Read Papantla Totonac Numbernan 35 Bible Online

Numbernan 35 - Papantla Totonac bible

Numbernan 35

¹Awor SENOR a papia ku Moises den e sabananan di Moab banda di Jordan, enfrente di Jeriko, bisando:

²"Ordena e yunan di Israel pa nan duna e levitanan statnan pa biba aden for di e erensia di nan propiedat; i duna e levitanan luganan di yerba berde ront di e statnan.

³I e statnan lo ta di nan pa biba aden; i nan luganan di yerba berde lo ta pa nan bakanan, pa nan karnenan i pa tur nan otro bestianan.

⁴"I e luganan di yerba berde di e statnan ku boso lo duna e levitanan lo ekstende di e muraya di stat parti pafo, mil kodo tur ront.

⁵Tambe boso mester midi pafo di e stat banda pariba, dos mil kodo, i banda pasuit, dos mil kodo, i banda pabou, dos mil kodo, i banda panort, dos mil kodo, ku e stat meimei. Esaki lo bira di nan komo luganan di yerba berde pa e statnan.

⁶"I e statnan ku boso mester duna e levitanan lo ta e seis statnan di refugio, ku boso mester duna pa e matado hui bai na dje; ademas di eseinan boso mester duna nan kuarent'i dos stat.

⁷Boso mester duna e levitanan kuarent'i ocho stat na tur, huntu ku nan luganan di yerba berde.

⁸Pa loke ta e statnan ku boso mester duna for di e propiedat di e yunan di Israel: tuma hopi for di e propiedat mas grandi, ma tuma poko for di esun mas chikitu; kada un mester duna e levitanan algun di su statnan, konforme su propiedat ku e ta ereda."

⁹E ora ei SENOR a papia ku Moises, bisando:

¹⁰"Papia ku e yunan di Israel i bisa nan: 'Ora boso krusa Jordan bai tera di Kanaan,

¹¹boso mester skohe statnan pa boso mes pa ta boso statnan di refugio, pa e matado ku a mata kualke persona no intenshonalmente por hui bai ayanan.

¹²I e statnan lo ta pa boso komo un refugio for di e vengado, pa e matado no muri prome ku e para dilanti di e kongregashon pa wordu huzga.

¹³I e statnan ku boso mester duna lo ta boso seis statnan di refugio.

¹⁴Duna tres stat na e otro banda di Jordan i tres stat na tera di Kanaan; nan mester ta statnan di refugio.

¹⁵E seis statnan aki lo sirbi komo refugio pa e yunan di Israel, i pa e stranhero i pa esun ku ta keda biba pa un tempu meimei di nan; pa ken ku mata un persona no intenshonalmente por hui bai ayanan.

¹⁶'Ma si el a dal e persona ku un opheto di heru, asina ku el a muri, e ta un matado; e matado mester wordu mata sigur.

¹⁷I si el a dal e ku un piedra den man, pa medio di kual un hende lo por a muri, i di berdat e hende ta muri, e ta un matado; e matado mester wordu mata sigur.

¹⁸Of si el a dal e ku un opheto di palu den man ku por mat'e, i komo resultado el a muri, e ta un matado; e matado mester wordu mata sigur.

¹⁹E vengado di sanger mes lo mata e matado; e mester mat'e ora ku e kontra kune.

²⁰I si pa odio el a push'e, of a bai skonde pa tir'e ku algu, i komo resultado el a muri,

²¹of si pa enemistat el a dal e ku su man i komo resultado e persona a muri, esun ku a dal e mester wordu mata sigur, e ta un matado; e vengado di sanger lo mata e matado ora ku e kontra kune.

²²'Ma si inespera el a push'e, sin enemistat, of sin bai skonde a tir'e ku algu,

²³of ku kualke opheto di piedra ku por a mat'e, i sin ku el a mira e opheto kai riba e persona, asina ku el a muri, mientras ku e no tabata su enemigu ni tabata kier a hasie dano,

²⁴e ora ei e kongregashon mester huzga entre e matado i e vengado di sanger konforme e ordenansanan aki.

²⁵I e kongregashon mester libra e matado for di man di e vengado di sanger, i hasie bolbe na su stat di refugio ku el a hui bai na dje; i e mester keda biba ayanan te na morto di e sumosaserdote ku a wordu ungi ku e zeta santu.

²⁶'Ma si un dia e matado biaha bai pafo di frontera di su stat di refugio ku e por hui bai na dje,

²⁷i e vengado di sanger han'e pafo di frontera di su stat di refugio, i e vengado di sanger mata e matado, e lo no tin kulpa di sanger,

²⁸pasobra e matado mester a keda den su stat di refugio te na morto di e sumosaserdote. Ma despues di morto di e sumosaserdote e matado mag bolbe na e tera di su propiedat.

²⁹'I e kosnan aki mester sirbi komo un ordenansa di derecho pa boso durante di tur boso generashonnan den tur boso luganan di biba.

³⁰'Ken ku mata un hende mester wordu mata segun deklarashon di testigunan, ma ni un persona no mester wordu mata riba testimonio di un testigu so.

³¹'Ademas, no tuma plaka di reskate pa bida di un matado ku merese morto. Ma mester laga mat'e sigur.

³²'I no tuma plaka di reskate pa esun ku a hui bai na su stat di refugio, pa e bolbe bin biba na e tera prome ku morto di e saserdote.

³³'No kontamina e tera ku boso ta den; pasobra sanger ta kontamina e tera, i no por hasi ekspiashon pa e tera relashona ku e sanger ku a wordu drama den dje, ku solamente pa medio di sanger di esun ku a drama esaki.

³⁴I no kontamina e tera ku boso ta biba aden, meimei di kual Ami ta biba, pasobra Ami, SENOR, ta biba meimei di e yunan di Israel.'"