Read Papantla Totonac Numbernan 19 Bible Online

Numbernan 19 - Papantla Totonac bible

Numbernan 19

¹E ora ei SENOR a papia ku Moises i Aaron, bisando:

²"Esaki ta e statuto di e lei ku SENOR a ordena, bisando: 'Papia ku e yunan di Israel pa nan trese pa bo un bishe muhe kora sin mancha, ku no tin defekto, i ku nunka no a karga yugo.

³I duna saserdote Eleazar esaki; i esaki mester wordu hiba pafo di e kampamentu i wordu mata den su presensia.

⁴Kaba saserdote Eleazar mester kohe un poko di su sanger ku su dede, i sprengu un poko di su sanger shete biaha den direkshon di e parti dilanti di e tent di reunion.

⁵E ora ei e bishe muhe mester wordu kima den su bista; su kueru i su karni i su sanger, ku su mest, mester wordu kima.

⁶I e saserdote mester kohe palu di seda, hisop i hilu skarlata, i tira esaki riba e bishe muhe ku ta kimando.

⁷E ora ei e saserdote mester laba su pananan, bana su kurpa den awa i despues bin den e kampamentu, ma e saserdote lo ta impuru te ora nochi sera.

⁸Esun ku ta kima e bishe muhe tambe mester laba su pananan den awa i bana su kurpa ku awa, i lo ta impuru te ora nochi sera.

⁹'Awor un homber ku ta limpi lo rekohe e shinishi di e bishe muhe i deposita esaki pafo di e kampamentu na un luga limpi, i e kongregashon di e yunan di Israel lo warda esaki komo awa pa kita impuresa; ta purifikashon for di pika.

¹⁰I esun ku a rekohe e shinishi di e bishe muhe mester laba su pananan i lo ta impuru te ora nochi sera; i esaki mester ta un statuto perpetuo pa e yunan di Israel i pa e stranhero ku ta keda biba pa un tempu meimei di nan.

¹¹'Esun ku mishi ku kadaver di kualke persona lo ta impuru pa shete dia.

¹²Esun ei mester purifika su mes for di impuresa ku e awa riba e di tres dia i riba e di shete dia; e ora ei e lo ta limpi; ma si e no purifika su mes riba e di tres dia i riba e di shete dia, e lo no ta limpi.

¹³Ken ku mishi ku un kadaver, kurpa di un hende ku a muri, i no purifika su mes, ta kontamina e tabernakel di SENOR; i e persona ei mester wordu korta kita for di Israel. Komo ku no a sprengu e awa di purifikashon riba dje, e lo ta impuru; ainda su impuresa ta riba dje.

¹⁴'Esaki ta e lei ora ku un hende muri den un tent: tur hende ku bin den e tent i tur hende ku ta den e tent lo ta impuru pa shete dia.

¹⁵I tur wea habri ku no tin tapadera mara riba dje lo ta impuru.

¹⁶'Tambe, ken ku den kunuku habri mishi ku un hende ku a wordu mata ku spada, of ku a muri un morto natural, of ku mishi ku wesu di hende, of ku graf, lo ta impuru pa shete dia.

¹⁷'E ora ei pa e hende impuru nan mester kohe un poko di e shinishi di e bishe ku a wordu kima pa purifikashon for di pika, i basha awa ku ta kore riba dje den un wea.

¹⁸I un persona limpi mester kohe hisop i dop esaki den e awa i sprengu esaki riba e tent i riba tur e artikulonan-di-uzo i riba e personanan ku tabata ayanan, i riba esun ku a mishi ku e wesu, of riba esun ku a wordu mata, of riba esun ku a muri un morto natural, of riba e graf.

¹⁹E ora ei e persona limpi mester sprengu esun impuru riba e di tres dia i riba e di shete dia; i riba e di shete dia e mester purifik'e di impuresa; i e mester laba su pananan i bana su kurpa den awa i lo ta limpi ora nochi sera.

²⁰Ma e homber ku ta impuru i no ta purifika su mes di impuresa, e persona ei mester wordu korta kita for di meimei di e asamblea, pasobra el a profana e santuario di SENOR; nan no a sprengu e awa di purifikashon riba dje, e ta impuru.

²¹Asina esaki mester ta un statuto perpetuo pa nan. 'I esun ku sprengu e awa di purifikashon mester laba su pananan, i esun ku mishi ku e awa di purifikashon lo ta impuru te ora nochi sera.

²²Ademas, tur loke e persona impuru mishi kune lo ta impuru, i e persona ku mishi kune lo ta impuru te ora nochi sera.'"