Read Papantla Totonac Amos 1 Bible Online

Amos 1 - Papantla Totonac bible

Amos 1

¹E palabranan di Amos, kende tabata entre e wardadonan di karne di Tekoa, kualnan el a mira den vishonnan tokante di Israel den e tempu di Uzias, rei di Juda, i den e tempu di Jeroboam, yu homber di Joas, rei di Israel, dos ana prome ku e temblor.

²I el a bisa: "SENOR ta brama for di Sion, i for di Jerusalem E ta lanta Su bos; i e luganan di yerba berde di e wardadonan ta tene rou, i e kabes di Seru Karmelo ta seka."

³Asina SENOR ta bisa: "Pa tres transgreshon di Damasko, si, pa kuater, lo Mi no revoka su kastigu, pasobra nan a bati Mi pueblo na Galaad manera ta bati mainshi ku bara di heru.

⁴Pesei lo Mi manda kandela riba e kas di Hazael, i esaki lo kaba ku e sitadelnan di Ben-adad.

⁵Tambe lo Mi kibra e bara di porta di Damasko, i korta e habitante kita for di e vaye di Aven, i esun di Bet-eden ku ta tene e septer; asina e pueblo di Siria lo bai den eksilio na Kir," SENOR ta bisa.

⁶Asina SENOR ta bisa: "Pa tres transgreshon di Gaza, si, pa kuater, lo Mi no revoka su kastigu, pasobra nan a deporta henter un poblashon pa entrega esaki na Edom.

⁷Pesei lo Mi manda kandela riba e muraya di Gaza, i esaki lo kaba ku su sitadelnan.

⁸Tambe lo Mi korta e habitantenan kita for di Asdod, i esun ku ta tene e septer, for di Askalon; lo Mi bira Mi man kontra Ekron, i e restante di e filisteonan lo perese," Senor DIOS ta bisa.

⁹Asina SENOR ta bisa: "Pa tres transgreshon di Tiro, si, pa kuater, lo Mi no revoka su kastigu, pasobra nan a entrega henter un poblashon na Edom, i no a korda e aliansa di hermandat.

¹⁰Pesei lo Mi manda kandela riba e muraya di Tiro, i esaki lo kaba ku su sitadelnan."

¹¹Asina SENOR ta bisa: "Pa tres transgreshon di Edom, si, pa kuater, lo Mi no revoka su kastigu, pasobra el a persigui su ruman homber ku spada, mientras ku e no a mustra kompashon; su rabia tambe tabata kima kontinuamente, i el a mantene su furia pa semper.

¹²Pesei lo Mi manda kandela riba Teman, i esaki lo kaba ku e sitadelnan di Bosra."

¹³Asina SENOR ta bisa: "Pa tres transgreshon di e yu hombernan di Amon, si, pa kuater, lo Mi no revoka su kastigu, pasobra e muhenan di Galaad, ku tabata na estado, nan a habri for di otro, pa nan por a ekstende nan fronteranan.

¹⁴Pesei lo Mi sende kandela riba e muraya di Raba, i esaki lo kaba ku su sitadelnan meimei di gritunan di guera riba e dia di bataya, i meimei di un tempestat riba e dia di warwaru.

¹⁵Nan rei lo bai den eksilio, e, huntu ku su prensnan," SENOR ta bisa.