Read Papantla Totonac Numbernan 22 Bible Online

Numbernan 22 - Papantla Totonac bible

Numbernan 22

¹E ora ei e yunan di Israel a sigui biaha i a kampa den e sabananan di Moab na e otro banda di Jordan, enfrente di Jeriko.

²Awor Balak, yu homber di Zipor, a mira tur loke Israel a hasi ku e amoreonan.

³Asina Moab tabatin masha miedu pa motibu di e pueblo, pasobra nan tabata masha hopi; i Moab tabata yen di miedu di e yunan di Israel.

⁴Anto Moab a bisa e ansianonan di Madian: "Awor e multitut aki lo kaba ku tur loke tin ront di nos, manera buey ta kaba ku yerba di sabana." I Balak, yu homber di Zipor, tabata rei di Moab e tempu ei.

⁵Pesei el a manda mensaheronan serka Balaam, yu homber di Beor, na Petor ku ta keda pega ku Riu Eufrates, na e tera di e yu hombernan di su pueblo, pa yam'e, bisando: "Mira, un pueblo a sali for di Egipto; mira, nan ta tapa superfisio di e tera, i nan ta biba enfrente di mi.

⁶Awor pesei, pa fabor bin, maldishona e pueblo aki pa mi, komo ku nan ta mas poderoso ku mi; kisas mi por derota nan i kore ku nan saka nan for di e tera. Pasobra mi sa ku esun ku bo bendishona ta bendishona, i esun ku bo maldishona ta maldishona."

⁷Asina e ansianonan di Moab i e ansianonan di Madian a bai ku e pago pa adivinashon den nan man, i nan a yega serka Balaam i a ripiti e palabranan di Balak p'e.

⁸Anto el a bisa nan: "Pasa nochi aki, i manera SENOR bisami lo mi trese palabra bek pa boso." I e lidernan di Moab a keda serka Balaam.

⁹E ora ei Dios a bin serka Balaam i a bisa: "Ta ken e hendenan aki ta ku ta serka bo?"

¹⁰I Balaam a bisa Dios: "Balak, yu homber di Zipor, rei di Moab, a manda bisami:

¹¹'Mira, tin un pueblo ku a sali for di Egipto i nan ta tapa superfisio di e tera; awor bin, maldishona nan pa mi; kisas mi por bringa kontra nan i kore ku nan saka nan afo.'"

¹²Anto Dios a bisa Balaam: "No bai ku nan; bo no mester maldishona e pueblo, pasobra nan ta bendishona."

¹³Asina Balaam a lanta mainta i a bisa Balak su lidernan: "Bai bek boso tera, pasobra SENOR a nenga di lagami bai ku boso."

¹⁴I e lidernan di Moab a lanta bai serka Balak i a bisa: "Balaam a nenga di bin ku nos."

¹⁵E ora ei Balak a bolbe manda lidernan, mas hopi i mas distingui ku esnan prome.

¹⁶I nan a yega serka Balaam i a bis'e: "Asina Balak, yu homber di Zipor, ta bisa: 'Mi ta rogabo, no laga nada strobabo di bin serka mi;

¹⁷pasobra di berdat lo mi onrabo grandemente i lo mi hasi tur loke bo bisami. Pa fabor, bin anto i maldishona e pueblo aki pa mi.'"

¹⁸I Balaam a kontesta i a bisa e sirbidonan di Balak: "Maske Balak lo a dunami su kas yen di plata i oro, lo mi no por a hasi nada, sea chikitu of grandi, kontrario di e ordu di SENOR mi Dios.

¹⁹Awor, pa fabor, boso tambe keda aki awe nochi, i lo mi hana sa kiko mas SENOR lo papia ku mi."

²⁰I Dios a bin serka Balaam den anochi i a bis'e: "Si e hombernan a bin pa yamabo, lanta bai ku nan, ma solamente e palabra ku Mi papia ku bo lo bo hasi."

²¹Asina Balaam a lanta su manise i a siya su buriku i a bai ku e lidernan di Moab.

²²Ma Dios tabata rabia pasobra el a bai, i e Angel di SENOR a bai para den kaminda komo un atversario kontra dje. Awor e tabata kore riba su buriku i su dos sirbidonan tabata huntu kune.

²³Ora ku e buriku a mira e Angel di SENOR para den kaminda ku den su man su spada saka for di balina, e buriku a kita for di kaminda bai den kunuku, ma Balaam a dal e buriku pa pon'e bai bek riba kaminda.

²⁴E ora ei e Angel di SENOR a bai para den un hanchi smal di e kunukunan di wendruif, ku muraya na e banda aki i muraya na e banda aya.

²⁵Ora ku e buriku a mira e Angel di SENOR, el a primi su mes kontra muraya i a primi Balaam su pia kontra muraya; pesei el a bolbe dal e buriku.

²⁶I e Angel di SENOR a bai mas leu i a bai para den un luga smal, kaminda no tabatin luga pa bira ni na man drechi ni na man robes.

²⁷Ora ku e buriku a mira e Angel di SENOR, el a kai drumi bou di Balaam; pesei Balaam a rabia i a dal e buriku ku palu.

²⁸I SENOR a habri boka di e buriku i e buriku a bisa Balaam: "Kiko mi a hasibo, ku bo a dal mi e tres biahanan aki?"

²⁹E ora ei Balaam a bisa e buriku: "Pasobra bo a hasi bofon di mi! Si mi tabatin un spada den mi man, lo mi a matabo awor aki."

³⁰I e buriku a bisa Balaam: "Mi no ta bo buriku ku bo a kore riba dje henter bo bida te dia djawe? Mi a yega di tin e kustumber di hasi asina ku bo?" I Balaam a bisa: "No."

³¹E ora ei SENOR a habri wowo di Balaam i el a mira e Angel di SENOR para den kaminda ku den Su man Su spada saka for di balina, i Balaam a buig te na suela.

³²I e Angel di SENOR a bis'e: "Pakiko bo a dal bo buriku e tres biahanan aki? Mira, Mi a sali komo un atversario, pasobra bo kaminda ta un kaminda perverso Mi dilanti.

³³Ma e buriku a miraMi i a kita pa Mi e tres biahanan aki. Si e no a kita pa Mi, siguramente lo Mi a matabo awor aki i laga e na bida."

³⁴I Balaam a bisa e Angel di SENOR: "Mi a peka, pasobra mi no tabata sa ku Bo tabata para riba kaminda kontra mi. I awor, si ta parse malu den Bo bista, lo mi bai bek."

³⁵Ma e Angel di SENOR a bisa Balaam: "Bai ku e hombernan, ma lo bo papia solamente e palabra ku Mi bisabo." I Balaam a bai huntu ku e lidernan di Balak.

³⁶Ora Balak a tende ku Balaam tabata bin, el a sali pa kontra kune na e stat di Moab ku ta keda na e frontera di Arnon, na e parti mas aleha di e frontera.

³⁷E ora ei Balak a bisa Balaam: "Mi no a manda yamabo urgentemente? Pakiko bo no a bin serka mi? Di berdat mi no ta kapas pa onrabo?"

³⁸Asina Balaam a bisa Balak: "Mira, awor mi a bin serka bo! Lo mi por bisa algu? E palabra ku Dios pone den mi boka, esei lo mi papia."

³⁹I Balaam a bai ku Balak, i nan a yega Kiriat-huzot.

⁴⁰I Balak a sakrifika buey i karne i a manda algun pa Balaam i e lidernan ku tabata huntu kune.

⁴¹I a sosode ku su manise Balak a hiba Balaam huntu kune na e luganan haltu di Baal; i for di einan el a mira un parti di e pueblo.