Read Papantla Totonac Daniel 7 Bible Online

Daniel 7 - Papantla Totonac bible

Daniel 7

¹Den e prome ana di Belsasar, rei di Babilonia, Daniel a mira un sono i vishonnan den su mente, mientras ku e tabata riba su kama; anto el a skirbi e sono i a duna e siguiente resumen di dje.

²Daniel a bisa: "Anochi mi tabata wak den mi vishon, i mira, e kuater bientunan di shelu tabata turbula e laman grandi.

³I kuater bestia grandi tabata subi sali for di laman, kada un tabata diferente for di otro.

⁴"E prome tabata manera un leon i tabatin hala di aguila. Mi a sigui wak te ora su halanan a wordu ranka afo, i el a wordu hisa for di suela i poni riba dos pia manera hende; tambe a wordu duna na dje un mente humano.

⁵"I mira, un otro bestia, e di dos, tabata parse un ber. E tabata sinta di banda, i e tabatin tres repchi den su boka entre su djentenan; i asina nan a bis'e: 'Lanta, devora hopi karni!'

⁶"Despues di esaki mi a sigui wak, i mira, un otro bestia manera un leopardo, ku tabatin kuater hala di parha riba su lomba; tambe e bestia tabatin kuater kabes, i dominio a wordu duna na dje.

⁷"Despues di esaki mi a sigui wak den e vishonnan di anochi, i ata e di kuater bestia, spantoso i teribel i sumamente fuerte; i e tabatin djente grandi di heru. El a devora i a garna, i ku su pianan el a trapa loke a keda; i e tabata diferente for di tur e bestianan ku tabata prome kune, i e tabatin dies kachu.

⁸"Mientras ku mi tabata kontempla e kachunan, at'un otro kachu, un chikitu, a sali meimei di nan, i tres di e prome kachunan a wordu ranka ku rais ku tur su dilanti; i ata e kachu aki tabatin wowo manera wowo di hende, i un boka ku tabata gaba masha.

⁹"Mi a sigui wak te ora trononan a wordu poni, i e Ansiano di Dianan a tuma Su asiento. Su pana tabata blanku manera sneu, i e kabei riba Su kabes manera lana puru. Su trono tabata tur na flam di kandela, i su wilnan tabata un kandela ku ta kima.

¹⁰Un riu di kandela tabata kore i tabata sali for di Su dilanti; miles i miles tabata sirbié, i dies mil biaha dies mil tabata para Su dilanti; e korte a sinta, i e bukinan a wordu habri.

¹¹"E ora ei mi a sigui wak pa motibu di e zonidu di e palabranan di gabamentu ku e kachu tabata papia; mi a sigui wak te ora ku e bestia a wordu mata, i su kurpa a wordu destrui i entrega na e kandela ku ta kima.

¹²Pa loke ta e otro bestianan, nan dominio a wordu kita, ma nan bida a wordu prolonga pa un periodo di tempu stipula.

¹³"Mi a sigui wak den e vishon di anochi, i mira, ku e nubianan di shelu tabata bin Uno manera un Yu di Hende, i El a bin serka e Ansiano di Dianan i a wordu presenta Su dilanti.

¹⁴I na djé a wordu duna dominio, gloria i un reino, pa tur pueblo, nashon i hende di tur idioma por sirbié. Su dominio ta un dominio eterno ku lo no pasa nunka, i Su reino ta un ku lo no wordu destrui.

¹⁵"Pa loke t'ami, Daniel, mi spiritu a keda afligi den mi, i e vishonnan den mi mente a keda preokupami.

¹⁶Mi a aserka un di esnan ku tabata para einan i a kuminsa puntr'e e nifikashon eksakto di tur esaki. "Asina el a bisami i a interpreta e kosnan aki pa mi.

¹⁷'E kuater bestianan grandi aki ta kuater rei ku lo lanta for di e tera.

¹⁸Ma e santunan di e Haltisimo lo risibi e reino i posee e reino pa semper, pa tur siglo ku ta bin.'

¹⁹"E ora ei mi tabata kier sa e nifikashon eksakto di e di kuater bestia, ku tabata diferente for di tur e otronan, masha spantoso mes, ku su djentenan di heru i su hunanan di brons, i ku tabata devora, garna i trapa ku su pianan loke sobra,

²⁰i nifikashon di e dies kachunan ku tabatin riba su kabes, i e otro kachu ku a sali, i dilanti di kual tres di nan a kai, esta, e kachu ei ku tabatin wowo i un boka ku tabata gaba masha, i ku tabata parse mas grandi ku su sosionan.

²¹Mi a sigui wak i e kachu ei tabata hasi guera kontra e santunan i tabata vense nan,

²²te ora ku e Ansiano di Dianan a bin, i huisio a wordu duna na fabor di e santunan di e Haltisimo, i e tempu a yega ku e santunan a podera di e reino.

²³"Asina el a bisa: 'E di kuater bestia lo ta e di kuater reino riba tera, ku lo ta diferente for di tur e otro reinonan, i esaki lo devora henter e tera, trap'e i garn'e.

²⁴Pa loke ta e dies kachunan, for di e reino aki dies rei lo lanta; i un otro lo lanta despues di nan, i e lo ta diferente for di esnan prome i lo hasi tres rei somete nan mes.

²⁵I e lo papia kontra e Haltisimo i lo persigui e santunan di e Haltisimo, i e lo purba di hasi kambio den tempunan i den lei; i e santunan lo wordu entrega den su man pa un tempu, tempunan i mitar di un tempu.

²⁶'Ma e korte lo sinta pa huzga, i su dominio lo wordu kita, elimina i destrui pa semper.

²⁷E ora ei e soberania, e dominio i e grandesa di tur e reinonan bou di henter shelu lo wordu duna na e pueblo di e santunan di e Haltisimo; Su reino lo ta un reino eterno, i tur e dominionan lo sirbié i obedes'E.'

²⁸"Aki e revelashon a termina. Pa loke t'ami, Daniel, mi pensamentunan tabata preokupami masha, i mi kara a bira blek, ma mi a tene e asunto pa mi mes."