Read Papantla Totonac Jonas 4 Bible Online

Jonas 4 - Papantla Totonac bible

Jonas 4

¹Ma esaki a desgusta Jonas masha, i el a rabia.

²I el a hasi orashon na SENOR i a bisa: "Pa fabor, SENOR, esaki no ta loke mi a bisa ora mi tabata na mi mes tera ainda? Ta pesei mi kier a evita esaki dor di hui bai Tarsis, pasobra mi tabata sa ku Bo ta un Dios yen di grasia i kompashon, Kende no ta rabia lihe i ta abunda den miserikordia, i Kende ta repenti di kalamidat.

³Pesei awor, O SENOR, pa fabor, kita mi bida, pasobra miho mi muri ku mi keda na bida."

⁴I SENOR a bisa: "Bo tin rason di ta rabia?"

⁵E ora ei Jonas a sali for di e stat i a bai sinta pariba di e stat. Ayanan el a traha un ramada pa su mes i a sinta bou di dje den sombra, te ora ku e por a mira kiko lo a bai pasa den e stat.

⁶I SENOR Dios a prepara un mata i esaki a krese ofer di Jonas su kabes, pa ta un sombra p'e, pa alivi'e di su desgustu. I Jonas a keda masha kontentu mes ku e mata.

⁷Ma su manise, ora dia a habri, Dios a prepara un bichi, i esaki a ataka e mata, i e mata a marchita.

⁸I a sosode ku ora solo a sali, Dios a prepara un bientu kayente for di pariba, i solo tabata kima riba Jonas su kabes, asina ku el a desmaya i a roga di henter su kurason pa muri, bisando: "Miho mi muri ku mi keda na bida."

⁹Anto Dios a bisa Jonas: "Bo tin rason di ta rabia pa motibu di e mata?" I el a rosponde: "Mi tin rason di ta rabia, asta pa muri."

¹⁰E ora ei SENOR a bisa: "Bo tabatin duele di e mata ku bo no tabatin ningun molester kune, ni a hasie krese, un mata ku a krese den un anochi i a perese den un anochi.

¹¹I Ami no mester tene duele di Ninive, e stat grandi, kaminda tin mas ku shent'i binti mil persona, ku no sa e diferensia entre nan man drechi i man robes, i tambe hopi bestia?"