Read Papantla Totonac Numbernan 34 Bible Online

Numbernan 34 - Papantla Totonac bible

Numbernan 34

¹E ora ei SENOR a papia ku Moises, bisando:

²"Ordena e yunan di Israel i bisa nan: 'Ora boso drenta tera di Kanaan, esaki ta e tera ku boso lo hana komo erensia, esta, tera di Kanaan, segun su fronteranan.

³'Boso parti pasuit lo ekstende for di e desierto di Zin, banda di Edom, i boso frontera pasuit lo ekstende for di kaminda Laman Salu ta kaba, den direkshon pariba.

⁴E ora ei boso frontera lo bira for di suit bai te na e subida di Akrabim, sigui bai Zin, i lo termina pasuit di Kades-barnea, i lo yega te na Hazar-adar, sigui bai Asmon.

⁵I e frontera lo bira for di Asmon bai na e riu di Egipto i termina na laman.

⁶'Pa loke ta e frontera pabou, boso lo tin Laman Grandi komo frontera; esaki lo ta boso frontera pabou.

⁷'I esaki lo ta boso frontera panort: boso mester hala boso lina di frontera for di Laman Grandi te na Seru Hor.

⁸I hala un lina for di Seru Hor te na e entrada di Hamat i e frontera lo termina na Zedad;

⁹i e frontera lo yega te na Zifron i termina na Hazar-enan. Esaki lo ta boso frontera panort.

¹⁰'Pa boso frontera pariba boso mester hala un lina for di Hazar-enan te na Sefam,

¹¹i e frontera lo baha bai di Sefam te na Ribla banda pariba di Ain; i e frontera lo baha i yega na e bahada banda pariba di Laman Kineret.

¹²I e frontera lo baha bai na Jordan i termina na Laman Salu. 'Esaki lo ta boso tera, konforme su fronteranan tur ront.'"

¹³Asina Moises a ordena e yunan di Israel, bisando: "Esaki ta e tera ku boso mester parti pa medio di lot entre boso komo un propiedat ku SENOR a ordena pa duna e nuebe tribunan i mitar.

¹⁴Pasobra e tribu di e yu hombernan di Ruben a risibi esun di nan, segun e hendenan di e kasnan di nan tatanan, i e tribu di e yu hombernan di Gad, segun e hendenan di e kasnan di nan tatanan, i e mitar tribu di Manases a risibi nan propiedat.

¹⁵E dos tribunan i mitar a risibi nan propiedat na e otro banda di Jordan enfrente di Jeriko, bai pariba, den direkshon di kaminda solo ta sali."

¹⁶E ora ei SENOR a papia ku Moises, bisando:

¹⁷"Esakinan ta e nombernan di e hombernan ku mester parti e tera pa boso komo erensia: saserdote Eleazar i Josue, yu homber di Nun.

¹⁸I tuma un lider di kada tribu pa parti e tera komo erensia.

¹⁹I esakinan ta e nombernan di e hombernan: di e tribu di Juda, Kaleb, yu homber di Jefone.

²⁰I di e tribu di e yu hombernan di Simeon, Semuel, yu homber di Amiud.

²¹Di e tribu di Benjamin, Elidad, yu homber di Kislon.

²²I di e tribu di e yu hombernan di Dan un lider, Buki, yu homber di Jogli.

²³Di e yu hombernan di Jose: di e tribu di e yu hombernan di Manases un lider, Haniel, yu homber di Efod.

²⁴I di e tribu di e yu hombernan di Efrain un lider, Kemuel, yu homber di Siftan.

²⁵I di e tribu di e yu hombernan di Zabulon un lider, Elizafan, yu homber di Parnak.

²⁶I di e tribu di e yu hombernan di Isakar un lider, Paltiel, yu homber di Azan.

²⁷I di e tribu di e yu hombernan di Aser un lider, Ahiud, yu homber di Selomi.

²⁸I di e tribu di e yu hombernan di Neftali un lider, Pedael, yu homber di Amiud."

²⁹Esakinan ta esnan ku SENOR a ordena pa parti e erensia pa e yunan di Israel na tera di Kanaan.