Read Papantla Totonac Numbernan 18 Bible Online

Numbernan 18 - Papantla Totonac bible

Numbernan 18

¹Asina SENOR a bisa Aaron: "Abo, bo yu hombernan, i e hendenan di kas di bo tata huntu ku bo, mester karga e kulpa relashona ku e santuario; i abo, i bo yu hombernan huntu ku bo, mester karga e kulpa relashona ku boso saserdosio.

²Ma trese huntu ku bo tambe bo ruman hombernan, e tribu di Levi, e tribu di bo tata, pa nan uni ku bo i sirbibo, mientras ku abo, i bo yu hombernan huntu ku bo, ta dilanti di e tent di testimonio.

³I asina nan mester atende bo responsabilidat i e responsabilidat di henter e tent, ma nan no mester yega serka di e artikulonan-di-uzo di e santuario ni di e altar, pa ni nan ni boso no muri.

⁴I nan mester ta uni ku bo i atende ku e responsabilidatnan di e tent di reunion, pa henter e sirbishi di e tent; ma un stranhero no mag yega serka di boso.

⁵"Asina boso mester atende e responsabilidatnan di e santuario i e responsabilidatnan di e altar, pa no tin furia mas riba e yunan di Israel.

⁶I mira, Ami mes a tuma boso rumannan, e levitanan, for di meimei di e yunan di Israel; nan ta un regalo pa boso, dedika na SENOR, pa hasi e sirbishi di e tent di reunion.

⁷Ma abo, i bo yu hombernan huntu ku bo, mester atende boso saserdosio pa tur kos ku ta konserni e altar i paden di e velo, i boso lo hasi sirbishi. Mi ta duna boso e sirbishi saserdotal komo un regalo, ma e stranhero ku yega serka mester wordu mata."

⁸E ora ei SENOR a bisa Aaron: "Awor mira, Ami mes a enkargabo ku Mi ofrendanan di halsamentu, tur e regalonan santu di e yunan di Israel; Mi a duna nan na bo komo un porshon, i na bo yu hombernan komo un ordenansa perpetuo.

⁹Esaki mester ta di bo for di e kosnan di mas santu, warda for di kandela; tur ofrenda di nan, tur ofrenda di mainshi, tur ofrenda pa pika i tur ofrenda pa kulpa ku nan dunaMi, mester ta masha santu mes pa bo i pa bo yu hombernan.

¹⁰Komo algu ku ta masha santu mes bo mester kom'e, tur hende homber lo kom'e. E mester ta santu pa bo.

¹¹"Esaki tambe ta di bo, e ofrenda di nan regalo, tur e ofrendanan di zoyamentu di e yunan di Israel; Mi a duna nan na bo, i na bo yu hombernan i yu muhenan huntu ku bo, komo un ordenansa perpetuo. Tur hende di bo kas ku ta limpi mag kom'e.

¹²"Tur loke ta di miho di e zeta fresku i tur loke ta di miho di e bina fresku i di e mainshi, e prome frutanan ku nan ta ofrese na SENOR, Mi ta dunabo nan.

¹³E prome frutanan hechu di tur loke tin den nan tera, ku nan ta hiba pa SENOR, lo ta di bo; tur e hendenan di bo kas ku ta limpi mag kom'e.

¹⁴"Tur kos dedika den Israel lo ta di bo.

¹⁵Tur loke ku ta habri matris--di tur karni, sea di hende of di bestia--ku nan ofrese na SENOR, lo ta di bo. Sinembargo, e primogenito di hende siguramente bo mester redimi, i e primogenito di bestia impuru bo mester redimi.

¹⁶I pa loke ta nan preis di redenshon, for di un luna lo bo redimi nan, segun bo baluashon, sinku siklo di plata, segun e siklo di e santuario, ku ta binti gera.

¹⁷"Ma e primogenito di baka of e primogenito di karne of e primogenito di kabritu bo no mag redimi; nan ta santu. Bo mester sprengu nan sanger riba altar i lo kima nan vet komo un ofrenda di kandela, komo un holo dushi na SENOR.

¹⁸I nan karni mester ta di bo; e lo ta di bo, manera e pechu pa un ofrenda di zoyamentu i manera e pia banda drechi.

¹⁹Tur e ofrendanan di e regalonan santu, ku e yunan di Israel ta ofrese na SENOR, Mi a duna abo, bo yu hombernan i bo yu muhenan huntu ku bo, komo un ordenansa perpetuo. Ta un aliansa eterno di salu dilanti di SENOR pa bo, i bo desendientenan huntu ku bo."

²⁰E ora ei SENOR a bisa Aaron: "Lo bo no tin erensia den nan tera, ni posee ningun porshon meimei di nan; Ami ta bo porshon i bo erensia meimei di e yunan di Israel.

²¹"I pa e yu hombernan di Levi, mira, Mi a duna henter e diesmo den Israel komo un erensia na luga di nan sirbishi ku nan ta hasi, e sirbishi di e tent di reunion.

²²I e yunan di Israel no mester yega serka di e tent di reunion mas, pa nan no karga pika i muri.

²³Solamente e levitanan mester hasi e sirbishi di e tent di reunion, i nan mester karga nan inikidat; esaki mester ta un statuto perpetuo durante di tur boso generashonnan, i meimei di e yunan di Israel nan lo no tin erensia.

²⁴Pasobra e diesmo di e yunan di Israel, ku nan ta ofrese komo un ofrenda na SENOR, Mi a duna e levitanan komo erensia; pesei Mi a bisa tokante di nan: 'Nan lo no tin erensia meimei di e yunan di Israel.'"

²⁵E ora ei SENOR a papia ku Moises, bisando:

²⁶"Papia ku e levitanan i bisa nan: 'Ora boso tuma for di e yunan di Israel e diesmo ku Mi a duna boso for di nan komo boso erensia, e ora ei boso mester presenta na SENOR un ofrenda for di esei, un diesmo di e diesmo.

²⁷I boso ofrenda lo wordu konta pa boso komo e mainshi for di plenchi-di-bati-mainshi of komo e plenitut di baki-di-pers-wendruif.

²⁸Asina boso mester presenta tambe un ofrenda na SENOR for di boso diesmonan ku boso ta risibi di e yunan di Israel; i for di esaki boso mester duna saserdote Aaron e ofrenda di SENOR.

²⁹For di tur boso regalonan boso mester presenta tur ofrenda ku ta pertenese na SENOR, for di tur esnan di mas miho, e parti sagrado di nan.'

³⁰"I bisa e levitanan: 'Ora boso a ofrese e miho di esaki, e ora ei e sobra lo wordu konta pa e levitanan komo e produkto di plenchi-di-bati-mainshi i komo e produkto di baki-di-pers-wendruif.

³¹I boso mag kom'e unda ku ta, boso i e hendenan di boso kas, pasobra e ta boso rekompensa pa boso sirbishi den e tent di reunion.

³²I boso no mester karga pika pa motibu di esaki, ora boso a ofrese e miho di dje. Ma boso no mester profana e regalonan santu di e yunan di Israel, pa boso no muri.'"