Read Papantla Totonac Joel 1 Bible Online

Joel 1 - Papantla Totonac bible

Joel 1

¹E palabra di SENOR ku a yega na Joel, yu homber di Petuel.

²Tende esaki, O ansianonan, i skucha, tur habitante di e tera. Algu asina a yega di sosode den boso dianan of den e dianan di boso tatanan?

³Konta boso yunan di esaki, i laga boso yunan konta nan yunan, i nan yunan konta e siguiente generashon.

⁴Loke ku e tirakochi ku ta kou a laga, e tirakochi ku ta kriul den otro a kome; i loke ku e tirakochi ku ta kriul den otro a laga, e tirakochi ku ta lastra a kome; i loke ku e tirakochi ku ta lastra a laga, e tirakochi ku ta pela laga limpi-limpi a kome.

⁵Lanta, burachenan, i yora; i lamenta, boso tur bebedonan di bina, pa motibu di e bina dushi ku a wordu kita for di boso boka.

⁶Pasobra un nashon a invadi mi tera, poderoso i inkontabel; su djentenan ta djente di leon, e tin djente di leon muhe.

⁷El a distribi mi mata di wendruif, i a kaba ku mi palu di figo. El a pela nan kaska tir'afo; nan takinan a keda blanku-blanku.

⁸Grita yora manera un birgen faha ku pana-di-saku ta grita yora pa e bruidehom di su hubentut.

⁹E ofrenda di mainshi i e ofrenda di bibida a wordu korta kita for di e kas di SENOR. E saserdotenan ta tene rou, e sirbidonan di SENOR.

¹⁰E kunuku ta keda ruina, e tera ta lamenta, pasobra e mainshi ta keda ruina, e bina nobo ta seka, zeta fresku ta bai perdi.

¹¹Tene berguensa, O kunukeronan, grita yora, O kuidadonan di kunuku di wendruif, pa e trigo i e puspas; pasobra e kosecha di kunuku a wordu destrui.

¹²E mata di wendruif ta seka, e palu di figo ta bai perdi, e palu di granatapel, e palma tambe, i e palu di apel, tur e palunan di kunuku ta seka. Di berdat, goso di e yunan di hende ta seka.

¹³Faha boso mes ku pana-di-saku, i lamenta, O saserdotenan; grita yora, O sirbidonan di altar! Bin, pasa nochi na pana-di-saku, O sirbidonan di mi Dios, pasobra e ofrenda di mainshi i e ofrenda di bibida a wordu kita for di e kas di boso Dios.

¹⁴Aparta un dia di yunamentu, proklama un asamblea solem; reuni e ansianonan i tur e habitantenan di e tera na e kas di SENOR boso Dios, i sklama na SENOR.

¹⁵Ai di e dia! Pasobra e dia di SENOR ta serka, i e lo bin komo destrukshon for di e Todopoderoso.

¹⁶No t'asina ku kuminda a wordu korta kita for di dilanti di nos wowo, alegria i goso for di e kas di nos Dios?

¹⁷E simianan ta seka bou di nan klompinan di tera; e depositonan ta keda desola, e mangasinanan basha abou, pasobra e mainshi a seka.

¹⁸Tende kon e bestianan ta keha; e krianan di baka ta dwal ront, pasobra no tin yerba pa nan; e tounan di karne tambe ta sufri.

¹⁹Na Bo, O SENOR, mi ta sklama; pasobra kandela a devora e yerba di desierto, i flam a kima tur e palunan di kunuku.

²⁰Asta e bestianan di mondi ta anhela na Bo; pasobra e roinan di awa a seka, i kandela a devora e yerba di mondi.