Read Papantla Totonac Numbernan 12 Bible Online

Numbernan 12 - Papantla Totonac bible

Numbernan 12

¹Anto Miriam i Aaron a papia kontra Moises pa motibu di e muhe kusita ku el a kasa kune (pasobra el a kasa ku un muhe kusita);

²i nan a bisa: "Ta pa medio di Moises so SENOR a papia anto? E no a papia pa medio di nos tambe?" I SENOR a tende esaki.

³(Awor e homber Moises tabata masha umilde, mas ku tur homber ku tabatin riba superfisio di tera.)

⁴I direpiente SENOR a bisa Moises, Aaron i Miriam: "Boso tres sali bin na e tent di reunion." Asina nan tres a sali bin.

⁵E ora ei SENOR a baha den un pilar di nubia i a keda para na entrada di e tent, i El a yama Aaron i Miriam. Ora nan tur dos a bin dilanti,

⁶El a bisa: "Tende Mi palabranan awor: "Si tin un profeta meimei di boso, Ami, SENOR, lo hasi Mi mes konosi na dje den un vishon. Lo Mi papia kune den un sono.

⁷Ku Mi sirbido Moises no t'asina; e ta fiel den henter Mi kas;

⁸kune Mi ta papia kara-kara, abiertamente, i no den charada, i e ta mira aparensia di SENOR. Pakiko anto boso no tabatin miedu di papia kontra Mi sirbido, kontra Moises?"

⁹Asina e rabia di SENOR a kima kontra nan i El a bai.

¹⁰Ma ora ku e nubia a kita for di riba e tent, ata, Miriam tabata leproso, blanku manera sneu. Ora ku Aaron a bira wak, ata, Miriam tabata leproso.

¹¹E ora ei Aaron a bisa Moises: "Ai mi senor, pa fabor, no pone riba nos e pika aki ku nos a komete den bobedat, i den kual nos a peka.

¹²No laga Miriam ta manera un morto, kende su karni ta mitar komi ora ku e ta sali for di barika di su mama!"

¹³I Moises a sklama na SENOR, bisando: "O Dios, kur'e, mi ta pidiBo!"

¹⁴Ma SENOR a bisa Moises: "Si su tata a djis skupi den su kara, e lo no a karga su berguensa pa shete dia? Laga ser'e pa shete dia pafo di e kampamentu, i despues por risibie atrobe."

¹⁵Asina Miriam a wordu sera pafo di e kampamentu pa shete dia, i e pueblo no a sigui biaha te ora nan a risibi Miriam atrobe.

¹⁶Despues e pueblo a sigui su biahe for di Hazerot i a kampa den e desierto di Paran.