Read Papantla Totonac Numbernan 11 Bible Online

Numbernan 11 - Papantla Totonac bible

Numbernan 11

¹Awor e pueblo a keha di e kosnan duru ku nan tabata pasa aden; i ora SENOR a tende esaki, Su rabia a sende, i e kandela di SENOR tabata kima meimei di nan i a kaba ku algun di e partinan na rant di e kampamentu.

²Pesei e pueblo a sklama na Moises, i Moises a hasi orashon na SENOR, i e kandela a paga.

³Asina nomber di e luga ei a wordu yama Tabera, pasobra e kandela di SENOR tabata kima meimei di nan.

⁴Awor e multitut di tur klase di hende ku tabata meimei di nan tabata yen di deseo golos; i tambe e yunan di Israel a bolbe yora i bisa: "Ken lo duna nos karni pa kome?

⁵Nos ta korda e piska ku nos tabata kome pornada na Egipto, e konkombernan, melonnan, i e prei, siboyo i konoflo,

⁶ma awor nos apetit a bai. Nos wowo no ta mira nada otro ku e mana aki so."

⁷Awor e mana tabata manera simia di koriander i e tabata parse bedelio.

⁸E hendenan tabata kana ront pikie i mul'e entre dos piedra di mulina of batie den pilon, i hereb'e den wea i traha pan buskuchi kune; i e tabata smak manera pan buskuchi horna ku zeta.

⁹I ora serena tabata kai anochi riba e kampamentu, e mana tabata kai huntu kune.

¹⁰Awor Moises a tende hende ta yora den tur famia, kada homber na entrada di su tent; i e rabia di SENOR a sende na gran manera, i Moises a keda malkontentu.

¹¹Asina Moises a bisa SENOR: "Pakiko Bo a trata asina duru ku Bo sirbido? I pakiko mi no a hana grasia den Bo bista, ku Bo a pone e karga di henter e pueblo aki riba mi?

¹²Ta ami a konsebi henter e pueblo aki? Ta ami a duna lus na nan, ku Bo mester a bisami: 'Karga nan den bo skochi, manera un yaya ta karga un yu ku ta na pechu ainda hiba na e tera ku Bo a hura na nan tatanan'?

¹³Unda mi ta bai hana karni pa duna henter e pueblo aki? Pasobra nan ta yora mi dilanti, bisando: 'Duna nos karni pa nos kome!'

¹⁴Ami so no por karga henter e pueblo aki, pasobra e karga ta muchu pisa pa mi.

¹⁵Anto si t'asina Bo ta bai trata ku mi, pa fabor, matami mesora si mi a hana grasia den Bo bista, i no lagami mira mi miseria."

¹⁶Pesei SENOR a bisa Moises: "Reuni pa Mi setenta homber for di e ansianonan di Israel, di kualnan bo sa ku nan ta e ansianonan di e pueblo i nan ofisialnan, i hiba nan na e tent di reunion, i laga nan para ayanan huntu ku bo.

¹⁷E ora ei lo Mi baha bin i papia ku bo ayanan, i lo Mi tuma di e Spiritu ku ta riba bo, pon'E riba nan; i nan lo karga e karga di e pueblo huntu ku bo, pa bo no tin mester di kargu'e bo so.

¹⁸"I bisa e pueblo: 'Konsagra boso mes pa manan i boso lo kome karni; pasobra boso a yora pa SENOR tende, bisando: "Ai, ku un hende lo a duna nos karni pa kome! Pasobra nos tabatin e bon na Egipto." Pesei SENOR lo duna boso karni i boso lo kome.

¹⁹Boso lo kome, no un dia, ni dos dia, ni sinku dia, ni dies dia, ni binti dia,

²⁰sino henter un luna, te ora ku e sali for di boso nanishi i bira algu repugnante pa boso, pasobra boso a rechasa SENOR, Kende ta meimei di boso, i a yora Su dilanti, bisando: "Pakiko nos a bandona Egipto?

²¹Ma Moises a bisa: "E pueblo ku mi ta meimei di dje ta seis shen mil homber na pia; tog Bo a bisa: 'Lo Mi duna nan karni pa nan kome henter un luna.'

²²Mester mata tounan di bestia chikitu i krianan di baka pa nan, pa ta sufisiente pa nan? Of mester rekohe tur piska di laman pa nan, pa ta sufisiente pa nan?"

²³I SENOR a bisa Moises: "SENOR Su poder ta limita? Awor lo bo mira si Mi palabra lo wordu kumpli na bo, si of no."

²⁴Asina Moises a sali bai i a konta e pueblo e palabranan di SENOR. Tambe el a reuni setenta homber for di e ansianonan di e pueblo i a pone nan para ront di e tent.

²⁵E ora ei SENOR a baha den e nubia i a papia kune; i El a tuma di e Spiritu ku tabata riba dje i a pon'E riba e setenta ansianonan. I a sosode ku ora e Spiritu tabata reposa riba nan, nan tabata profetisa. Ma despues nan no a hasie mas.

²⁶Ma dos homber a keda den e kampamentu; nomber di esun tabata Eldad i nomber di e otro Medad. I e Spiritu tabata reposa riba nan (awor nan tabata meimei di esnan ku a wordu registra, ma ku no a sali bai na e tent), i nan tabata profetisa den e kampamentu.

²⁷I un hoben a kore bai konta Moises i a bisa: "Eldad i Medad ta profetisa den e kampamentu."

²⁸E ora ei Josue, yu homber di Nun, sirbido di Moises for di su hubentut, a kontesta i a bisa: "Mi senor Moises, prohibi nan!"

²⁹Ma Moises a bis'e: "Bo ta yalurs pa mi motibu? Ohala ku henter e pueblo di SENOR tabata profeta, ku SENOR lo a pone Su Spiritu riba nan!"

³⁰E ora ei Moises a bolbe na e kampamentu, tantu e komo e ansianonan di Israel.

³¹Awor a lanta un bientu manda dor di SENOR, i esaki a trese patrishi for di laman i a laga nan kai banda di e kampamentu, mas o menos un dia di biahe na un banda i un dia di biahe na e otro banda, tur ront di e kampamentu, i mas o menos dos kodo haltu riba superfisio di suela.

³²I e pueblo a keda lanta henter dia i henter anochi i henter e dia siguiente, i a rekohe e patrishinan (esun ku a rekohe mas poko a rekohe dies omer); i nan a plama nan pa nan mes tur ront di e kampamentu.

³³Mientras ku e karni tabata entre nan djente ainda, prome ku nan a kou e, rabia di SENOR a sende kontra e pueblo, i SENOR a dal e pueblo ku un plaga severo.

³⁴Pesei nomber di e luga ei a wordu yama Kibrot-hataava, pasobra ta aya nan a dera e pueblo ku tabata asina golos.

³⁵For di Kibrot-hataava e pueblo a sali bai Hazerot, i nan a keda na Hazerot.