Read Papantla Totonac Daniel 2 Bible Online

Daniel 2 - Papantla Totonac bible

Daniel 2

¹Awor den e di dos ana di e reinado di Nabukodonosor, Nabukodonosor a sona sononan; i su spiritu tabata asina tribula, ku su sono a bai.

²E ora ei rei a duna ordu pa yama e magonan, e astrologonan, e hasidonan di bruha i e kaldeonan, pa splika rei su sononan. Asina nan a bin i a para dilanti di rei.

³I rei a bisa nan: "Mi tabatin un sono, i mi spiritu ta ansioso pa komprende e sono."

⁴E ora ei e kaldeonan a papia ku rei na arameo: "O rei, biba pa semper! Konta bo sirbidonan e sono, i nos lo duna e interpretashon."

⁵Rei a kontesta i a bisa e kaldeonan: "Mi desishon ta firme: si boso no bisami e sono i su interpretashon, boso lo wordu korta na pida-pida, i boso kasnan lo wordu hasi un monton di sushi.

⁶Ma si boso konta e sono i su interpretashon, boso lo risibi regalo, rekompensa i gran onor serka mi; pesei, kontami e sono i su interpretashon."

⁷Nan a kontesta pa di dos biaha i a bisa: "Laga rei konta su sirbidonan e sono, i nos lo duna e interpretashon."

⁸I rei a kontesta i a bisa: "Mi sa sigur ku boso ta buska pa gana tempu, pasobra boso a mira ku mi desishon ta firme,

⁹ku si boso no bisami e sono, ta solamente un sentensia tin pa boso. Pasobra boso a bin na akuerdo pa papia palabranan mentiroso i korupto mi dilanti, te ora ku e situashon kambia; pesei kontami e sono, pa mi sa ku boso por dunami su interpretashon."

¹⁰E kaldeonan a kontesta rei i a bisa: "No tin ningun hende na tera ku por konta rei e asunto, komo ku nunka ningun rei, senor of gobernante no a yega di puntra un kos asina na ningun mago, astrologo of kaldeo.

¹¹Ademas, e kos ku rei ta ordena ta difisil, i no tin ningun otro hende ku por konta rei esei ku solamente diosnan, kende nan luga di biba no ta serka hende."

¹²Pa e motibu aki rei a bira masha indigna i masha furioso, i a duna ordu pa destrui tur e sabionan di Babilonia.

¹³Asina a sali e dekreto ku mester mata e sabionan, i nan a buska Daniel i su amigunan pa mata.

¹⁴E ora ei Daniel a papia ku sabiduria i prudensia ku Ariok, kapitan di rei su guardia, kende a sali pa mata e sabionan di Babilonia;

¹⁵el a kontesta i a bisa Ariok, rei su komandante: "Pa ki motibu e dekreto di rei tin tantu urgensia?" E ora ei Ariok a pone Daniel na haltura di e asunto.

¹⁶Asina Daniel a drenta i a pidi rei pa dun'e tempu, pa e por duna rei e interpretashon.

¹⁷Anto Daniel a bai su kas i a pone su amigunan Ananias, Misael i Azarias na haltura di e asunto,

¹⁸pa nan pidi kompashon di e Dios di shelu tokante di e misterio aki, pa Daniel i su amigunan no wordu destrui huntu ku e otro sabionan di Babilonia.

¹⁹E ora ei e misterio a wordu revela na Daniel den un vishon di anochi. E ora ei Daniel a bendishona e Dios di shelu;

²⁰Daniel a kontesta i a bisa: "Laga e nomber di Dios sea bendishona pa semper i semper, pasobra sabiduria i poder ta pertenese na djé.

²¹I ta E ta Esun ku ta kambia tempunan i epokanan; E ta kita reinan i ta pone reinan; E ta duna sabiduria na sabionan, i konosementu na hombernan di komprendementu.

²²Ta E ta Esun ku ta revela e kosnan profundo i skondi; E sa kiko tin den skuridat, i e lus ta biba serka djé.

²³Na Bo, O Dios di mi tatanan, mi ta duna gradisimentu i alabansa, pasobra Bo a dunami sabiduria i poder; i awor Bo a hasi konosi na mi loke nos a pidi di Bo, pasobra Bo a hasi e asunto di rei konosi na nos."

²⁴Pesei Daniel a bai serka Ariok, kende rei a nombra pa destrui e sabionan di Babilonia; el a bai i a papia asin'aki kune: "No destrui e sabionan di Babilonia! Hibami den presensia di rei i lo mi duna rei e interpretashon."

²⁵E ora ei Ariok a hiba Daniel lihe den presensia di rei i a bis'e asin'aki: "Mi a hana un homber entre e eksiliadonan di Juda ku por duna rei e interpretashon!"

²⁶Rei a kontesta i a bisa Daniel, kende su nomber tabata Beltsasar: "Bo por bisami e sono ku mi a mira i su interpretashon?"

²⁷Daniel a kontesta dilanti di rei i a bisa: "Pa loke ta e misterio di kual rei a puntra, ni sabio, ni astrologo, ni mago, ni adivinado no por konta rei esei.

²⁸Sinembargo, tin un Dios den shelu ku ta revela misterio, i El a hasi konosi na rei Nabukodonosor kiko lo sosode den e ultimo dianan. Esaki tabata bo sono i e vishonnan ku a pasa den bo mente, mientras ku bo tabata riba bo kama.

²⁹"Mientras ku abo, O rei, tabata riba bo kama, bo pensamentunan tabata bai riba loke ta bai sosode den futuro; i Esun ku ta revela misterio a hasi konosi na bo kiko ta bai sosode.

³⁰Ma pa loke t'ami, e misterio aki no a wordu revela na mi pa motibu ku tin mas sabiduria den mi ku den kualkier otro hende bibu, sino pa e proposito di hasi e interpretashon konosi na rei, i pa bo komprende e pensamentunan di bo kurason.

³¹"Abo, O rei, tabata wak, i mira, tabatin un estatua grandi; e estatua ei, ku tabata grandi i di splendor ekstraordinario, tabata para bo dilanti, i su aparensia tabata teribel.

³²E kabes di e estatua ei tabata traha di oro fini, su pechu i su brasanan di plata, su barika i su belnan di pia di brons,

³³su pal'i pia di heru, su pianan un parti di heru i un parti di klei.

³⁴Bo a sigui wak te ora ku un piedra a wordu korta, no ku man, i esaki a dal e estatua riba su pianan di heru i klei i a garna nan.

³⁵E ora ei e heru, e klei, e brons, e plata i e oro, tur a wordu garna na e mesun momento, i a bira manera bagas riba plenchi-di-bati-mainshi den zomer; i bientu a hiba nan, asina ku no por a hana ni un rastro di nan. Ma e piedra ku a dal e estatua a bira un seru grandi i a yena henter tera.

³⁶"Esaki tabata e sono; awor nos lo duna su interpretashon dilanti di rei.

³⁷Abo, O rei, ta e rei di reinan, na kende e Dios di shelu a duna reino, poder, forsa i gloria;

³⁸i unda ku tin yu di hende ta biba, bestia di mondi i parha di shelu, El a entrega nan den bo man i a hasibo goberna riba nan tur. Abo ta e kabes di oro.

³⁹"I despues di bo lo lanta un otro reino inferior na esun di bo, despues un otro, un di tres reino di brons, ku lo goberna riba henter tera.

⁴⁰E ora ei lo bai tin e di kuater reino ku ta mes fuerte ku heru--pasobra heru ta garna i ta machika tur kos--i manera heru ta kibra tur kos na pida-pida, asina e lo garna i kibra tur esakinan na pida-pida.

⁴¹I ku bo a mira e pianan i e dedenan di pia, un parti di klei di alfarero i un parti di heru, esei ta nifika ku esaki lo ta un reino dividi; ma e lo tin e forsa di heru den dje, komo ku bo a mira e heru meskla ku klei.

⁴²I meskos ku e dedenan di pia tabata pa un parti di heru i pa un parti di klei, asina un parti di e reino lo ta fuerte i un parti lo ta fragil.

⁴³I ku bo a mira e heru meskla ku klei, esei ta nifika ku nan lo meskla ku otro den e simia di hende; ma nan lo no pega na otro, meskos ku heru no ta meskla ku klei.

⁴⁴"I den e dianan di e reinan ei e Dios di shelu lo lanta un reino ku nunka lo no wordu destrui, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.

⁴⁵Meskos ku bo a mira ku un piedra a wordu korta for di e seru, no ku man, i ku esaki a garna e heru, e brons, e klei, e plata i e oro--e gran Dios a hasi konosi na rei kiko ta bai sosode den futuro; asina e sono ta berdat, i su interpretashon ta di konfia."

⁴⁶E ora ei rei Nabukodonosor a tira su kurpa abou ku su kara te na suela i a adora Daniel, i a duna ordu pa presenta na dje un ofrenda i sensia di holo dushi.

⁴⁷Rei a kontesta Daniel i a bisa: "Siguramente bo Dios ta e Dios di diosnan i e Senor di reinan i Esun ku ta revela misterio, ya ku bo por a revela e misterio aki."

⁴⁸E ora ei rei a halsa Daniel i a dun'e hopi regalo grandi, i el a hasie gobernante di henter e provinsia di Babilonia i hefe supremo di tur e sabionan di Babilonia.

⁴⁹I riba petishon di Daniel rei a nombra Sadrak, Mesak i Abed-nego riba e atministrashon di e provinsia di Babilonia, mientras ku Daniel tabata na korte di rei.