Read Papantla Totonac Numbernan 15 Bible Online

Numbernan 15 - Papantla Totonac bible

Numbernan 15

¹Awor SENOR a papia ku Moises, bisando:

²"Papia ku e yunan di Israel i bisa nan: 'Ora boso drenta e tera ku Mi ta bai duna boso pa boso biba aden,

³e ora ei hasi un ofrenda di kandela na SENOR, sea un ofrenda kima of un sakrifisio pa kumpli ku un promesa spesial, of komo un ofrenda boluntario, of na boso tempunan stipula, pa prepara un holo dushi na SENOR for di e kria di baka of for di e tou di bestia chikitu.

⁴E ora ei esun ku presenta su ofrenda mester presenta na SENOR un ofrenda di mainshi di un desimo parti di un efa di harina fini, meskla ku un di kuater parti di un hin di zeta,

⁵i bo mester prepara bina pa e ofrenda di bibida, un di kuater parti di un hin, huntu ku e ofrenda kima of pa e sakrifisio, pa kada lamchi.

⁶'Of pa un karne chubatu bo mester prepara komo un ofrenda di mainshi dos desimo parti di un efa di harina fini meskla ku un di tres parti di un hin di zeta;

⁷i pa e ofrenda di bibida bo mester ofrese un di tres parti di un hin di bina komo un holo dushi na SENOR.

⁸'I ora bo prepara un bishe machu komo un ofrenda kima of un sakrifisio, pa kumpli ku un promesa spesial, of komo ofrendanan di pas na SENOR,

⁹e ora ei bo mester ofrese huntu ku e bishe machu un ofrenda di mainshi di tres desimo parti di un efa di harina fini meskla ku mitar hin di zeta;

¹⁰komo ofrenda di bibida bo mester ofrese mitar hin di bina komo un ofrenda di kandela, komo un holo dushi na SENOR.

¹¹Asina mester hasi pa kada buey of pa kada karne chubatu of pa kada un di e lamchinan machu of di e kabritunan.

¹²Konforme e kantidat ku boso ta prepara, asina boso lo hasi pa kada un, konforme nan kantidat.

¹³'Tur yu di tera mester hasi e kosnan aki na e manera aki, ora ta presenta un ofrenda di kandela, komo un holo dushi na SENOR.

¹⁴I si un stranhero keda biba pa un tempu serka boso, of ken ku por ta meimei di boso durante di tur boso generashonnan, i e ta desea di hasi un ofrenda di kandela komo un holo dushi na SENOR, e ora ei e mester hasi meskos ku boso ta hasi.

¹⁵Pa loke ta e asamblea, mester tin un statuto pa boso i pa e stranhero ku ta keda biba pa un tempu serka boso, un statuto perpetuo durante di tur boso generashonnan; manera boso ta, asina e stranhero tambe mester ta dilanti di SENOR.

¹⁶Mester tin un lei i un ordenansa pa boso i pa e stranhero ku ta keda biba pa un tempu serka boso.'"

¹⁷E ora ei SENOR a papia ku Moises, bisando:

¹⁸"Papia ku e yunan di Israel i bisa nan: 'Ora boso drenta e tera kaminda Mi ta hiba boso,

¹⁹e ora ei lo t'asina, ku ora boso kome di e kuminda di e tera, boso mester ofrese un ofrenda di halsamentu na SENOR.

²⁰For di e mansa, traha di boso prome harina, boso mester ofrese un pan buskuchi komo un ofrenda di halsamentu; manera e ofrenda di halsamentu for di e plenchi-di-bati-mainshi, asina lo bo ofres'e.

²¹For di e mansa traha di boso prome harina boso mester duna SENOR un ofrenda di halsamentu durante di tur boso generashonnan.

²²'Ma ora boso faya no intenshonalmente i no ta warda tur e mandamentunan aki ku SENOR a papia ku Moises--

²³tur loke SENOR a ordena boso pa medio di Moises, for di dia ku SENOR a duna e mandamentunan i djei padilanti, durante di tur boso generashonnan--

²⁴e ora ei lo t'asina ku, si esaki wordu hasi no intenshonalmente, sin konosementu di e kongregashon, e ora ei henter e kongregashon mester ofrese un bishe machu komo un ofrenda kima, komo un holo dushi na SENOR, huntu ku su ofrenda di mainshi i su ofrenda di bibida, konforme e ordenansa, i un kabritu chubatu komo ofrenda pa pika.

²⁵E ora ei e saserdote mester hasi ekspiashon pa henter e kongregashon di e yunan di Israel, i nan lo wordu pordona; pasobra tabata un eror i nan a trese nan ofrenda, un ofrenda di kandela na SENOR, i nan ofrenda pa pika dilanti di SENOR, pa nan eror.

²⁶Asina henter e kongregashon di e yunan di Israel lo wordu pordona, huntu ku e stranhero ku ta keda biba pa un tempu meimei di nan, pasobra esaki a sosode ku henter e pueblo pa motibu di eror.

²⁷'Tambe si un persona peka no intenshonalmente, e ora ei e mester ofrese un kabritu muhe di un ana komo un ofrenda pa pika.

²⁸I e saserdote mester hasi ekspiashon dilanti di SENOR pa e persona ku ta desvia ora ku e peka no intenshonalmente, hasiendo ekspiashon pa e persona, pa e wordu pordona.

²⁹Boso mester tin un lei pa esun ku hasi kualke kos no intenshonalmente, pa e yu di tera meimei di e yunan di Israel i pa e stranhero ku ta keda biba pa un tempu meimei di nan.

³⁰'Ma e persona ku hasi kualke kos pa malu, sea ku e ta yu di tera of un stranhero, ta blasfema SENOR; i e persona ei mester wordu korta kita for di meimei di su pueblo.

³¹Komo ku el a despresia e palabra di SENOR i a kibra Su mandamentu, e persona ei mester wordu korta kita kompletamente; su kulpa lo keda riba dje.'"

³²Awor mientras ku e yunan di Israel tabata den desierto, nan a hana un homber ta piki palu riba dia di sabat.

³³I esnan ku a han'e ta piki palu a hib'e pa Moises i Aaron i pa henter e kongregashon;

³⁴i nan a ser'e, pasobra ainda no a disidi kiko mester hasi kune.

³⁵E ora ei SENOR a bisa Moises: "E homber mester wordu mata sigur; henter e kongregashon mester piedr'e ku piedra pafo di e kampamentu."

³⁶Pesei henter e kongregashon a hib'e pafo di e kampamentu i a piedr'e ku piedra te ora ku el a muri, meskos ku SENOR a ordena Moises.

³⁷Tambe SENOR a papia ku Moises, bisando:

³⁸"Papia ku e yunan di Israel i bisa nan ku nan mester traha frana pa nan mes na e puntanan di nan pananan durante di tur nan generashonnan, i ku nan mester pone un kordon blou na frana di kada punta.

³⁹I esaki lo ta un frana pa boso wak i rekorda tur e mandamentunan di SENOR, pa hasi nan i no prostitui boso mes dor di sigui tras di e pashonnan di boso mes kurason i di boso mes wowo,

⁴⁰pa boso korda pa hasi tur Mi mandamentunan, i sea santu pa boso Dios.

⁴¹Ami ta SENOR boso Dios, Kende a saka boso for di tera di Egipto pa ta boso Dios; Ami ta SENOR boso Dios."