Read Papantla Totonac Daniel 9 Bible Online

Daniel 9 - Papantla Totonac bible

Daniel 9

¹Den e prome ana di Dario, yu homber di Asuero, desendiente di Media, kende a wordu hasi rei riba e reino di e kaldeonan--

²den e prome ana di su reinado, ami, Daniel, a opserva den e bukinan e kantidat di ana ku a wordu revela komo e palabra di SENOR na profeta Jeremias, pa e kumplimentu di e desolashonnan di Jerusalem, esta, setenta ana.

³Asina mi a pone atenshon na Senor Dios pa busk'E pa medio di orashon i suplika, ku yunamentu, pana-di-saku i shinishi.

⁴I mi a hasi orashon na SENOR mi Dios i a konfesa i a bisa: "Ai Senor, e Dios grandi i temibel, Kende ta warda Su aliansa i miserikordia pa ku esnan ku ta stim'E i ta warda Su mandamentunan;

⁵nos a peka, a komete inikidat, a hasi maldat i a rebeldia, asta a bandona Bo mandamentunan i ordenansanan.

⁶Ademas, nos no a skucha Bo sirbidonan, e profetanan, kendenan a papia den Bo nomber ku nos reinan, nos prensnan, nos tatanan, i ku henter e pueblo di e tera.

⁷"Hustisia ta pertenese na Bo, O Senor, ma na nos un kara yen di berguensa, manera ta riba dia djawe--na e hombernan di Juda, na e habitantenan di Jerusalem i na henter Israel, na esnan ku ta serka i na esnan ku ta leu, den tur e paisnan pa unda Bo a kore ku nan manda nan bai, pa motibu di nan echonan infiel ku nan a komete kontra Bo.

⁸O Senor, nos kara, i kara di nos reinan, nos prensnan i nos tatanan ta yen di berguensa, pasobra nos a peka kontra Bo.

⁹Serka Senor nos Dios tin kompashon i pordon, maske nos a rebeldia kontra djé,

¹⁰i no a obedese e bos di SENOR nos Dios, pa kana den Su leinan ku El a pone nos dilanti pa medio di Su sirbidonan, e profetanan.

¹¹Di berdat, henter Israel a transgresa Bo lei i a desvia dor di no obedese Bo bos. "Pesei e maldishon a wordu drama riba nos, huntu ku e huramentu ku ta para skirbi den e lei di Moises, e sirbido di Dios, pasobra nos a peka kontra djé.

¹²Asina El a konfirma Su palabranan ku El a papia kontra nos i kontra nos gobernantenan ku tabata goberna nos, pa trese gran kalamidat riba nos; pasobra bou di henter shelu nada no a wordu hasi manera loke a wordu hasi kontra Jerusalem.

¹³Manera ta para skirbi den e lei di Moises, tur e kalamidat aki a bin riba nos; tog nos no a buska e fabor di SENOR nos Dios dor di bira for di nos inikidat i duna atenshon na Bo berdat.

¹⁴Pesei SENOR a tene e kalamidat warda i a tres'e riba nos; pasobra SENOR nos Dios ta hustu den tur Su echonan ku El a hasi, ma nos no a obedese Su bos.

¹⁵"I awor, O Senor nos Dios, Kende a saka Bo pueblo for di tera di Egipto ku un man poderoso i a traha un nomber pa Bo mes, manera ta riba dia djawe--nos a peka, nos tabata malbado.

¹⁶O Senor, konforme tur Bo echonan hustu, laga awor Bo rabia i Bo furia wordu kita for di riba Bo stat Jerusalem, Bo sera santu; pasobra pa motibu di nos pikanan i e inikidatnan di nos tatanan, Jerusalem i Bo pueblo a bira un reproche pa tur esnan ku ta ront di nos.

¹⁷"Awor nos Dios, skucha e orashon di Bo sirbido i su suplikanan, i pa Bo kousa, O Senor, laga Bo kara resplandese riba Bo santuario desola.

¹⁸O mi Dios, inklina Bo orea i tende! Habri Bo wowo i mira nos desolashonnan i e stat ku ta wordu yama na Bo nomber; pasobra nos no ta presenta nos suplikanan Bo dilanti a base di kualke merito di nos mes, ma a base di Bo gran kompashon.

¹⁹O Senor, tende! O Senor, pordona! O Senor, skucha i aktua! Pa Bo mes kousa, O mi Dios, no tarda, pasobra Bo stat i Bo pueblo ta wordu yama na Bo nomber."

²⁰Awor mientras mi tabata papia i hasi orashon i konfesa mi pika i e pika di mi pueblo Israel, i tabata presenta mi suplika dilanti di SENOR mi Dios na fabor di e sera santu di mi Dios,

²¹mientras mi tabata papia ainda den orashon, e homber Gabriel, kende mi a mira den e vishon anteriormente, a bin serka mi ora mi tabata morto kansa na e ora di e ofrenda di atardi.

²²I el a dunami instrukshon i a papia ku mi, i a bisa: "O Daniel, awor mi a bin pa dunabo disernimentu i komprendementu.

²³Na kuminsamentu di bo suplikanan e ordu a wordu duna, i mi a bin pa kontabo esaki, pasobra bo ta masha stima; asina, paga tino na e mensahe i komprende e vishon.

²⁴"Setenta siman a wordu stipula pa bo pueblo i bo stat santu, pa termina e transgreshon, pa pone un fin na pika, pa hasi ekspiashon pa inikidat, pa trese hustisia eterno, pa seya vishon i profesia, i pa ungi e luga santisimo.

²⁵"Sabi anto i komprende ku for di e momento ku e ordu a wordu duna pa restora i rekonstrui Jerusalem te na e Mesias, e Prens, lo tin shete siman i sesent'i dos siman; e lo wordu traha atrobe, ku kaya i roi, den tempu di angustia.

²⁶Anto despues di e sesent'i dos simannan e Mesias lo wordu korta kita afo, i lo no tin nada, i e pueblo di e prens ku lo bin lo destrui e stat i e santuario. I su fin lo bin ku un diluvio; te na fin lo tin guera; i desolashonnan ta determina.

²⁷I e lo hasi un aliansa firme ku hopi hende pa un siman, ma meimei di e siman e lo pone un fin na sakrifisio i ofrenda di mainshi; i riba hala di abominashonnan lo bin un ku ta trese desolashon te na un destrukshon kompleto, un ku ta wordu dekreta, ta wordu drama riba esun ku ta trese desolashon."