Read Papantla Totonac Amos 9 Bible Online

Amos 9 - Papantla Totonac bible

Amos 9

¹Mi a mira SENOR para banda di e altar, i El a bisa: "Dal e kapitelnan pa e drempelnan sakudi. I kibra nan riba kabes di nan tur! E ora ei lo Mi mata esnan ku keda ku spada; nan lo no tin ningun fugitivo ku lo hui, ni ningun refugiado ku lo skapa.

²Maske nan koba bai te den Seol, for di ayanan Mi man lo kohe nan; i maske nan subi bai na shelu, for di ayanan lo Mi baha nan.

³I maske nan skonde riba e kabes di Seru Karmelo, lo Mi rondia nan i kita nan for di ayanan; i maske nan skonde nan mes for di Mi bista den fondo di laman, for di ayanan lo Mi ordena e kolebra pa morde nan.

⁴I maske nan bai den koutiverio dilanti di nan enemigunan, for di ayanan lo Mi ordena spada pa mata nan. I lo Mi fiha Mi bista kontra nan pa malu i no pa bon."

⁵I e Senor DIOS di ehersitonan, Esun ku ta mishi ku tera asina ku e ta dirti, i tur hende ku ta biba den dje ta tene rou-- i henter e tera ta subi manera Neil i ta bolbe baha manera Neil di Egipto--

⁶Esun ku ta traha Su kambernan-ariba den e shelunan, i ta ekspande Su firmamentu ofer di tera, Esun ku ta yama e awanan di laman i ta basha nan riba e superfisio di tera, SENOR ta Su nomber.

⁷"Boso no ta manera e yunan di Etiope pa Mi, O yunan di Israel?" SENOR ta deklara. "Mi no a saka Israel for di tera di Egipto, i e filisteonan for di Kaftor, i e sirionan for di Kir?

⁸"Mira, wowo di Senor DIOS ta riba e reino pekaminoso. I lo Mi destruie for di riba superfisio di tera; sinembargo, lo Mi no destrui e kas di Jakob kompletamente," SENOR ta deklara.

⁹Pasobra mira, Mi ta ordena, i lo Mi sakudi e kas di Israel meimei di tur nashon, manera mainshi ta wordu sakudi den un sefta, ma ni un pipita lo no kai abou na suela.

¹⁰Tur e pekadonan di Mi pueblo lo muri pa medio di spada, esnan ku ta bisa: 'E kalamidat lo no alkansa nos ni konfronta nos.'

¹¹"Den e dia ei lo Mi lanta e tabernakel di David ku a kai, i drecha e burakunan den su muraya; tambe lo Mi lanta su ruinanan, i rekonstrui esaki manera prome aya;

¹²pa nan podera di e restante di Edom, i tur e nashonnan ku ta wordu yama na Mi nomber," SENOR, Kende ta hasi esaki, ta deklara.

¹³"Mira, dianan ta bin," SENOR ta deklara, "ku e plugdo lo alkansa e kosechado, i e trapado di wendruif lo alkansa esun ku ta sembra simia; ku e serunan lo gotia bina dushi, i tur e seritunan lo disolve.

¹⁴Tambe lo Mi trese esnan di Mi pueblo Israel bek for di koutiverio, i nan lo rekonstrui e statnan ruina i biba den nan. Tambe nan lo planta kunukunan di wendruif i bebe nan bina, i traha hofi i kome nan fruta.

¹⁵Tambe lo Mi planta nan den nan tera, i nan lo no wordu ranka ku rais ku tur mas for di nan tera ku Mi a duna nan," SENOR boso Dios ta bisa.