan ku tin disernimentu lo komprende.

¹¹"I for di e tempu ku e sakrifisio di tur dia wordu aboli, i e abominashon di desolashon wordu stablesi, lo ta mil dos shent'i nobenta dia.

¹²Ki bendishona ta esun ku ta sigui spera i ku ta yega na e mil tres shent'i trint'i sinku dianan!

¹³"Ma pa loke t'abo, sigui bo kaminda te na e fin; e ora ei lo bo bai sosega i lo lanta pa risibi e parti ku ta tokabo na e fin di dianan."