Read Papantla Totonac Daniel 6 Bible Online

Daniel 6 - Papantla Totonac bible

Daniel 6

¹Dario a hana bon pa nombra shent'i binti satrapa riba e reino, pa nan keda enkarga ku henter e reino,

²i riba nan el a nombra tres gobernado (di kendenan Daniel tabata un), na kendenan e satrapanan aki mester a duna kuenta, pa rei no sufri pierde.

³Anto e Daniel aki a kuminsa distingui su mes entre e gobernadonan i satrapanan, pasobra tabatin un spiritu ekstraordinario den dje, i rei tabatin pensa pa nombr'e riba henter e reino.

⁴E ora ei e gobernadonan i satrapanan a kuminsa purba di hana un motibu pa akusa Daniel en relashon ku e asuntonan di gobernashon, ma nan no por a hana ningun motibu di akusashon, ni prueba di korupshon, pasobra e tabata fiel, i den dje no por a hana negligensia ni korupshon.

⁵E ora ei e hombernan aki a bisa: "Nos lo no hana ningun motibu di akusashon kontra e Daniel aki, si nos no hana esaki en relashon ku e lei di su Dios."

⁶E ora ei e gobernadonan i e satrapanan aki a bin huntu serka rei i a bis'e asin'aki: "Rei Dario, biba pa semper!

⁷Tur e gobernadonan di e reino, e diputadonan i e satrapanan, e konseheronan i e gobernantenan a konsulta huntu, ku rei mester stablese un statuto i proklama un dekreto firme, ku esun ku durante di trinta dia hasi un petishon na kualke dios of hende fuera di bo, O rei, lo wordu tira den kueba di leon.

⁸Awor, O rei, proklama e dekreto i firma e dokumento pa e no por wordu kambia, konforme e lei di e medonan i personan, ku no por wordu revoka."

⁹Pesei rei Dario a firma e dokumento, esta, e dekreto.

¹⁰Awor ora Daniel a hana sa ku e dokumento a wordu firma, el a bai den su kas (awor den su kamber ariba e tabatin bentananan habri den direkshon di Jerusalem); i el a sigui hinka rudia tres biaha pa dia, i a hasi orashon i a duna gradisimentu dilanti di su Dios, manera e tabata hasi anteriormente.

¹¹E ora ei e hombernan aki a bin huntu i a hana Daniel ta hasi petishon i suplika dilanti di su Dios.

¹²Anto nan a bai dilanti di rei i a papia tokante di e dekreto di rei: "Bo no a firma un dekreto, ku esun ku durante di trinta dia hasi un petishon na kualke dios of hende fuera di bo, O rei, lo wordu tira den kueba di leon?" I rei a kontesta i a bisa: "E deklarashon ta berdat, konforme e lei di e medonan i personan, ku no por wordu revoka."

¹³Anto nan a kontesta i a bisa dilanti di rei: "Daniel, kende ta un di e eksiliadonan di Juda, no ta hasi kaso di bo, O rei, ni di e dekreto ku bo a firma, ma ta sigui hasi su petishon tres biaha pa dia."

¹⁴Anto asina ku rei a tende e deklarashon aki, a duel e masha loke ku el a hasi, i el a propone den su kurason pa libra Daniel; i te ora ku solo a drenta el a hasi tur su posibel pa reskat'e.

¹⁵E ora ei e hombernan aki a bin huntu serka rei i a bisa rei: "Korda, O rei, ku ta un lei di e medonan i personan ku ningun dekreto ni statuto ku rei stablese no por wordu kambia."

¹⁶E ora ei rei a duna ordu, i nan a trese Daniel i a tir'e den kueba di leon. I rei a bisa Daniel: "Bo Dios ku bo ta sirbi konstantemente, E mes lo librabo."

¹⁷I nan a trese un piedra i a tapa boka di e kueba; i rei a sey'e ku su mes renchi-di-seyo i ku e renchinan-di-seyo di su nobelnan, pa ningun kambio no wordu hasi relashona ku Daniel su situashon.

¹⁸Despues rei a bai bek na su palasio i a pasa nochi na yuna, i nan no a trese ningun dibertishon su dilanti, i su sono a bai lagu'e.

¹⁹Anto rei a lanta mainta tempran, ora dia tabata habri, i a bai pura na e kueba di leon.

²⁰I ora ku el a yega serka Daniel na e kueba, el a grita ku bos tristu. I rei a bisa Daniel: "Daniel, sirbido di e Dios bibu, bo Dios, Kende bo ta sirbi konstantemente lo por a librabo di e leonnan?"

²¹E ora ei Daniel a bisa rei: "O rei, biba pa semper!

²²Mi Dios a manda Su angel i a sera boka di e leonnan, i nan no a hasimi dano, pasobra mi a wordu hana inosente Su dilanti; i tambe kontra bo, O rei, mi no a komete ningun krimen."

²³E ora ei rei a keda masha kontentu i a duna ordu pa saka Daniel for di e kueba. Asina nan a saka Daniel for di e kueba, i ningun dano no a wordu hana na su kurpa, pasobra el a konfia den su Dios.

²⁴I rei a duna ordu, i nan a trese e hombernan ei ku a akusa Daniel ku mal intenshon, i nan a tira nan, nan yunan i nan esposanan den e kueba di leon; i prome ku nan a yega fondo di e kueba e leonnan a podera di nan i a garna tur nan wesunan.

²⁵E ora ei rei Dario a skirbi tur pueblo, nashon i hende di tur idioma ku tabata biba den henter e tera: "Ku pas sea multiplika na boso!

²⁶"Mi ta traha un dekreto ku den henter e dominio di mi reino hende mester teme i tembla dilanti di e Dios di Daniel. "Pasobra E ta e Dios bibu, i E ta permanese pa semper, i Su reino ta uno ku lo no wordu destrui, i Su dominio lo ta pa semper.

²⁷E ta libra i ta reskata i ta hasi senalnan i maraviyanan den shelu i riba tera. Ta El a libra Daniel tambe for di e poder di e leonnan."

²⁸Asina e Daniel aki a prospera den e reino di Dario i den e reino di Siro di Persia.