Read Papantla Totonac Numbernan 20 Bible Online

Numbernan 20 - Papantla Totonac bible

Numbernan 20

¹E ora ei e yunan di Israel, henter e kongregashon, a yega na e desierto di Zin, den e prome luna, i e pueblo a keda na Kades. Awor ayanan Miriam a muri i ayanan nan a der'e.

²I no tabatin awa pa e kongregashon, i konhuntamente nan a lanta kontra Moises i Aaron.

³Asina e pueblo a pleita ku Moises i a papia, bisando: "Mara nos tambe a perese dia nos rumannan a perese dilanti di SENOR!

⁴Pakiko anto bo a trese e asamblea di SENOR den e desierto aki pa nos i nos bestianan muri akinan?

⁵I pakiko bo a hasi nos sali for di Egipto pa trese nos den e luga malisimo aki? E no ta un luga di mainshi ni di figo ni di mata di wendruif ni di granatapel, ni no tin awa pa bebe tampoko."

⁶E ora ei Moises i Aaron a sali for di presensia di e asamblea bai na entrada di e tent di reunion, i a tira nan kurpa abou ku nan kara te na suela. Anto e gloria di SENOR a parese na nan.

⁷I SENOR a papia ku Moises, bisando:

⁸"Kohe e bara, i abo i bo ruman homber Aaron reuni e kongregashon i papia ku e baranka dilanti di nan bista, pa e baranka duna su awa. Asina lo bo hasi awa sali for di e baranka pa nan, i laga e kongregashon i nan bestianan bebe."

⁹Asina Moises a kohe e bara for di dilanti di SENOR, meskos ku El a orden'e.

¹⁰Anto Moises i Aaron a yama e asamblea huntu dilanti di e baranka. I Moises a bisa nan: "Skucha awor, boso rebeldenan; nos mester hasi awa sali for di e baranka aki pa boso?"

¹¹E ora ei Moises a hisa su man dal e baranka dos biaha ku su bara i a sali awa na abundansia, i e kongregashon i nan bestianan a bebe.

¹²Ma SENOR a bisa Moises i Aaron: "Pasobra boso no a kereMi pa santifikaMi den bista di e yunan di Israel, pesei boso lo no hiba e asamblea aki na e tera ku Mi a duna nan."

¹³Esei tabata e awanan di Meriba, pasobra e yunan di Israel a pleita ku SENOR, i El a mustra Su mes santu meimei di nan.

¹⁴E ora ei for di Kades Moises a manda mensaheronan serka rei di Edom, bisando: "Asina bo ruman Israel ta bisa: 'Bo sa di tur e kontratiempo ku nos a hana nos aden,

¹⁵ku nos tatanan a bai Egipto i nos a keda Egipto pa un tempu largu, i e egipsionan a trata malu ku nos i ku nos tatanan.

¹⁶Ma ora nos a sklama na SENOR, El a tende nos bos i a manda un Angel i a saka nos for di Egipto; ata awor, nos ta na Kades, un stat na frontera di bo teritorio.

¹⁷'Pa fabor, laga nos pasa dor di bo tera. Nos no ta bai pasa dor di kunuku ni dor di plantashon di wendruif; ni nos lo no bebe awa for di pos. Nos ta bai pasa pa e kaminda grandi di rei, sin bira na man drechi ni na man robes, te ora nos pasa bo teritorio.'"

¹⁸Sinembargo, Edom a bis'e: "Lo bo no pasa den nos teritorio, pa mi no sali ku spada kontra bo."

¹⁹Atrobe e yunan di Israel a bis'e: "Nos lo pasa pa e kaminda grandi, i si ami i mi bestianan bebe di bo awa, e ora ei lo mi paga pa esei. Solamente, permitimi pasa na pia, nada mas."

²⁰Ma el a bisa: "Lo bo no pasa." I Edom a sali kontra dje ku hopi hende i ku man fuerte.

²¹Asina Edom a nenga di laga Israel pasa den su teritorio; pesei Israel a bira bai lagu'e.

²²Awor ora nan a sali bai for di Kades, e yunan di Israel, esta, henter e kongregashon, a yega Seru Hor.

²³E ora ei SENOR a papia ku Moises i Aaron na Seru Hor, na frontera di tera di Edom, bisando:

²⁴"Aaron lo wordu reuni ku su pueblo, pasobra e lo no drenta e tera ku Mi a duna e yunan di Israel, pasobra boso a rebeldia kontra Mi ordu na e awanan di Meriba.

²⁵Tuma Aaron ku su yu homber Eleazar i hasi nan subi bai Seru Hor,

²⁶i kita Aaron su pananan, i bisti su yu homber Eleazar nan. Asina Aaron lo wordu reuni ku su pueblo i lo muri ayanan."

²⁷Asina Moises a hasi meskos ku SENOR a ordena, i nan a subi bai Seru Hor den bista di henter e kongregashon.

²⁸I despues ku Moises a kita Aaron su pananan bisti su yu homber Eleazar nan, Aaron a muri ayanan riba kabes di e seru. E ora ei Moises i Eleazar a baha for di e seru.

²⁹I ora henter e kongregashon a mira ku Aaron a muri, henter kas di Israel a yora Aaron trinta dia largu.