Read Papantla Totonac Numbernan 23 Bible Online

Numbernan 23 - Papantla Totonac bible

Numbernan 23

¹E ora ei Balaam a bisa Balak: "Traha shete altar pa mi akinan, i prepara shete bishe machu i shete karne chubatu pa mi akinan."

²I Balak a hasi meskos ku Balaam a bisa, i Balak ku Balaam a ofrese un bishe machu i un karne chubatu riba kada altar.

³E ora ei Balaam a bisa Balak: "Para banda di bo ofrenda kima, i ami lo bai. Kisas SENOR lo bin serka mi, i kiko ku E mustrami lo mi kontabo." Asina Balaam a bai na un seru pelon.

⁴Awor Dios a topa ku Balaam, i el a bisa Dios: "Mi a lanta e shete altarnan, i mi a ofrese un bishe machu i un karne chubatu riba kada altar."

⁵Anto SENOR a pone un palabra den Balaam su boka i a bisa: "Bolbe serka Balak i bo mester papia asina."

⁶Asina el a bolbe serka dje, i mira, e tabata para banda di su ofrenda kima, e ku tur e lidernan di Moab.

⁷I el a kuminsa su parabola i a bisa: "For di Aram Balak a tresemi, rei di Moab for di e serunan di Oriente: 'Bin maldishona Jakob pa mi, i bin, denunsia Israel!'

⁸Kon lo mi maldishona esun ku Dios no a maldishona? I kon mi por denunsia esun ku SENOR no a denunsia?

⁹Ora mi mir'e for di punta di e barankanan, i mi wak e for di e serunan, ata, un pueblo ku ta biba aparta, i ku lo no wordu konta entre e nashonnan.

¹⁰Ken por konta e stof di Jakob, of numera e di kuater parti di Israel? Lagami muri morto di hende hustu, i laga mi fin ta manera esun di dje!"

¹¹E ora ei Balak a bisa Balaam: "Kiko bo a hasi ku mi? Mi a buskabo pa maldishona mi enemigunan, ma mira, ta bendishona bo a bendishona nan!"

¹²I Balaam a kontesta i a bisa: "Mi no mester perkura di papia loke SENOR pone den mi boka?"

¹³E ora ei Balak a bis'e: "Pa fabor, ban ku mi na un otro luga for di unda bo por mira nan, ounke ku lo bo mira solamente un parti di nan i lo no mira tur di nan; i maldishona nan pa mi for di ayanan."

¹⁴Asina el a hib'e na e kunuku di Zofim, na e kabes di seru di Pisga i a traha shete altar i a ofrese un bishe machu i un karne chubatu riba kada altar.

¹⁵I el a bisa Balak: "Keda para aki banda di bo ofrenda kima, mientras ku ami mes ta bai kontra ku SENOR aya banda."

¹⁶E ora ei SENOR a topa ku Balaam i a pone un palabra den su boka i a bisa: "Bolbe serka Balak i asina bo mester papia."

¹⁷Anto el a bin serka dje, i mira, e tabata para banda di su ofrenda kima, i e lidernan di Moab huntu kune. I Balak a bis'e: "Kiko SENOR a bisa?"

¹⁸E ora ei el a kuminsa su parabola i a bisa: "Lanta, O Balak, i tende; skuchami, O yu homber di Zipor!

¹⁹Dios no ta hende, ku E lo gana, ni yu di hende, ku E lo repenti. Akaso El a bisa, i E lo no hasie? Of El a papia, i E lo no kumpli?

²⁰Mira, mi a risibi un ordu pa bendishona; ora ku El a bendishona, ami no por kambia esaki.

²¹"E no a mira inikidat den Jakob; ni E no a mira maldat den Israel; SENOR su Dios ta kune, i e gritu di un rei ta meimei di nan.

²²Dios ta saka nan for di Egipto; E ta pa nan manera e kachunan di buey di mondi.

²³Pasobra no tin pronostikashon kontra Jakob, ni no tin adivinashon kontra Israel. Na e tempu apropia lo wordu bisa na Jakob i na Israel kiko Dios a hasi.

²⁴Mira, un pueblo ta lanta manera leon muhe, i manera leon e ta lanta para; e lo no kai drumi te ora ku e devora e proi, i bebe sanger di esnan ku a wordu mata."

²⁵E ora ei Balak a bisa Balaam: "No maldishona nan di ningun manera, ni bendishona nan di ningun manera!"

²⁶Ma Balaam a kontesta i a bisa Balak: "Mi no a bisabo: 'Kiko ku SENOR papia, ta esei mi mester hasi'?"

²⁷E ora ei Balak a bisa Balaam: "Pa fabor, bin, lo mi hibabo na un otro luga; kisas lo agrada Dios pa bo maldishona nan pa mi for di ayanan."

²⁸Asina Balak a hiba Balaam na e kabes di seru di Peor ku ta mira ofer di e desierto.

²⁹I Balaam a bisa Balak: "Traha shete altar pa mi akinan i prepara shete bishe machu i shete karne chubatu pa mi akinan."

³⁰I Balak a hasi meskos ku Balaam a bisa, i a ofrese un bishe machu i un karne chubatu riba kada altar.