Read Papantla Totonac Daniel 8 Bible Online

Daniel 8 - Papantla Totonac bible

Daniel 8

¹Den e di tres ana di e reinado di rei Belsasar a parese na ami, Daniel, un vishon, despues di esun ku a parese na mi anteriormente.

²I mi a wak den e vishon, i a sosode ku mientras mi tabata wak, mi tabata den e sitadel di Susa, ku ta keda den e provinsia di Elam; i mi a wak den e vishon ku mi tabata banda di Riu Ulai.

³Anto mi a hisa mi kara wak, i mira, un karne chubatu, ku tabatin dos kachu, tabata para dilanti di e riu. Awor e dos kachunan tabata largu, ma esun tabata mas largu ku e otro, i esun mas largu a sali ultimo.

⁴Mi a mira e karne chubatu ta kacha pabou, panort i pasuit, i ningun otro bestia no por a para su dilanti; tampoko no tabatin ni un ku por a libra for di su poder; ma e tabata hasi manera e tabata kier i e tabata halsa su mes.

⁵Mientras ku mi tabata opserva, ata un kabritu chubatu tabata bin di pabou riba superfisio di henter e tera, sin toka suela; i e kabritu chubatu tabatin un kachu masha riparabel meimei di su wowonan.

⁶I el a bin serka e karne chubatu ku tabatin e dos kachunan, i ku mi a mira para dilanti di e riu; i el a kore bin riba dje den su gran furia.

⁷I mi a mir'e ta bin banda di e karne chubatu, i e tabata furioso riba dje; i el a dal e karne chubatu i a kibra su dos kachunan na pida-pida, i e karne chubatu no tabatin forsa pa resistie. Asina el a tir'e abou na suela i a trapa riba dje, i no tabatin ningun hende pa libra e karne chubatu for di su poder.

⁸Anto e kabritu chubatu a engrandese su mes masha hopi mes. Ma asina ku el a bira poderoso, e kachu largu a kibra; i na su luga a sali kuater kachu masha riparabel den direkshon di e kuater bientunan di shelu.

⁹I for di un di nan a sali un kachu chikitu ku a krese bira masha grandi mes den direkshon suit, den direkshon pariba i den direkshon di e Tera Bunita.

¹⁰I el a krese bai te na e ehersito di shelu i a hasi parti di e ehersito i parti di e streanan kai na tera, i el a trapa riba nan.

¹¹Asta el a halsa su mes pa ta igual ku e Komandante di e ehersito; i el a kita e sakrifisio di tur dia for di djé, i e luga di Su santuario a wordu benta abou.

¹²I pa motibu di transgreshon e ehersito lo wordu entrega na e kachu, huntu ku e sakrifisio di tur dia; i e lo benta berdat abou na suela i lo hasi loke e kier, i lo prospera.

¹³E ora ei mi a tende un santu ta papia, i un otro santu a bisa esun ei ku tabata papia: "Kuantu tempu e vishon di e sakrifisio di tur dia lo dura, mientras ku e transgreshon ta kousa horor, pa permiti pa tantu e luga santu komo e ehersito wordu trapa?"

¹⁴I el a bisami: "Dos mil tres shen anochi i mainta; e ora ei e luga santu lo wordu purifika."

¹⁵I a sosode ku ora ami, Daniel, a mira e vishon, mi a purba di komprende esaki; i mira, tabatin un persona para mi dilanti ku tabata parse un homber.

¹⁶I mi a tende bos di un homber meimei di e oriyanan di Ulai, i el a grita bisa: "Gabriel, hasi e homber aki komprende e vishon."

¹⁷I el a hala serka di kaminda mi tabata para, i ora ku el a bin mi a hana miedu i a tira mi kurpa abou ku mi kara te na suela; ma el a bisami: "Yu di hende, komprende ku e vishon tin di hasi ku e tempu di e fin."

¹⁸Awor mientras ku e tabata papia ku mi, mi a pega un sono profundo ku mi kara na suela; ma el a mishi ku mi i a hasimi para riba mi pia.

¹⁹I el a bisa: "Mira, mi ta bai lagabo sa kiko lo sosode na e periodo final di e indignashon, pasobra e tin di hasi ku e tempu stipula di e fin.

²⁰E karne chubatu ku bo a mira ku e dos kachunan ta representa e reinan di Media i Persia.

²¹I e kabritu chubatu yen di lana ta representa e reino di Gresia, i e kachu grandi meimei di su wowonan ta e prome rei.

²²I e kachu kibra i e kuater kachunan ku a sali na su luga ta representa kuater reino ku lo lanta for di su nashon, ma no ku su poder.

²³"I durante di e ultimo periodo di nan reinado, ora ku e transgresornan a yega na e kolmo di nan maldat, un rei lo lanta, insolente i eksperto den trahamentu di komplot.

²⁴I e lo bira masha poderoso, ma no dor di su mes poder, i e lo destrui na un manera ekstraordinario i lo prospera i lo hasi loke e kier; e lo destrui hombernan poderoso i e pueblo santu.

²⁵I dor di su astusia e lo hasi engano prospera bou di su influensia. I e lo halsa su mes den su kurason, i e lo destrui hopi, mientras ku nan ta trankil di nan. Tambe e lo lanta kontra e Prens di prensnan, ma e lo wordu kibra, i no ku man di hende.

²⁶"I e vishon di e anochinan i e maintanan, ku a wordu duna na bo, ta berdat. Ma tene e vishon sekreto, pasobra e tin di hasi ku hopi dianan den futuro."

²⁷Anto ami, Daniel, a keda agota i malu pa dianan largu. E ora ei mi a lanta atrobe i a sigui ku e asuntonan di rei, ma e vishon a lagami tur babuka, i no tabatin ningun hende pa duna splikashon di dje.