Read Papantla Totonac Amos 2 Bible Online

Amos 2 - Papantla Totonac bible

Amos 2

¹Asina SENOR ta bisa: "Pa tres transgreshon di Moab, si, pa kuater, lo Mi no revoka su kastigu, pasobra el a kima e wesunan di rei di Edom hasi nan bira kalki.

²Pesei lo Mi manda kandela riba Moab, i esaki lo kaba ku e sitadelnan di Keriot. I Moab lo muri meimei di e tumulto, ku gritu di guera i zonidu di trompet.

³Tambe lo Mi korta su hues kita for di meimei di dje, i mata tur su prensnan huntu kune," SENOR ta bisa.

⁴Asina SENOR ta bisa: "Pa tres transgreshon di Juda, si, pa kuater, lo Mi no revoka su kastigu, pasobra nan a rechasa e lei di SENOR, i no a kumpli ku Su statutonan; tambe nan mentiranan a hasi nan dwal, esnan ku nan tatanan tabata sigui.

⁵Pesei lo Mi manda kandela riba Juda, i esaki lo kaba ku e sitadelnan di Jerusalem."

⁶Asina SENOR ta bisa: "Pa tres transgreshon di Israel, si, pa kuater, lo Mi no revoka su kastigu, pasobra nan ta bende e hustu pa plaka, i esnan den nesesidat pa un par di sandalia.

⁷Esnan ku ta anhela pa tira stof riba kabes di e pobernan tambe ta trose kaminda di e umildenan; i un homber i su tata ta bai serka e mesun mucha muhe, pa profana Mi nomber santu.

⁸I riba pananan tuma komo garantia nan ta drumi banda di kada altar; i den kas di nan Dios nan ta bebe bina di esnan ku a hana but.

⁹"Tog ta Ami a destrui e amoreo nan dilanti, maske su haltura tabata manera e haltura di e palunan di seda, i e tabata fuerte manera e palunan di eik; tambe Mi a destrui su fruta ariba i su rais abou.

¹⁰"I ta Ami a saka boso for di tera di Egipto, i Mi a guia boso den desierto kuarenta ana, pa boso podera di e tera di e amoreo.

¹¹E ora ei Mi a lanta algun di boso yu hombernan pa ta profeta, i algun di boso hobennan pa ta nazareo. No t'asina, O yunan di Israel?" SENOR ta deklara.

¹²Ma boso a hasi e nazareonan bebe bina, i boso a ordena e profetanan, bisando: 'Boso no profetisa!'

¹³"Mira, boso ta un peso riba Mi, manera un garoshi ta bira pisa ora ku e ta yen di bohi.

¹⁴Esun mas lihe lo no por hui, i forsa di esun fuerte lo no yud'e, ni e homber poderoso lo no salba su bida.

¹⁵Esun ku ta uza bog lo no para firme; esun ku pia lihe lo no skapa, ni esun ku ta kore kabai lo no salba su bida.

¹⁶Tambe esnan di mas balente entre e guereronan lo hui bai sunu den e dia ei," SENOR ta deklara.