Read Papantla Totonac Numbernan 28 Bible Online

Numbernan 28 - Papantla Totonac bible

Numbernan 28

¹E ora ei SENOR a papia ku Moises, bisando:

²"Ordena e yunan di Israel i bisa nan: 'Perkura pa boso presenta na Mi, na e tempu stipula, Mi ofrenda, Mi kuminda pa Mi ofrendanan di kandela, komo un holo dushi pa Mi.'

³I bisa nan: 'Esaki ta e ofrenda di kandela ku boso mester ofrese na SENOR: dos lamchi machu sin defekto, di un ana, tur dia komo un ofrenda kima kontinuo.

⁴Ofrese esun lamchi mainta, i e otro lamchi lo bo ofrese ora solo a baha, prome ku bira skur;

⁵tambe un desimo parti di un efa di harina fini komo un ofrenda di mainshi, meskla ku un di kuater parti di un hin di zeta bati.

⁶Ta un ofrenda kima kontinuo ku a wordu ordena riba Seru Sinai komo un holo dushi, un ofrenda di kandela na SENOR.

⁷Anto e ofrenda di bibida huntu kune mester ta un di kuater parti di un hin pa kada lamchi; den e luga santu bo mester drama un ofrenda di bibida sterki na SENOR.

⁸I ofrese e otro lamchi ora solo a baha, prome ku bira skur; manera e ofrenda di mainshi di mainta i manera su ofrenda di bibida bo mester ofres'e, un ofrenda di kandela, un holo dushi na SENOR.

⁹'Anto riba dia di sabat dos lamchi machu sin defekto di un ana, i dos desimo parti di un efa di harina fini meskla ku zeta komo un ofrenda di mainshi, huntu ku su ofrenda di bibida.

¹⁰Esaki ta e ofrenda kima di kada sabat, ademas di e ofrenda kima kontinuo i su ofrenda di bibida.

¹¹'Na kuminsamentu di kada un di boso lunanan, boso mester presenta un ofrenda kima na SENOR: dos bishe machu, un karne chubatu, shete lamchi machu sin defekto, di un ana,

¹²i tres desimo parti di un efa di harina fini komo un ofrenda di mainshi, meskla ku zeta, pa kada bishe machu; i dos desimo parti di harina fini komo un ofrenda di mainshi, meskla ku zeta, pa esun karne chubatu;

¹³i un desimo parti di un efa di harina fini meskla ku zeta komo un ofrenda di mainshi pa kada lamchi, komo un ofrenda kima di un holo dushi, un ofrenda di kandela na SENOR.

¹⁴I nan ofrendanan di bibida mester ta mitar hin di bina pa un bishe machu, un di tres parti di un di kuater parti di un hin pa e karne chubatu i un di kuater parti di un hin pa un lamchi; esaki ta e ofrenda kima di kada luna, pa tur e lunanan di ana.

¹⁵I mester ofrese un kabritu chubatu komo un ofrenda pa pika na SENOR; mester ofrese esaki huntu ku su ofrenda di bibida, ademas di e ofrenda kima kontinuo.

¹⁶'Anto riba e di dieskuater dia di e prome luna mester tene e Pasku di SENOR.

¹⁷I riba e di diesinku dia di e luna aki mester tene un fiesta; pa shete dia mester kome pan sin zurdeg.

¹⁸Riba e prome dia mester tene un konvokashon santu; boso no mester hasi ningun trabou pisa.

¹⁹I presenta un ofrenda di kandela, un ofrenda kima na SENOR: dos bishe machu, un karne chubatu i shete lamchi machu di un ana, sin defekto.

²⁰I pa nan ofrenda di mainshi boso mester ofrese harina fini meskla ku zeta: tres desimo parti di un efa pa un bishe machu i dos desimo parti pa e karne chubatu.

²¹Un desimo parti di un efa boso mester ofrese pa kada un di e shete lamchinan,

²²i un kabritu chubatu komo ofrenda pa pika, pa hasi ekspiashon pa boso.

²³Presenta esakinan, ademas di e ofrenda kima di mainta ku ta pa e ofrenda kima kontinuo.

²⁴Presenta di e manera aki tur dia, durante di shete dia, e kuminda di e ofrenda di kandela komo un holo dushi na SENOR; esaki mester wordu presenta huntu ku su ofrenda di bibida, ademas di e ofrenda kima kontinuo.

²⁵I tene un konvokashon santu riba e di shete dia; no hasi ningun trabou pisa.

²⁶'Ademas, riba e dia di e prome frutanan, ora boso presenta un ofrenda di mainshi nobo na SENOR durante di boso Fiesta di Simannan, boso mester tene un konvokashon santu; no hasi ningun trabou pisa.

²⁷I ofrese un ofrenda kima komo un holo dushi na SENOR: dos bishe machu, un karne chubatu, shete lamchi machu di un ana,

²⁸i nan ofrenda di mainshi: harina fini meskla ku zeta, tres desimo parti di un efa pa kada bishe machu, dos desimo parti pa esun karne chubatu,

²⁹un desimo parti pa kada un di e shete lamchinan,

³⁰un kabritu chubatu pa hasi ekspiashon pa boso.

³¹Ademas di e ofrenda kima kontinuo i su ofrenda di mainshi, presenta esakinan huntu ku nan ofrendanan di bibida. Nan mester ta sin defekto.