Read Papantla Totonac Daniel 3 Bible Online

Daniel 3 - Papantla Totonac bible

Daniel 3

¹Rei Nabukodonosor a traha un imagen di oro, lokual su haltura tabata sesenta kodo i su hanchura seis kodo; el a lant'e den e sabana di Dura, na e provinsia di Babilonia.

²E ora ei rei Nabukodonosor a manda reuni e satrapanan, e ofisialnan i e gobernadonan, e konseheronan, e tesoreronan, e huesnan, e magistradonan i tur e gobernantenan di e provinsianan, pa bin na dedikashon di e imagen ku rei Nabukodonosor a lanta.

³Anto e satrapanan, e ofisialnan i e gobernadonan, e konseheronan, e tesoreronan, e huesnan, e magistradonan i tur e gobernantenan di e provinsianan a wordu reuni pa dedikashon di e imagen ku rei Nabukodonosor a lanta. I nan a para dilanti di e imagen ku Nabukodonosor a lanta.

⁴E ora ei e anunsiado a proklama na bos haltu: "Na boso e ordu ta duna, O pueblonan, nashonnan i hende di tur idioma,

⁵ku na e momento ku boso tende e zonidu di kachu, fluit, tamburein, arpa, salterio, doedelzak i tur sorto di muzik, boso mester tira boso kurpa abou i adora e imagen di oro ku rei Nabukodonosor a lanta.

⁶Ma esun ku no tira su kurpa abou i adora lo wordu tira mesora den un fornu di kandela kayente-kayente."

⁷Pesei, asina ku tur e pueblonan a tende e zonidu di kachu, fluit, tamburein, arpa, salterio, doedelzak i tur sorto di muzik, tur e pueblonan, nashonnan i hendenan di tur idioma a tira nan kurpa abou i a adora e imagen di oro ku rei Nabukodonosor a lanta.

⁸Pesei, na e tempu ei, algun homber kaldeo a bin dilanti i a akusa e hudiunan.

⁹Nan a kontesta rei Nabukodonosor i a bisa: "O rei, biba pa semper!

¹⁰Bo mes, O rei, a saka un dekreto ku tur hende ku tende e zonidu di kachu, fluit, tamburein, arpa, salterio, doedelzak i tur sorto di muzik, mester tira nan kurpa abou i adora e imagen di oro.

¹¹Ma esun ku no tira su kurpa abou i adora lo wordu tira den un fornu di kandela kayente-kayente.

¹²Tin algun hudiu ku bo a enkarga ku atministrashon di e provinsia di Babilonia, esta, Sadrak, Mesak i Abed-nego. E hombernan aki, O rei, no a hasi kaso di bo; nan no ta sirbi bo diosnan ni ta adora e imagen di oro ku bo a lanta."

¹³E ora ei, yen di furia i rabia, Nabukodonosor a duna ordu pa trese Sadrak, Mesak i Abed-nego; anto e hombernan aki a wordu tresi dilanti di rei.

¹⁴Nabukodonosor a kontesta i a bisa nan: "Sadrak, Mesak i Abed-nego, ta berdat ku boso no ta sirbi mi diosnan ni ta adora e imagen di oro ku mi a lanta?

¹⁵Awor si na momento ku boso tende e zonidu di kachu, fluit, tamburein, arpa, salterio, doedelzak i tur sorto di muzik, boso ta dispuesto pa tira boso kurpa abou i adora e imagen ku mi a traha, masha bon. Ma si boso no adora e imagen, boso lo wordu tira mesora den un fornu di kandela kayente-kayente; i ki dios tin ku por libra boso for di mi man?"

¹⁶Sadrak, Mesak i Abed-nego a kontesta i a bisa rei: "O Nabukodonosor, nos no tin mester di dunabo kontesta riba e asunto aki.

¹⁷Ma si t'asina, nos Dios, Kende nos ta sirbi, por libra nos for di e fornu di kandela kayente-kayente, i E lo libra nos for di bo man, O rei.

¹⁸Ma asta si E no hasi esei, sea sigur, O rei, ku nos no ta bai sirbi bo diosnan, ni adora e imagen di oro ku bo a lanta."

¹⁹E ora ei Nabukodonosor a yena ku furia, i e ekspreshon di su kara a kambia pa ku Sadrak, Mesak i Abed-nego. El a kontesta dor di duna ordu pa hasi e fornu shete biaha mas kayente ku kustumber.

²⁰I el a ordena guereronan balente di su ehersito pa mara Sadrak, Mesak i Abed-nego, i tira nan den e fornu di kandela.

²¹Anto e hombernan aki a wordu mara, ku nan mantel, nan karson, nan tulban i ku nan otro pananan bisti, i a wordu tira den e fornu di kandela.

²²Awor, pasobra e ordu di rei tabata asina severo i e fornu a wordu hasi sumamente kayente, flam di e kandela a mata e hombernan ku a hisa Sadrak, Mesak i Abed-nego hiba na e fornu.

²³I e tres hombernan aki, Sadrak, Mesak i Abed-nego, a kai mara den e fornu di kandela.

²⁴E ora ei rei Nabukodonosor a keda masha asombra i a bula lanta; el a bisa su konseheronan: "No ta tres homber nos a tira mara den e kandela?" Nan a kontesta i a bisa rei: "Sigur ku si, O rei."

²⁵El a kontesta i a bisa: "Ata! Mi ta mira kuater homber ta kana los den e kandela sin sufri ningun dano, i aparensia di e di kuater ta manera di un yu homber di e diosnan!"

²⁶E ora ei Nabukodonosor a yega serka di e porta di e fornu di kandela; el a kontesta i a bisa: "Sadrak, Mesak i Abed-nego, boso, sirbidonan di e Dios Haltisimo, sali bin aki!" Anto Sadrak, Mesak i Abed-nego a sali for di meimei di e kandela.

²⁷I e satrapanan, e ofisialnan, e gobernadonan i e konseheronan di rei a bin para ront, i a mira ku e kandela no tabatin ningun efekto riba kurpa di e hombernan aki, ku e kabei riba nan kabes no a kima, ku nan mantel a keda intakto, i ku ni holo di kandela no a keda riba nan kurpa.

²⁸Nabukodonosor a kontesta i a bisa: "Bendishona sea e Dios di Sadrak, Mesak i Abed-nego, Kende a manda Su angel i a libra Su sirbidonan ku a pone nan konfiansa den djé, desobedesiendo e ordu di rei, i ku a entrega nan kurpa pa no sirbi ni adora ningun dios sino nan mes Dios so.

²⁹Pesei mi ta saka un dekreto ku kualke pueblo, nashon of lenga, ku papia algu ofensivo kontra e Dios di Sadrak, Mesak i Abed-nego, lo wordu kuartisa i nan kasnan lo wordu hasi un monton di sushi, pasobra no tin otro dios ku por libra di e manera aki."

³⁰E ora ei rei a hasi Sadrak, Mesak i Abed-nego prospera den e provinsia di Babilonia.