Read Papantla Totonac Numbernan 24 Bible Online

Numbernan 24 - Papantla Totonac bible

Numbernan 24

¹Ora Balaam a mira ku tabata agrada SENOR pa bendishona Israel, e no a bai manera otro biahanan pa buska pronostikashon, ma el a bira su kara den direkshon di e desierto.

²I Balaam a hisa kara i a mira Israel ta kampa, un tribu banda di otro; i e Spiritu di Dios a bin riba dje.

³Anto el a kuminsa su parabola i a bisa: "Profesia di Balaam, yu homber di Beor, i profesia di e homber, kende su wowo ta habri;

⁴profesia di esun ku ta tende e palabranan di Dios, ku ta mira e vishon di e Todopoderoso, ku ta kai abou ku wowo hanchu habri.

⁵"Ki bunita bo tentnan ta, O Jakob, bo luganan di biba, O Israel!

⁶"Manera vayenan ku ta ekstende nan mes, manera hofinan kantu di riu, manera aloe ku SENOR a planta, manera palunan di seda kantu di e awanan.

⁷Awa lo basha for di su hemchinan, i su simia lo ta banda di hopi awanan. "Su rei lo ta mas halsa ku Agag, i su reino lo wordu engrandesi.

⁸"Dios ta sak'e for di Egipto, E ta p'e manera e kachunan di buey di mondi. E lo devora e nashonnan ku ta su atversarionan, i lo garna nan wesunan na pida-pida, i traspasa nan ku su flechanan.

⁹E ta dobla su kurpa, e ta kai drumi abou manera leon, i manera leon, ken ta tribi lant'e? "Bendishona ta tur hende ku bendishonabo, i maldishona ta tur hende ku maldishonabo."

¹⁰E ora ei Balak su rabia a kima kontra Balaam, i el a dal su mannan den otro; i Balak a bisa Balaam: "Mi a yamabo pa maldishona mi enemigunan, ma mira, bo a bendishona nan e tres biahanan aki!

¹¹Pesei, hui bai bo luga awor. Mi a bisa ku lo mi onrabo grandemente, ma mira, ta SENOR a strobabo di hana onor."

¹²I Balaam a bisa Balak: "Mi no a bisa bo mensaheronan ku bo a manda serka mi:

¹³'Maske Balak kier a dunami su kas yen di plata i oro, di mi mes lo mi no por a hasi nada kontrario di e ordu di SENOR, sea bon of malu; loke SENOR papia, ta esei mi ta papia'. No t'asina mi a bisa bo mensaheronan?

¹⁴I awor, mira, mi ta bai serka mi pueblo; bin, i lo mi indikabo loke e pueblo aki lo hasi ku bo pueblo den e dianan ku ta bin."

¹⁵Anto el a kuminsa su parabola i a bisa: "Profesia di Balaam, yu homber di Beor, i profesia di e homber, kende su wowo ta habri;

¹⁶profesia di esun ku ta tende e palabranan di Dios, i ku konose e konosementu di e Haltisimo, ku ta mira e vishon di e Todopoderoso, ku ta kai abou ku wowo hanchu habri.

¹⁷"Mi ta mir'e, ma no awor; mi ta wak e, ma no di serka. Un strea lo sali for di Jakob, i un septer lo lanta for di Israel, i lo plecha frenta di Moab i basha tur e yu hombernan di Set abou.

¹⁸I Edom lo bira un poseshon; Seir, su enemigunan, tambe lo bira un poseshon, mientras ku Israel ta demostra forsa.

¹⁹Un for di Jakob lo tin dominio, i lo destrui e restante for di e stat."

²⁰I el a wak Amalek, i a sigui su parabola i a bisa: "Amalek tabata esun di prome di e nashonnan, ma su fin lo ta destrukshon."

²¹I el a wak e keneonan, i a sigui su parabola i a bisa: "Bo luga di biba ta duradero, i bo neishi ta poni den baranka.

²²Sinembargo, Kain lo kaba na nada; kuantu tempu mas Asur lo tene boso katibu?"

²³I el a sigui su parabola i a bisa: "Ai, ken por biba ora Dios hasi esaki?

²⁴Ma barkunan lo bin for di kosta di Kitim, i nan lo afligi Asur i lo afligi Heber; asina nan tambe lo yega na destrukshon."

²⁵Anto Balaam a lanta bai i a bolbe na su luga, i Balak tambe a kohe su kaminda bai.