Read Papantla Totonac Numbernan 3 Bible Online

Numbernan 3 - Papantla Totonac bible

Numbernan 3

¹Awor esakinan ta e generashonnan di Aaron ku Moises, na e tempu ku SENOR a papia ku Moises riba Seru Sinai.

²Esakinan anto ta e nombernan di e yu hombernan di Aaron: Nadab e primogenito, i Abiu, Eleazar ku Itamar.

³Esakinan ta e nombernan di e yu hombernan di Aaron, e saserdotenan ungi, ku el a konsagra pa sirbi komo saserdote.

⁴Ma Nadab i Abiu a muri dilanti di SENOR dia ku nan a ofrese kandela strano dilanti di SENOR den e desierto di Sinai; i nan no tabatin yu. Asina Eleazar ku Itamar tabata sirbi komo saserdote durante di bida di nan tata Aaron.

⁵E ora ei SENOR a papia ku Moises, bisando:

⁶"Laga e tribu di Levi yega serka i pone nan dilanti di saserdote Aaron, pa nan sirbie.

⁷I nan mester kumpli ku e responsabilidatnan pa ku Aaron i pa ku henter e kongregashon dilanti di e tent di reunion, pa hasi e sirbishi di e tabernakel.

⁸Tambe nan mester perkura pa tur e artikulonan-di-uzo di e tent di reunion i pa e responsabilidatnan di e yunan di Israel, pa hasi e sirbishi di e tabernakel.

⁹Asina bo mester duna e levitanan na Aaron i na su yu hombernan; nan ta henteramente duna na dje for di entre e yunan di Israel.

¹⁰I nombra Aaron ku su yu hombernan pa nan eherse nan saserdosio, ma e stranhero ku yega serka mester wordu mata."

¹¹SENOR a bolbe papia ku Moises, bisando:

¹²"Awor mira, Mi a tuma e levitanan for di entre e yunan di Israel na luga di kada primogenito, esun ku ta habri matris entre e yunan di Israel. E levitanan mester ta di Mi,

¹³pasobra tur e primogenitonan ta di Mi; riba e dia ku Mi a mata tur e primogenitonan na tera di Egipto, Mi a santifika pa Mi mes tur e primogenitonan den Israel, tantu di hende komo di bestia. Nan mester ta di Mi; Ami ta SENOR."

¹⁴E ora ei SENOR a papia ku Moises den e desierto di Sinai, bisando:

¹⁵"Konta e yu hombernan di Lev segun e hendenan di e kasnan di nan tatanan, segun nan famianan; tur hende homber for di un luna p'ariba bo mester konta."

¹⁶Asina Moises a konta nan konforme e palabra di SENOR, meskos ku el a wordu ordena.

¹⁷Esakinan anto ta e yu hombernan di Levi segun nan nombernan: Gerson, Koat i Merari.

¹⁸I esakinan ta e nombernan di e yu hombernan di Gerson segun nan famianan: Libni i Simei;

¹⁹i e yu hombernan di Koat segun nan famianan: Amram i Izhar, Hebron i Uziel;

²⁰i e yu hombernan di Merari segun nan famianan: Mahli i Musi. Esakinan ta e famianan di e levitanan segun e hendenan di e kasnan di nan tatanan.

²¹Di Gerson tabata e famia di e libnitanan i e famia di e simeitanan; esakinan tabata e famianan di e gersonitanan.

²²Nan hombernan konta, den e kontamentu di tur hende homber for di un luna p'ariba, nan hombernan konta tabata 7.500.

²³E famianan di e gersonitanan mester a kampa tras di e tabernakel parti pabou,

²⁴i lider di e hendenan di e kasnan di e tatanan di e gersonitanan tabata Eliasaf, yu homber di Lael.

²⁵Awor e responsabilidatnan di e yu hombernan di Gerson den e tent di reunion tabata inklm e tabernakel i e tent, su kapa i e skerm pa entrada di e tent di reunion,

²⁶i e kortinanan di e plenchi, e skerm pa entrada di e plenchi ku tin tur ront di e tabernakel i e altar, i su kordonnan, konforme henter e sirbishi relashona ku nan.

²⁷I di Koat tabata e famia di e amramitanan, e famia di e izharitanan, e famia di e hebronitanan i e famia di e uzielitanan; esakinan tabata e famianan di e koatitanan.

²⁸Den e kontamentu di tur hende homber, for di un luna p'ariba, tabatin 8.600 ku tabata kumpli ku e responsabilidatnan di e santuario.

²⁹E famianan di e yu hombernan di Koat mester a kampa na e banda ku ta keda pasuit di e tabernakel,

³⁰i lider di e hendenan di e kasnan di e tatanan di e famianan di e koatitanan tabata Elizafan, yu homber di Uziel.

³¹Awor nan responsabilidatnan tabata inklm e arka, e mesa, e kandela, e altarnan, e artikulonan-di-uzo di e santuario, ku kualnan nan ta sirbi, e skerm, i henter e sirbishi relashona ku nan;

³²i Eleazar, yu homber di saserdote Aaron, tabata hefe di e lidernan di Levi, i tabatin enkargo di esnan ku tabata kumpli ku e responsabilidatnan di e santuario.

³³Di Merari tabata e famia di e malitanan i e famia di e musitanan; esakinan tabata e famianan di Merari.

³⁴Nan hombernan konta den e kontamentu di tur hende homber, for di un luna p'ariba, tabata 6.200.

³⁵I lider di e hendenan di e kasnan di e tatanan di e famianan di Merari tabata Zuriel, yu homber di Abihail. Nan mester a kampa na e banda ku ta keda panort di e tabernakel.

³⁶Awor e responsabilidatnan stipula di e yu hombernan di Merari tabata inklm e tablanan di e tabernakel, su baranan, su pilarnan, su pianan, tur su ekipo i e sirbishi relashona ku nan,

³⁷i e pilarnan tur ront di e plenchi, ku nan pianan, nan stakanan i nan kordonnan.

³⁸Awor esnan ku mester a kampa dilanti di e tabernakel parti pariba, dilanti di e tent di reunion, den direkshon di kaminda solo ta sali, ta Moises i Aaron ku su yu hombernan, kendenan tabata kumpli ku e responsabilidatnan di e santuario pa parti di e yunan di Israel; ma e stranhero ku yega serka mester a wordu mata.

³⁹Tur e hombernan konta di e levitanan, ku Moises i Aaron a konta riba ordu di SENOR segun nan famianan, tur hende homber, for di un luna p'ariba, tabata 22.000.

⁴⁰E ora ei SENOR a bisa Moises: "Konta tur yu homber primogenito di e yunan di Israel, for di un luna p'ariba, i traha un lista di nan nombernan.

⁴¹I bo mester tuma e levitanan pa Mi, Ami ta SENOR, na luga di tur e primogenitonan entre e yunan di Israel, i e bakanan di e levitanan na luga di tur e primogenitonan entre e bakanan di e yunan di Israel."

⁴²Asina Moises a konta tur e primogenitonan entre e yunan di Israel, meskos ku SENOR a orden'e;

⁴³i tur e hende hombernan primogenito segun e kantidat di nomber, for di un luna p'ariba, pasobra nan hombernan konta tabata 22.273.

⁴⁴E ora ei SENOR a papia ku Moises, bisando:

⁴⁵"Tuma e levitanan na luga di tur e primogenitonan entre e yunan di Israel, i e bakanan di e levitanan. I e levitanan mester ta di Mi; Ami ta SENOR.

⁴⁶I pa e reskate di e 273 di e primogenitonan di e yunan di Israel, ku ta surpasa e kantidat di e levitanan,

⁴⁷bo mester tuma sinku siklo pa kada un; segun e siklo di e santuario bo mester tuma nan (e siklo ta binti gera),

⁴⁸i duna e plaka, e reskate di esnan ku ta surpasa e kantidat di e levitanan, na Aaron ku su yu hombernan."

⁴⁹Asina Moises a tuma e plaka di reskate for di esnan ku a surpasa e kantidat di esnan ku e levitanan a reskata;

⁵⁰for di e primogenitonan di e yunan di Israel el a tuma e plaka konforme e siklo di e santuario, 1.365.

⁵¹E ora ei Moises a duna Aaron ku su yu hombernan e plaka di reskate, konforme e ordu di SENOR, meskos ku SENOR a ordena Moises.