Read Papantla Totonac Amos 6 Bible Online

Amos 6 - Papantla Totonac bible

Amos 6

¹Ai di esnan ku ta trankil asina na Sion, i di esnan ku ta sinti nan mes sigur riba e seru di Samaria, e hombernan distingui di e nashonnan mas prominente, serka kendenan e kas di Israel ta bin.

²Pasa bai na Kalne i mira, i for di einan bai na e gran Hamat; e ora ei baha bai Gat di e filisteonan. Nan ta miho ku e reinonan aki? Of nan teritorio ta mas grandi ku esun di boso?

³Ai di esnan ku ta pone e dia di kalamidat tarda, i kier trese e asiento di violensia serka;

⁴esnan ku ta drumi riba kama di ivor i ta rek kurpa riba sofa, i ta kome lamchi for di e tou i bishe for di e stal,

⁵ku ta improvisa riba zonidu di arpa, i, manera David, ta kompone kantika pa nan mes,

⁶ku ta bebe komchinan di sakrifisio yen di bina, mientras ku nan ta hunta nan mes ku e miho zeta, ma ku di e ruina di Jose s nan no tin duele.

⁷Pesei nan lo bai awor den eksilio na kabes di e eksiliadonan, i e bankete di esnan ku ta rek kurpa banda di mesa lo kaba.

⁸Senor DIOS a hura pa Su mes, e SENOR Dios di ehersitonan a deklara: "Mi ta aborese e arogansia di Jakob, i Mi ta odia su sitadelnan; pesei lo Mi entrega e stat i tur loke ku e ta kontene."

⁹I lo sosode ku si resta dies homber den un kas, nan lo muri.

¹⁰E ora ei su tio, of esun ku ta kim'e, lo his'e pa saka su wesunan for di e kas, i e lo bisa esun ku ta den e parti mas paden di e kas: "Tin mas hende huntu ku bo?" I esun ei lo bisa: "Ni un." E ora ei e lo kontesta: "Keda ketu, pasobra e nomber di SENOR no mag wordu menshona."

¹¹Pasobra mira, SENOR ta bai ordena pa kibra e kas grandi na pida-pida i e kas chikitu na werki.

¹²Kabai sa kore riba baranka? Of hende sa plug einan ku buey? Tog boso a hasi hustisia bira veneno, i e fruta di rektitut bira amargura,

¹³boso ku ta regosiha den Lo-debar, i ta bisa: "No ta den nos mes forsa nos a tuma Karnaim pa nos mes?"

¹⁴"Pasobra mira, Mi ta bai lanta un nashon kontra boso, O kas di Israel," e SENOR Dios di ehersitonan ta deklara, "i nan lo afligi boso for di e entrada di Hamat te na e roi di Araba."