Read Papantla Totonac Amos 3 Bible Online

Amos 3 - Papantla Totonac bible

Amos 3

¹Skucha e palabra aki ku SENOR a papia kontra boso, yunan di Israel, kontra henter e famia ku El a saka for di tera di Egipto:

²"Ta boso so Mi a skohe for di entre tur e famianan di tera; pesei lo Mi kastiga boso pa tur boso inikidatnan."

³Dos hende ta kana huntu, sin ku nan a bai di akuerdo ku otro?

⁴Leon ta gruna den mondi-sera si e no tin proi? Leon chikitu ta gruna for di su kueba, sin ku el a kohe algu?

⁵Parha ta kai den trampa riba suela si no tin as den esaki? Trampa ta bula for di suela, sin ku el a kohe algu?

⁶Si trompet wordu supla den un stat, e hendenan no ta tembla? Si sosode kalamidat den un stat, no ta SENOR a hasi esaki?

⁷Siguramente, SENOR Dios no ta hasi nada, sin ku E revela Su konseho sekreto na Su sirbidonan, e profetanan.

⁸Leon a gruna! Ken lo no tin temor? Senor DIOS a papia! Ken por laga di profetisa?

⁹Proklama den e sitadelnan di Asdod i den e sitadelnan di tera di Egipto, i bisa: "Reuni boso mes riba e serunan di Samaria i mira e desordu grandi ku tin den dje i e opreshon meimei di su pueblo.

¹⁰"Ma nan no sa kon pa hasi loke ta bon," SENOR ta deklara, "esakinan ku ta warda violensia i destrukshon den nan sitadelnan."

¹¹Pesei, asina Senor DIOS ta bisa: "Un enemigu, si, un ku ta rondona e tera lo ranka boso fortalesa bash'abou, i boso sitadelnan lo wordu geplunder."

¹²Asina SENOR ta bisa: "Meskos ku un wardado di karne ta salba un par di pia of pida di un orea for di boka di leon, asina e yunan di Israel, ku ta biba na Samaria, lo wordu salba-- ku un rant di kama i un klechi pa tapa sofa!

¹³"Tende i testifika kontra e kas di Jakob," Senor DIOS, e Dios di ehersitonan, ta deklara.

¹⁴"Pasobra riba e dia ku Mi kastiga Israel pa su transgreshonnan, lo Mi kastiga e altarnan di Bet-el tambe; e kachunan di altar lo wordu korta kita afo, i nan lo kai abou na suela.

¹⁵Tambe lo Mi basha e kas di wenter abou huntu ku e kas di zomer; e kasnan di ivor tambe lo perese, i e kasnan grandi lo yega na nan fin," SENOR ta deklara.