Read Papantla Totonac Numbernan 13 Bible Online

Numbernan 13 - Papantla Totonac bible

Numbernan 13

¹E ora ei SENOR a papia ku Moises, bisando:

²"Manda pa bo mes hombernan pa nan spiona tera di Kanaan ku Mi ta bai duna na e yunan di Israel; manda un homber for di kada tribu di nan tatanan, kada un di nan un lider meimei di nan."

³Asina Moises a manda nan for di e desierto di Paran, riba ordu di SENOR, nan tur, hombernan ku tabata kabesante di e yunan di Israel.

⁴I esakinan tabata nan nombernan: for di e tribu di Ruben, Samua, yu homber di Zakur;

⁵for di e tribu di Simeon, Safat, yu homber di Hori;

⁶for di e tribu di Juda, Kaleb, yu homber di Jefone;

⁷for di e tribu di Isakar, Igal, yu homber di Jose;

⁸for di e tribu di Efrain, Oseas, yu homber di Nun;

⁹for di e tribu di Benjamin, Palti, yu homber di Rafu;

¹⁰for di e tribu di Zabulon, Gadiel, yu homber di Sodi;

¹¹for di e tribu di Jose, for di e tribu di Manases, Gadi, yu homber di Susi;

¹²for di e tribu di Dan, Amiel, yu homber di Gemali;

¹³for di e tribu di Aser, Setur, yu homber di Mikael;

¹⁴for di e tribu di Neftali, Nabi, yu homber di Vapsi;

¹⁵for di e tribu di Gad, Geuel, yu homber di Maki.

¹⁶Esakinan ta e nombernan di e hombernan ku Moises a manda pa spiona e tera, i Moises a yama Oseas, yu homber di Nun, Josue.

¹⁷Ora Moises a manda nan pa spiona tera di Kanaan, el a bisa nan: "Bai aya na Negev; despues bai den e serunan.

¹⁸I mira kon e tera ta, i si e pueblo ku ta biba ayanan ta fuerte of debil, si nan ta poko of hopi.

¹⁹I kon e tera kaminda nan ta biba ta? E ta bon of malu? I kon e statnan kaminda nan ta biba ta? Nan ta manera kampamentunan habri of nan ta fortifika?

²⁰I kon e tera ta? E ta fertil of steril? Tin palu riba dje, si of no? Hasi un esfuerso anto pa hana algun fruta di e tera." Awor tabata net tempu di e prome wendruifnan hechu.

²¹Asina nan a bai i a spiona e tera for di e desierto di Zin te na Rehob, na e entrada di Hamat.

²²Ora nan a bai Negev, nan a yega Hebron kaminda Ahiman, Sesai i Talmai, desendientenan di Anak, tabata biba. (Awor Hebron a wordu traha shete ana prome ku Zoan na Egipto.)

²³E ora ei nan a yega na e vaye di Eskol i for di einan nan a korta un rama ku un troshi di wendruif na dje; i nan a kargu'e na un palu entre dos homber. Tambe nan a trese algun granatapel i figo.

²⁴E luga ei a wordu yama e vaye di Eskol pa motibu di e troshi di wendruif ku e yunan di Israel a korta ayanan.

²⁵Ora nan a bolbe despues di a spiona e tera, na fin di kuarenta dia,

²⁶nan a kana bin serka Moises i Aaron i serka henter e kongregashon di e yunan di Israel den e desierto di Paran na Kades; i nan a trese notisia pa nan i pa henter kongregashon i a mustra nan e fruta di e tera.

²⁷Asina nan a kont'e i a bisa: "Nos a bai na e tera kaminda bo a manda nos, i siertamente, e tin lechi i miel na abundansia i esaki ta su fruta!

²⁸Sinembargo, e pueblo ku ta biba den e tera ta fuerte, i e statnan ta fortifika i masha grandi mes; i ademas, nos a mira e desendientenan di Anak ayanan.

²⁹Amalek ta biba na tera di Negev i e heteonan, e jebuseonan i e amoreonan ta biba den e serunan, i e kananeonan ta biba kantu di laman i na oriya di Jordan."

³⁰E ora ei Kaleb a kalma e pueblo dilanti di Moises, i a bisa: "Laga nos bai mesora i tuma poseshon di dje, pasobra siguramente nos lo vens'e."

³¹Ma e hombernan ku a bai huntu ku Kaleb a bisa: "Nos no por bai kontra e pueblo, pasobra nan ta muchu fuerte pa nos."

³²Asina nan a duna e yunan di Israel un mal reportahe di e tera ku nan a spiona, bisando: "E tera ku nos a pasa den pa spiona ta un tera ku ta devora su habitantenan; i henter e pueblo ku nos a mira einan ta hombernan di gran estatura.

³³Tambe nos a mira gigantenan ayanan (e yu hombernan di Anak ta bin for di e gigantenan); i nos a bira manera tirakochi den nos mes bista, i asina nos tabata den nan bista tambe."