Read Papantla Totonac Amos 5 Bible Online

Amos 5 - Papantla Totonac bible

Amos 5

¹Tende e palabra aki ku Mi ta lanta tokante di boso, un lamentashon, O kas di Israel.

²El a kai, e birgen Israel a kai; e lo no lanta mas. Tur bandona e ta keda benta abou den su mes tera; no tin ningun hende pa lant'e bek.

³Pasobra asina Senor DIOS ta bisa: "E stat ku sali bai ku mil lo keda ku shen, i esun ku sali bai ku shen lo keda ku dies pa e kas di Israel."

⁴Pasobra asina SENOR ta bisa e kas di Israel: "BuskaMi pa boso por biba.

⁵Ma no buska Bet-el, i no bin Gilgal, ni krusa bai Beerseba; pasobra Gilgal siguramente lo bai den koutiverio, i Bet-el lo kaba na nada.

⁶Buska SENOR, pa boso por biba, pa E no lanta manera kandela, O kas di Jose, i devora, sin ningun hende pa pagu'e pa Bet-el,

⁷O boso, ku ta kambia hustisia hasie amargura, i ku ta tira rektitut abou na suela!"

⁸Buska Esun ku a traha Pleyades i Orion, i ta kambia skuridat profundo hasie bira mainta, Kende ta oskurese dia hasie bira nochi, Kende ta yama e awanan di laman i ta basha nan afo riba superfisio di tera; SENOR ta Su nomber.

⁹Ta E ta Esun ku ta yobe destrukshon riba e fuertenan, asina ku destrukshon ta bin riba e forti.

¹⁰Nan ta odia esun ku ta reprende den e porta di stat, i nan ta aborese esun ku ta papia ku integridat.

¹¹Pesei, pasobra boso ta trapa hende pober i ta eksigi un tributo di mainshi for di nan, maske boso a traha kasnan di piedra bon korta, tog boso lo no biba den nan; boso a planta kunukunan di wendruif plasentero, tog boso lo no bebe nan bina.

¹²Pasobra Mi sa ku boso transgreshonnan ta hopi i boso pikanan ta grandi. Boso ta oprimi e hustunan i ta asepta plaka pasa bou di mesa, i boso ta nenga e pobernan nan derecho den e porta di stat.

¹³Pesei na un tempu asina e persona prudente ta keda ketu, pasobra ta un tempu malu.

¹⁴Buska bondat i no maldat, pa boso por biba; anto e SENOR Dios di ehersitonan sea ku boso, meskos ku boso a bisa!

¹⁵Odia maldat, stima bondat, i stablese hustisia den e porta di stat! Podise e SENOR Dios di ehersitonan lo tene miserikordia ku e restante di Jose.

¹⁶Pesei, asina e SENOR Dios di ehersitonan, e Senor, ta bisa: "Tin lamento den tur e plasanan, i den tur e kayanan nan ta bisa: 'Ai! Ai!' Tambe nan ta yama e kunukero pa tene rou, i e yoradonan profeshonal pa lamenta.

¹⁷I den tur e kunukunan di wendruif tin lamento, pasobra lo Mi pasa meimei di bo," SENOR ta bisa.

¹⁸Ai di boso ku ta anhela pa e dia di SENOR. Pakiko boso kier e dia di SENOR? E lo ta skuridat i no lus.

¹⁹E lo ta manera ora un hende ta hui pa un leon, i un ber ta bin kontra kune; of e ta bai kas, ta pone su man na muraya, i un kolebra ta mord'e.

²⁰No t'asina ku e dia di SENOR lo ta skuridat i no lus, tiniebla sin klaridat den dje?

²¹Mi ta odia, Mi ta rechasa boso fiestanan; tampoko Mi no tin delisia den boso asambleanan solem.

²²Maske boso ofrese na Mi ofrendanan kima i boso ofrendanan di mainshi, lo Mi no asepta nan; i ni wak lo Mi no wak e ofrendanan di pas di boso bestianan gorda.

²³Kita for di Mi e boroto di boso kantikanan; ni skucha lo Mi no skucha e zonidu di boso arpanan.

²⁴Ma laga hustisia kore basha manera awa, i rektitut manera un korida di awa ku ta keda kore konstantemente.

²⁵"Boso a ofreseMi sakrifisionan i ofrendanan di mainshi den desierto pa kuarenta ana, O kas di Israel?

²⁶Tambe boso a hiba huntu ku boso Sikut, boso rei, i Kiyun, boso imagennan, e strea di boso diosnan ku boso a traha pa boso mes.

²⁷Pesei lo Mi manda boso den eksilio mas aleu ku Damasko," SENOR, Kende Su nomber ta e Dios di ehersitonan, ta bisa.