Read Papantla Totonac Oseas 2 Bible Online

Oseas 2 - Papantla Totonac bible

Oseas 2

¹Bisa boso ruman hombernan: "Ammi," i boso ruman muhenan: "Ruhama."

²"Pleita ku boso mama, si, pleita, pasobra e no ta Mi esposa, i Ami no ta su Esposo; i lagu'e kita su prostitushon for di su kara, i su adulterio for di meimei di su pechunan,

³pa Mi no kit'e sunu i ekspon'e manera riba e dia ku el a nase. Lo Mi hasie manera un desierto, hasie manera tera seku, i mat'e ku set.

⁴Lo Mi no tin kompashon ku su yunan, pasobra nan ta yunan di prostitushon.

⁵Pasobra nan mama a bira prostituta; esun ku a konsebi nan a aktua na manera bergonsoso. Pasobra el a bisa: 'Lo mi bai tras di mi amantenan, kendenan ta dunami mi pan i mi awa, mi lana i mi lino, mi zeta i mi bibida.'

⁶Pesei mira, lo Mi sera su kaminda ku sumpina; i lo Mi traha un muraya kontra dje, asina ku e no por hana su berehanan.

⁷I e lo kore tras di su amantenan, ma e lo no alkansa nan; i e lo buska nan, ma lo no hana nan. E ora ei e lo bisa: 'Lo mi bai bek serka mi prome esposo, pasobra e tempu ei tabata miho pa mi ku awor!'

⁸Pasobra e no sa ku ta Ami a dun'e e mainshi, e bina nobo i e zeta, i ku ta Ami a kubrie ku plata i oro, ku nan a uza pa Baal.

⁹"Pesei lo Mi tuma Mi mainshi bek na e tempu di kosecha i Mi bina nobo ora ku e ta kla. Tambe lo Mi tuma Mi lana i Mi lino, duna pa tapa su sunu.

¹⁰I e ora ei lo Mi ekspone su berguensa den bista di su amantenan, i ningun hende lo no reskat'e for di Mi man.

¹¹Tambe lo Mi pone un fin na tur su alegria, su dianan di fiesta, su lunanan nobo, su sabatnan, i tur su asambleanan festivo.

¹²I lo Mi destrui su matanan di wendruif i su palunan di figo, di kualnan el a bisa: 'Esakinan ta mi pago ku mi amantenan a dunami.' I lo Mi hasi nan bira un mondi-sera, i e bestianan di mondi lo devora nan.

¹³I lo Mi kastigu'e pa e dianan di e Baalnan, tempu ku e tabata ofrese sakrifisio na nan i dorna su mes ku su renchinan di orea i su hoyanan, i sigui su amantenan, asina ku el a lubidaMi," SENOR ta deklara.

¹⁴"Pesei mira, lo Mi lok e, tres'e den desierto i papia karinosamente kune.

¹⁵Anto ayanan lo Mi dun'e su kunukunan di wendruif, i e vaye di Akor komo un porta di speransa. I ayanan e lo kanta manera den e dianan di su hubentut, manera den e dia ku el a sali for di tera di Egipto.

¹⁶"I lo sosode den e dia ei," SENOR ta deklara, "ku boso lo yamaMi Ishi i lo no yamaMi Baali mas.

¹⁷Pasobra lo Mi kita e nombernan di e Baalnan for di su boka, asina ku nan lo no wordu menshona na nan nomber mas.

¹⁸Den e dia ei lo Mi traha tambe un aliansa pa nan ku e bestianan di mondi, e parhanan di shelu i e bestianan ku ta lastra abou na suela. I lo Mi kita bog, spada i guera for di riba tera, i lo hasi nan drumi den siguridat.

¹⁹I lo Mi tumabo komo Mi esposa pa semper; si, lo Mi tumabo komo Mi esposa den rektitut i hustisia, den miserikordia i den kompashon.

²⁰I den fieldat lo Mi tumabo komo Mi esposa; e ora ei lo bo konose SENOR.

²¹"I lo sosode ku den e dia ei lo Mi kontesta," SENOR ta deklara. "Lo Mi kontesta e shelunan, i nan lo kontesta e tera.

²²E tera lo kontesta e mainshi, e bina nobo i e zeta, i nan lo kontesta Jezreel.

²³I lo Mi sembr'e pa Mi mes den e tera. Tambe lo Mi tin kompashon ku esun ku no a hana kompashon, i lo Mi bisa esnan ku no tabata Mi pueblo: 'Boso ta Mi pueblo!' I nan lo bisa: 'Bo ta mi Dios!'"