Read Papantla Totonac Daniel 4 Bible Online

Daniel 4 - Papantla Totonac bible

Daniel 4

¹Rei Nabukodonosor, Na tur pueblo, nashon i hende di tur idioma ku ta biba riba henter e tera: "Pas sea multiplika na boso!

²"Mi a hana ku ta bon pa konta boso e senalnan i maraviyanan ku e Dios Haltisimo a hasi pa mi.

³"Ki grandi Su senalnan ta, i ki poderoso Su maraviyanan! Su reino ta un reino eterno, i Su dominio ta di generashon pa generashon.

⁴"Ami, Nabukodonosor, tabata trankil na mi kas i disfrutando di prosperidat den mi palasio.

⁵Mi a mira un sono ku a spantami; i e imaginashonnan aki, mientras ku mi tabata riba mi kama, i e vishonnan ku tabata pasa den mi mente, a keda preokupami.

⁶Pesei mi a duna ordu pa trese tur e sabionan di Babilonia den mi presensia, pa nan dunami e interpretashon di e sono.

⁷E ora ei e magonan, e astrologonan, e kaldeonan i e adivinadonan a drenta, i mi a konta nan e sono, ma nan no por a dunami su interpretashon.

⁸Ma por ultimo Daniel, kende su nomber ta Beltsasar, konforme e nomber di mi dios, i den kende tin e spiritu di e diosnan santu, a presenta mi dilanti, i mi a kont'e e sono, bisando:

⁹'O Beltsasar, hefe di e magonan, komo ku mi sa ku e spiritu di e diosnan santu ta den bo i ku ningun misterio ta problema pa bo, kontami e vishonnan di mi sono ku mi a mira, huntu ku su interpretashon.

¹⁰Awor esakinan tabata e vishonnan ku a pasa den mi mente ora mi tabata riba mi kama: mi tabata wak, i mira, tabatin un palu meimei di tera, i e tabata hopi haltu.

¹¹E palu a krese bira grandi i a bira fuerte, i su top a yega te na shelu, i e tabata visibel te na e fin di henter tera.

¹²Su blachinan tabata bunita i su fruta abundante, i na dje tabatin kuminda pa tur. E bestianan di mondi tabata hana sombra bou di dje, i e parhanan di shelu tabata biba den su ramanan, i tur ser bibu tabata alimenta nan mes for di dje.

¹³'Mi tabata wak den e vishonnan ku tabata pasa den mi mente, mientras ku mi tabata riba mi kama, i mira, un wardado angelikal, un santu, a baha for di shelu.

¹⁴El a dal un gritu i a bisa asin'aki: "Basha e palu abou i kap su ramanan, ranka tur su blachinan i plama su frutanan. Laga e bestianan hui for di bou di dje, i e parhanan for di su ramanan.

¹⁵Ma laga e tronkon ku su rais keda den tera, ku un banchi di heru i brons ront di dje, den e yerba nobo di sabana. "I lagu'e keda muha ku serena di shelu, i lagu'e tin su parti huntu ku e bestianan den e yerba di tera.

¹⁶Laga su mente wordu kambia asina ku e no tin mente di hende mas, i laga un mente di bestia wordu duna na dje, i laga shete periodo di tempu pasa riba dje.

¹⁷"E sentensia aki ta duna pa medio di e dekreto di e wardadonan angelikal, i e desishon ta un ordu di esunnan santu, pa e bibunan por sa ku e Haltisimo ta goberna e reino di hende, i ta duna esaki na esun ku E kier, i ta pone hende di mas umilde riba dje."

¹⁸'Esaki ta e sono ku ami, rei Nabukodonosor, a mira. Awor abo, Beltsasar, dunami su interpretashon, komo ku ningun di e sabionan di mi reino no por dunami e interpretashon; ma abo si por, pasobra e spiritu di e diosnan santu ta den bo.'

¹⁹"E ora ei Daniel, kende su nomber ta Beltsasar, a keda stom pa un momento, i su pensamentunan tabata preokup'e. Rei a kontesta i a bisa: 'Beltsasar, no laga e sono ni su interpretashon preokupabo.' "Beltsasar a kontesta i a bisa: 'Mi senor, mara e sono tabata pa esnan ku ta odiabo, i su interpretashon pa bo atversarionan!

²⁰E palu ku bo a mira, ku a krese bira grandi i fuerte, ku su top a yega te na shelu i tabata visibel te na e fin di tera,

²¹i ku tabatin blachi bunita i fruta na abundansia, i ku tabata provee kuminda pa tur, i protekshon i luga pa e bestianan di mondi, i pa e parhanan di shelu traha nan neishi--

²²ta abo, O rei; pasobra bo a krese bira grandi i fuerte, i bo grandesa a krese yega te na shelu i bo dominio te na e fin di tera.

²³'I ku rei a mira un wardado angelikal, un santu, ta baha for di shelu, bisando: "Basha e palu abou i destruie, ma laga e tronkon ku su raisnan keda den tera, ma ku un banchi di heru i brons ront di dje den e yerba nobo di sabana, i lagu'e keda muha ku serena di shelu, i lagu'e tin su parti huntu ku e bestianan di mondi, te ora shete periodo di tempu pasa riba dje";

²⁴esaki ta e interpretashon, O rei, i esaki ta e dekreto di e Haltisimo, ku a bin riba senor mi rei:

²⁵ku nan lo kore ku bo for di meimei di hende i bo luga di biba lo ta serka e bestianan di mondi, i nan lo dunabo yerba pa kome manera baka, i lo bo wordu muha ku serena di shelu; i shete periodo di tempu lo pasa riba bo, te ora bo rekonose ku e Haltisimo ta goberna e reino di hende, i ta duna esaki na esun ku E kier.

²⁶Anto ku a wordu ordena pa laga e tronkon ku e raisnan di e palu, kier men: bo por ta sigur di bo reino despues ku bo rekonose ku ta Shelu ta goberna.

²⁷Pesei, O rei, laga mi konseho ta aseptabel pa bo: redimi awor bo pikanan dor di hasi hustisia, i bo inikidatnan dor di mustra miserikordia na e pobernan. Podise esei lo prolonga bo prosperidat.'

²⁸"Tur esaki a sosode ku rei Nabukodonosor.

²⁹Diesdos luna despues e tabata kana riba dak di su palasio real na Babilonia.

³⁰Rei a hiba palabra i a bisa: 'Esaki no ta e gran Babilonia ku ami mes a traha komo un residensia real ku e forsa di mi poder i pa e gloria di mi mahestat?'

³¹"Mientras ku e palabra tabata den rei su boka ainda, a bin un bos for di shelu, bisando: 'Rei Nabukodonosor, ta wordu deklara na bo: soberania a wordu kita for di bo,

³²i nan lo kore ku bo for di meimei di hende, i bo luga di biba lo ta serka e bestianan di mondi. Nan lo dunabo yerba pa kome manera baka, i shete periodo di tempu lo pasa sin ku bo sa, te ora bo rekonose ku e Haltisimo tin e dominio den e reino di hende i ta duna esaki na esun ku E kier.'

³³"Mesora e palabra tokante di Nabukodonosor a wordu kumpli, i nan a kore kune for di meimei di hende i el a kuminsa kome yerba manera baka, i su kurpa tabata papa muha di serena di shelu, te ora su kabei a krese bira manera pluma di aguila i su hunanan manera huna di parha.

³⁴"Ma na fin di e periodo ei ami, Nabukodonosor, a hisa kara wak na shelu i mi a bolbe hana mi sinti, i mi a bendishona e Haltisimo i a alaba i a onra Esun ku ta biba pa semper: "Pasobra Su dominio ta un dominio eterno, i Su reino ta dura di generashon pa generashon.

³⁵I tur e habitantenan di tera ta wordu konsidera komo nada, ma E ta hasi segun Su boluntat den e ehersito di shelu i entre e habitantenan di tera; i ningun hende no por detene Su man ni bis'E: 'Kiko Bo a hasi?'

³⁶"E tempu ei mi a bolbe hana mi sinti. I mi mahestat i splendor a bolbe na mi pa e gloria di mi reino, i mi konseheronan i mi nobelnan a kuminsa buskami; asina mi a wordu stables! atrobe den mi reinado, i mi a bira muchu mas grandi ku mi tabata prome.

³⁷Awor ami, Nabukodonosor, ta alaba, ta halsa i ta onra e Rei di shelu, pasobra tur Su obranan ta berdadero i Su kamindanan ta hustu, i E por umiya esnan ku ta kana den orguyo."