Read Papantla Totonac Daniel 5 Bible Online

Daniel 5 - Papantla Totonac bible

Daniel 5

¹Rei Belsasar a tene un gran fiesta pa mil di su nobelnan, i e tabata bebe bina den presensia di e mil.

²Ora Belsasar a purba e bina, el a duna ordu pa trese e artikulonan-di-uzo di oro i di plata ku su tata Nabukodonosor a saka for di e tempel ku tabata na Jerusalem, pa rei i su nobelnan, su esposanan i su konkubinanan bebe for di nan.

³E ora ei nan a trese e artikulonan-di-uzo di oro ku a wordu saka for di e tempel, e kas di Dios ku tabata na Jerusalem; i rei i su nobelnan, su esposanan i su konkubinanan a bebe for di nan.

⁴Nan a bebe bina i a alaba e diosnan di oro i di plata, di brons, di heru, di palu i di piedra.

⁵Direpiente e dedenan di un man di hende a parese i a kuminsa skirbi riba e kalki di muraya di rei su palasio, enfrente di e kandela, i rei a mira e parti di e man ku tabata skirbi.

⁶E ora ei kara di rei a bira blek, i su pensamentunan tabata preokup'e; i e skarnirnan di su hep a bira swak i su rudianan a kuminsa bati kontra otro.

⁷Anto rei a grita duru pa laga e astrologonan, e kaldeonan i e adivinadonan bin serka dje. I rei a hiba palabra i a bisa e sabionan di Babilonia: "Esun ku por lesa e inskripshon aki i dunami su interpretashon, lo wordu bisti na skarlata, ku un kadena di oro na su garganta, i lo tin outoridat komo e di tres gobernante den e reino."

⁸E ora ei tur e sabionan di rei a drenta, ma nan no por a lesa e inskripshon, ni duna rei su interpretashon.

⁹E ora ei rei Belsasar a keda masha preokupa, su kara a bira mas blek ainda, i su nobelnan a keda tur alarma.

¹⁰Reina a drenta e sala di bankete pa motibu di e palabranan di rei i su nobelnan; i reina a bisa: "O rei, biba pa semper! No laga bo pensamentunan preokupabo, ni bo kara bira blek.

¹¹Tin un homber den bo reino den kende tin e spiritu di e diosnan santu; i den e dianan di bo tata a wordu hana den dje iluminashon, komprendementu i sabiduria, manera e sabiduria di e diosnan. I bo tata, rei Nabukodonosor--bo tata, O rei-- a nombr'e komo hefe di e magonan, astrologonan, kaldeonan i adivinadonan.

¹²Esaki tabata pasobra un spiritu ekselente, konosementu i komprendementu, interpretashon di sononan, splikashon di charada i solushon di problema difisil a wordu hana den e Daniel aki, kende rei a yama Beltsasar. Awor laga yama Daniel i e lo duna e interpretashon."

¹³E ora ei Daniel a wordu tres! dilanti di rei. Rei a bisa Daniel: "Ta abo ta e Daniel ei ku ta un di e eksiliadonan di Juda, ku rei, mi tata, a trese for di Juda?

¹⁴Awor mi a tende di bo, ku e spiritu di e diosnan ta den bo, i ku iluminashon, komprendementu i sabiduria ekstraordinario a wordu hana den bo.

¹⁵I awor aki mes e sabionan i e astrologonan a wordu tres! mi dilanti, pa nan lesa e inskripshon aki i dunami su interpretashon, ma nan no por a duna e interpretashon di e mensahe.

¹⁶Ma mi a tende personalmente di bo, ku bo por duna interpretashon i resolve problema difisil. Awor si bo por lesa e inskripshon i interpreta esaki pa mi, lo bo wordu bisti na purpura, ku un kadena di oro na bo garganta, i lo bo tin outoridat komo e di tres gobernante den e reino."

¹⁷E ora ei Daniel a kontesta i a bisa dilanti di rei: "Tene bo regalonan pa bo mes, of duna otro hende bo rekompensanan. Sinembargo, lo mi lesa e inskripshon pa rei i interpreta esaki p'e.

¹⁸"O rei, e Dios Haltisimo a duna bo tata Nabukodonosor soberania, grandesa, gloria i mahestat.

¹⁹I pa motibu di e grandesa ku El a pone riba dje, tur pueblo, nashon i hende di tur idioma tabatin miedu i tabata tembla su dilanti; esun ku e kier a mata, el a mata, i esun ku e kier a laga na bida, el a laga na bida; i esun ku e kier a halsa, el a halsa, i esun ku e kier a umiya, el a umiya.

²⁰Ma ora su kurason a halsa i su spiritu a bira asina orguyoso ku e tabata komporta su mes ku arogansia, el a wordu baha for di su trono real, i su gloria a wordu kita for di dje.

²¹Tambe nan a kore kune for di meimei di hende i su mente a bira manera mente di bestia, i su luga di biba tabata serka e burikunan di mondi. El a hana yerba pa kome manera baka, i tur ora bai su kurpa tabata papa muha di serena di shelu, te ora ku el a rekonose ku e Dios Haltisimo tin e dominio den e reino di hende, i ku E ta pone esun ku E kier riba dje.

²²"Tog abo, su yu homber Belsasar, no a umiya bo kurason, ounke ku bo tabata sa tur esaki,

²³ma bo a halsa bo mes kontra e Senor di shelu; i nan a trese e artikulonan-di-uzo di Su kas bo dilanti, i abo i bo nobelnan, bo esposanan i bo konkubinanan tabata bebe bina for di nan; i bo a alaba e diosnan di plata i di oro, di brons, di heru, di palu i di piedra, ku no ta mira, ni tende ni komprende. Ma e Dios, den Kende Su man bo rosea di bida i bo kamindanan ta, bo no a glorifika.

²⁴E ora ei El a manda e man ku a skirbi e inskripshon aki.

²⁵"Awor esaki ta e inskripshon ku a wordu skirbi: 'MENE, MENE, TEKEL, UFARSIN.'

²⁶"Esaki ta e interpretashon di e mensahe: 'MENE'--Dios a konta e dianan di bo reino i a pone un fin na dje.

²⁷'TEKEL'--bo a wordu pisa den balansa i bo ta pisa muchu poko.

²⁸'PERES'--bo reino a wordu dividi i duna na e medonan i personan."

²⁹E ora ei Belsasar a duna ordu, i nan a bisti Daniel na skarlata i a pone un kadena di oro na su garganta, i a saka un proklamashon tokante di dje, ku e tabatin outoridat awor komo e di tres gobernante den e reino.

³⁰E mes anochi ei Belsasar, rei di e kaldeonan, a wordu mata.

³¹Asina Dario, e medo, a tuma e reino na edat di mas o menos sesent'i dos ana.