Read Papantla Totonac Oseas 10 Bible Online

Oseas 10 - Papantla Totonac bible

Oseas 10

¹Israel ta un mata di wendruif karga; e ta produsi fruta pa su mes. Mas fruta e karga, mas altar e ta traha; mas riku su tera bira, mas miho ainda e ta traha e pilarnan sagrado.

²Nan kurason ta infiel; awor nan mester karga nan kulpa. SENOR lo kibra nan altarnan bash'abou i destrui nan pilarnan sagrado.

³Siguramente awor nan lo bisa: "Nos no tin rei, pasobra nos no ta teme SENOR. Pa loke ta e rei, kiko e por hasi pa nos?"

⁴Nan ta papia palabranan bashi; ku huramentu sin balor nan ta sera aliansa; i huzgamentu ta spreit manera yerba venenoso den e hoyonan di e kunuku geplug.

⁵E habitantenan di Samaria ta preokupa pa e bishe di Bet-aven. Di berdat, su pueblo lo tene rou p'e, i su saserdotenan di idolatria lo grita yora p'e, pasobra su gloria a bai for di dje.

⁶E kos mes lo wordu hiba na Asiria komo tributo pa rei Jareb; Efrain lo hana masha berguensa i Israel lo tin berguensa di su mes konseho.

⁷Samaria lo wordu korta kita afo huntu ku su rei, manera un pida palu riba superfisio di awa.

⁸Tambe e luganan haltu di Aven, e pika di Israel, lo wordu destrui; sumpina i kadushi lo krese riba nan altarnan. E ora ei nan lo bisa e serunan: "Tapa nos!" i e seritunan: "Kai riba nos!"

⁹"For di e dianan di Gabaa boso a peka, O Israel; aya nan ta keda para! E bataya kontra e yunan di inikidat lo no alkansa nan na Gabaa?

¹⁰Ora Mi kier, lo Mi kastiga nan; i e pueblonan lo wordu reuni kontra nan ora nan keda mara pa motibu di nan pika dobel.

¹¹I Efrain ta un bishe muhe entrena, ku ta gusta bati mainshi. Ma lo Mi pone un yugo riba su nek bunita; lo Mi bisti Efrain un harnas; Juda lo plug; Jakob lo ara pa su mes.

¹²Sembra den hustisia, kosecha den miserikordia; prepara bo tera ku no ta kultiva, pasobra ta tempu pa buska SENOR, te ora ku E bin i yobe hustisia riba boso.

¹³Boso a plug maldat, boso a kosecha inhustisia, boso a kome e fruta di mentira. Pasobra boso a konfia den boso mes kaminda, den boso guereronan numeroso,

¹⁴un tumulto di bataya lo lanta meimei di bo pueblo, i tur bo fortinan lo wordu destrui manera Salman a destrui Bet-arbel riba e dia di bataya, tempu ku e mamanan a wordu gespat na pida-pida huntu ku nan yunan.

¹⁵Asina lo sosode ku boso na Bet-el, pa motibu di boso gran maldat. Ora dia habri rei di Israel lo wordu korta kita afo kompletamente.