Read Papantla Totonac Numbernan 30 Bible Online

Numbernan 30 - Papantla Totonac bible

Numbernan 30

¹E ora ei Moises a papia ku e kabesantenan di e tribunan di e yunan di Israel, bisando: "Esaki ta loke SENOR a ordena.

²Ora ku un homber hasi un promesa na SENOR, of hasi un huramentu, asina ku e ta mara su mes na un obligashon, e no mester kibra su palabra; e mester hasi konforme tur loke sali for di su boka.

³"Tambe ora ku un muhe hasi un promesa na SENOR, i mara su mes na un obligashon den kas di su tata durante di su hubentut,

⁴i su tata tende su promesa i su obligashon na kual el a mara su mes, i su tata no bis'e nada, e ora ei tur su promesanan lo ta valido, i kada obligashon na kual el a mara su mes, lo ta valido.

⁵Ma si su tata tah'e riba e dia ku e tende esaki, ningun di su promesanan of su obligashonnan na kual el a mara su mes lo no ta valido; i SENOR lo pordon'e, pasobra su tata a tah'e.

⁶"Sinembargo, si e kasa mientras ku e ta mara na su promesanan, of na loke ku el a pronunsia ku su lepnan, i na kual el a mara su mes,

⁷i su esposo tende di esaki, i no bis'e nada dia ku e tende esaki, e ora ei e promesa di e muhe lo ta valido i su obligashonnan na kual el a mara su mes lo ta valido.

⁸Ma si dia ku su esposo tende di esaki, e tah'e, e ora ei e esposo mester anula e promesa ku e muhe a hasi i loke ku el a pronunsia ku su lepnan, i na kual el a mara su mes; i SENOR lo pordon'e.

⁹"Ma promesa di un biuda of di un muhe diborsia, tur loke ku el a mara su mes na dje, lo ta valido kontra dje.

¹⁰"Sinembargo, si el a hasi un promesa den kas di su esposo, of a mara su mes na un obligashon bou di huramentu,

¹¹i su esposo a tende esaki, ma no a bis'e nada i no a tah'e, e ora ei tur promesa di e muhe lo ta valido, i tur obligashon na kual el a mara su mes lo ta valido.

¹²Ma si di berdat su esposo anula nan dia ku e tende nan, e ora ei tur loke ku sali for di su boka tokante di su promesanan of tokante di e obligashon di su persona lo no ta valido; su esposo a anula nan i SENOR lo pordon'e.

¹³Tur promesa i tur huramentu ku ta obligu'e pa umiya su mes, su esposo por konfirma of su esposo por anula.

¹⁴Ma si di berdat dia tras dia su esposo no bis'e nada, e ora ei e ta konfirma tur e promesanan of tur e obligashonnan ku e muhe tin riba dje; e esposo a konfirma nan, pasobra e no a bis'e nada dia ku el a tende nan.

¹⁵Ma si di berdat e anula nan despues ku el a tende nan, e ora ei e mester karga kulpa di su esposa."

¹⁶Esakinan ta e statutonan ku SENOR a ordena Moises relashona ku un homber i su esposa, i relashona ku un tata i su yu muhe, durante di su hubentut den kas di su tata.