Read Papantla Totonac Numbernan 10 Bible Online

Numbernan 10 - Papantla Totonac bible

Numbernan 10

¹SENOR a sigui papia ku Moises, bisando:

²"Traha pa bo mes dos trompet di plata. Traha nan di obra bati-ku-martiu, i uza nan pa yama e kongregashon pa bin huntu i pa hasi e kampamentunan sali bai.

³I ora supla tur dos, henter e kongregashon mester reuni serka bo na entrada di e tent di reunion.

⁴Ma si supla un so, e ora ei e lidernan, kabesantenan di e divishonnan di Israel mester reuni bo dilanti.

⁵Ma ora boso zona alarma, e kampamentunan ku ta lanta na e banda pariba mester sali bai.

⁶I ora boso zona alarma pa di dos biaha, e kampamentunan ku ta lanta na e banda pasuit mester sali bai; mester zona alarma pa nan sali bai.

⁷Sinembargo, ora ta reuni e kongregashon, boso mester supla trompet sin zona alarma.

⁸"Ademas, e yu hombernan di Aaron, kendenan ta saserdote, mester supla e trompetnan; i esaki mester ta pa boso un statuto perpetuo durante di tur boso generashonnan.

⁹I ora boso ta bai guera den boso tera kontra e atversario ku ta ataka boso, e ora ei boso mester laga alarma zona ku e trompetnan, pa boso wordu rekorda dilanti di SENOR boso Dios, i wordu salba for di boso enemigunan.

¹⁰Tambe riba dia di boso alegria, i na boso fiestanan stipula, i riba e prome dianan di boso lunanan, boso mester supla e trompetnan riba boso ofrendanan kima i riba e sakrifisionan di boso ofrendanan di pas; i nan lo keda komo un rekordatorio di boso dilanti di boso Dios. Ami ta SENOR boso Dios."

¹¹Awor a sosode den e di dos ana, den e di dos luna, riba e di binti dia di e luna, ku e nubia a wordu lanta for di riba e tabernakel di testimonio;

¹²i e yunan di Israel a biaha bai for di e desierto di Sinai. Anto e nubia a keda para den e desierto di Paran.

¹³Asina nan a sali bai pa di prome biaha konforme e ordu di SENOR pa medio di Moises.

¹⁴I e emblema di e kampamentu di e yu hombernan di Juda, segun nan ehersitonan, a sali bai prome, ku Nason, yu homber di Aminadab, na kabes di e ehersito,

¹⁵i Natanael, yu homber di Zuar, na kabes di e ehersito di e tribu di e yu hombernan di Isakar;

¹⁶i Eliab, yu homber di Helon, na kabes di e ehersito di e tribu di e yu hombernan di Zabulon.

¹⁷E ora ei e tabernakel a wordu desarma; i e yu hombernan di Gerson i e yu hombernan di Merari, kendenan tabata karga e tabernakel, a sali bai.

¹⁸Kaba e emblema di e kampamentu di Ruben, segun nan ehersitonan, a sali bai, ku Elisur, yu homber di Sedeur, na kabes di e ehersito,

¹⁹i Selumiel, yu homber di Zurisadai, na kabes di e ehersito di e tribu di e yu hombernan di Simeon,

²⁰i Eliasaf, yu homber di Deuel, na kabes di e ehersito di e tribu di e yu hombernan di Gad.

²¹E ora ei e koatitanan a sali bai, kargando e artikulonan santu; i e tabernakel a wordu lanta prome ku nan yegada.

²²Kaba e emblema di e kampamentu di e yu hombernan di Efrain, segun nan ehersitonan, a sali bai, ku Elisama, yu homber di Amiud, na kabes di e ehersito,

²³i Gamaliel, yu homber di Pedasur, na kabes di e ehersito di e tribu di e yu hombernan di Manases;

²⁴i Abidan, yu homber di Gideoni, na kabes di e ehersito di e tribu di e yu hombernan di Benjamin.

²⁵E ora ei e emblema di e kampamentu di e yu hombernan di Dan, segun nan ehersitonan, kualnan tabata forma e warda di mas patras pa tur e kampamentunan, a sali bai, ku Ahiezer, yu homber di Amisadai, na kabes di e ehersito,

²⁶i Pagiel, yu homber di Okran, na kabes di e ehersito di e tribu di e yu hombernan di Aser;

²⁷i Ahira, yu homber di Enan, na kabes di e ehersito di e tribu di e yu hombernan di Neftali.

²⁸Esaki tabata e ordu di marcha di e yunan di Israel segun nan ehersitonan, ora nan tabata sali bai.

²⁹E ora ei Moises a bisa Hobab, yu homber di Reuel e madianita, Moises su suegro: "Nos ta sali bai na e luga di kual SENOR a bisa: 'Ami lo duna boso esaki'; ban ku nos i nos lo tratabo bon, pasobra SENOR a priminti loke ta bon tokante di Israel."

³⁰Ma el a bisa Moises: "Mi no ta bin, ma mas bien mi ta bai na mi mes tera, serka famianan."

³¹E ora ei Moises a bisa: "Pa fabor, no bandona nos, komo ku abo sa unda nos tin di kampa den desierto, i abo lo ta manera wowo pa nos.

³²I lo ta asina, ku si bo bai ku nos, e ora ei tur bon ku SENOR hasi pa nos, nos lo hasi pa bo."

³³Asina nan a sali bai for di e seru di SENOR pa un biahe di tres dia, mientras ku e arka di aliansa di SENOR tabata bai nan dilanti durante di e biahe di tres dia, pa buska un luga di sosiegu pa nan.

³⁴I e nubia di SENOR tabata ofer di nan den dia, ora nan tabata sali bai for di e kampamentu.

³⁵E ora ei a sosode ku ora e arka a sali bai, Moises a bisa: "Lanta, O SENOR! I laga Bo enemigunan keda plama; i laga esnan ku ta odiaBo hui for di Bo presensia."

³⁶I ora ku e arka a keda para, el a bisa: "Bolbe, O SENOR, serka e miles i miles di Israel."