Read Papantla Totonac Numbernan 21 Bible Online

Numbernan 21 - Papantla Totonac bible

Numbernan 21

¹Ora ku e kananeo, rei di Arad, ku tabata biba den Negev, a tende ku Israel tabata bin pa kaminda di Atarim, el a bringa kontra Israel i a kohe algun di nan prezo.

²Asina Israel a hasi un promesa na SENOR i a bisa: "Si di berdat Bo kier entrega e pueblo aki den mi man, e ora ei lo mi destrui nan statnan kompletamente."

³I SENOR a tende e bos di Israel i a entrega e kananeonan; anto nan a destrui nan i nan statnan kompletamente. Asina nomber di e luga a wordu yama Horma.

⁴E ora ei nan a sali bai for di Seru Hor pa e kaminda di Laman Kora, pa pasa ront di tera di Edom; i e pueblo a perde pasenshi pa motibu di e biahe.

⁵I e pueblo a papia kontra Dios i kontra Moises: "Pakiko bo a saka nos for di Egipto pa muri den desierto? Pasobra no tin kuminda ni awa i nos tin asko di e kuminda miserabel aki."

⁶I SENOR a manda kolebra venenoso meimei di e pueblo i nan a morde e pueblo, asina ku hopi hende di Israel a muri.

⁷Asina e pueblo a bin serka Moises i a bisa: "Nos a peka, pasobra nos a papia kontra SENOR i kontra bo; hasi orashon na SENOR pa E kita e kolebranan for di nos." I Moises a hasi orashon pa e pueblo.

⁸E ora ei SENOR a bisa Moises: "Traha un kolebra venenoso i pon'e riba un staka; i lo sosode ku ken ku kolebra morde, ora ku e mira na e kolebra venenoso, e lo keda na bida."

⁹I Moises a traha un kolebra di brons i a pon'e riba e staka; i a sosode ku si un kolebra a morde un hende, ora ku el a mira na e kolebra di brons, el a keda na bida.

¹⁰Awor e yunan di Israel a sigui nan biahe i a kampa na Obot.

¹¹Nan a biaha di Obot i a kampa na Ije-abarim, den e desierto ku ta keda enfrente di Moab, parti pariba.

¹²For di einan nan a sali bai i a kampa den e vaye di Zered.

¹³For di einan nan a biaha i a kampa na e otro banda di Arnon, ku ta keda den e desierto ku ta kaba na frontera di e amoreonan, pasobra Arnon ta e frontera di Moab, entre Moab i e amoreonan.

¹⁴Pesei ta wordu bisa den e Buki di Gueranan di SENOR: "Waheb na Sufa, i e vayenan di Arnon,

¹⁵i e bahada di e vayenan ku ta ekstende te na e sitio di Ar, i ta len kontra e frontera di Moab."

¹⁶I for di einan nan a sigui pa Beer, ku ta e pos kaminda SENOR a bisa Moises: "Reuni e pueblo pa Mi duna nan awa."

¹⁷E ora ei Israel a kanta e kantika aki: "Brota, O pos! Kanta na dje!

¹⁸E pos ku e lidernan a koba, ku e nobelnan di e pueblo a bora, ku e septer i ku nan baranan." I for di e desierto nan a sigui pa Matana,

¹⁹i for di Matana pa Nahaliel, i for di Nahaliel pa Bamot,

²⁰i for di Bamot pa e vaye ku ta keda na tera di Moab, na kabes di e seru di Pisga ku ta mira ofer di e desierto.

²¹E ora ei Israel a manda mensaheronan serka Sehon, rei di e amoreonan, bisando:

²²"Lagami pasa dor di bo tera. Nos no ta kita bai den kunuku ni den plantashon di wendruif; nos no ta bebe awa for di pos. Nos ta bai pasa pa e kaminda grandi di rei, te ora nos a kaba di pasa dor di bo teritorio."

²³Ma Sehon no kier a permit! Israel pasa dor di su teritorio. Pesei Sehon a reuni henter su pueblo i a sali bai kontra Israel den e desierto, i a yega na Jahaza i a bringa kontra Israel.

²⁴E ora ei Israel a mat'e ku filo di spada i a podera di su tera for di Arnon te na Jabok, te na e yu hombernan di Amon; pasobra e frontera di e yu hombernan di Amon tabata fortifika.

²⁵I Israel a kohe tur e statnan aki i Israel a biba den tur stat di e amoreonan, den Hesbon i den tur su statnan chikitu.

²⁶Pasobra Hesbon tabata e stat di Sehon, rei di e amoreonan, ku a bringa kontra e rei anterior di Moab i ku a kita tur su tera for di dje, te na Arnon.

²⁷Pesei esnan ku ta papia den proverbio ta bisa: "Bin na Hesbon! Laga trah'e! Asina laga e stat di Sehon keda stables!.

²⁸"Pasobra a sali un kandela for di Hesbon, un flam for di e stat di Sehon; esei a kaba ku Ar di Moab, e senornan di e halturanan di Arnon.

²⁹Ai di bo, O Moab! Bo ta ruina, O pueblo di Kemos! El a duna su yu hombernan komo fugitivo, i su yu muhenan den koutiverio na Sehon, un rei amoreo.

³⁰"Ma nos a tumba nan; Hesbon a keda ruina te na Dibon. Nos a kaba ku nan te na Nofa, ku ta yega te Medeba."

³¹Asina Israel tabata biba na tera di e amoreonan.

³²I Moises a manda spiona Jazer, i nan a kaptura su statnan chikitu i a kore ku e amoreonan ku tabata einan.

³³E ora ei nan a bira subi e kaminda di Basan, i Og, rei di Basan, a sali bai ku henter su pueblo pa bataya na Edrei.

³⁴Ma SENOR a bisa Moises: "No tene miedu di dje, pasobra Mi a entregu'e den bo man, i henter su pueblo i su tera. Hasi kune manera bo a hasi ku Sehon, rei di e amoreonan, ku tabata biba na Hesbon."

³⁵Asina nan a mat'e i su yu hombernan i henter su pueblo, te ora ku no a ked'e ni un hende, i nan a podera di su tera.