Read Papantla Totonac Numbernan 4 Bible Online

Numbernan 4 - Papantla Totonac bible

Numbernan 4

¹E ora ei SENOR a papia ku Moises i Aaron, bisando:

²"Tuma un senso di e desendientenan di Koat for di entre e yu hombernan di Levi, segun nan famianan, segun e hendenan di e kasnan di nan tatanan,

³for di trinta ana p'ariba, te ku sinkuenta ana, tur ku ta drenta sirbishi pa hasi e trabou den e tent di reunion.

⁴"Esaki ta e trabou di e desendientenan di Koat den e tent di reunion, tokante di e kosnan masha santu mes.

⁵Ora ku e kampamentu ta sali bai, Aaron ku su yu hombernan mester bai paden i nan mester baha e velo di e skerm i tapa e arka di testimonio kune;

⁶i nan mester pone un kapa di kueru di dolfein riba dje, i habri riba dje un pana tur blou, i pasa su baranan na dje.

⁷"Riba e mesa di e pan di e Presensia nan mester habri un pana blou tambe i pone riba dje e tayonan, e kucharanan, e komchinan di ofrese sakrifisio i e kanikanan pa e ofrenda di bibida, i e pan ku mester ta kontinuamente riba dje.

⁸I riba esakinan nan mester habri un pana skarlata, i tapa esaki ku un kapa di kueru di dolfein, i pasa su baranan na dje.

⁹"E ora ei nan mester kohe un pana blou i tapa e kandela pa e lus, huntu ku su lampinan i su kosnan-pa-paga-lampi, su skalchinan i tur su artikulonan-di-uzo pa e zeta ku nan ta uza pa sirbie kune;

¹⁰i nan mester pon'e i tur su artikulonan-di-uzo den un kapa di kueru di dolfein, i pone esaki riba e baranan pa kargu'e kune.

¹¹"I ofer di e altar di oro nan mester habri un pana blou i tapa esaki ku un kapa di kueru di dolfein, i pasa su baranan na dje.

¹²"I nan mester kohe tur e artikulonan-di-uzo di sirbishi, ku nan ta sirbi den e santuario kune, i pone nan den un pana blou i tapa nan ku un kapa di kueru di dolfein, i pone nan riba e baranan pa kargu'e kune.

¹³"Despues nan mester kita e shinishi for di e altar, i habri un pana purpura riba dje.

¹⁴Tambe nan mester pone riba dje tur su artikulonan-di-uzo ku nan ta hasi sirbishi kune: e weanan-pa-kandela, e forkinan, e skopnan i e puncheronan, tur e artikulonan-di-uzo di e altar; i nan mester habri un kapa di kueru di dolfein ofer di dje, i pasa su baranan na dje.

¹⁵"I ora ku Aaron ku su yu hombernan a kaba di tapa e kosnan santu i tur e artikulonan-di-uzo di e santuario, ora ku e kampamentu ta bai sali, e ora ei e yu hombernan di Koat mester bin pa karga nan, pa nan no mishi ku e kosnan santu i muri. Esakinan ta e kosnan den e tent di reunion ku e yu hombernan di Koat mester karga.

¹⁶"I e responsabilidat di Eleazar, yu homber di saserdote Aaron, ta e zeta pa e lus, e sensia aromatiko, e ofrenda kontinuo di mainshi i e zeta di unshon--e responsabilidat di henter e tabernakel i di tur loke tin den dje, huntu ku e santuario i su artikulonan-di-uzo."

¹⁷E ora ei SENOR a papia ku Moises i Aaron, bisando:

¹⁸"No laga e tribu di e famianan di e koatitanan wordu korta kita for di meimei di e levitanan.

¹⁹Ma hasi esaki pa nan, pa nan biba i no muri ora nan ta aserka e kosnan masha santu mes: Aaron ku su yu hombernan mester bai paden i mustra kada un di nan su trabou i su karga;

²⁰ma nan no mag bai paden pa mira e kosnan santu ni pa un momento so, pa nan no muri."

²¹E ora ei SENOR a papia ku Moises, bisando:

²²"Tuma un senso di e yu hombernan di Gerson tambe, segun e hendenan di e kasnan di nan tatanan, segun nan famianan;

²³for di trinta ana p'ariba te ku sinkuenta ana bo mester konta nan; tur ku drenta pa kumpli ku e sirbishi pa hasi e trabou den e tent di reunion.

²⁴"Esaki ta e sirbishi di e famianan di e gersonitanan, den sirbimentu i den kargamentu:

²⁵nan mester karga e kortinanan di e tabernakel, e tent di reunion ku su kapa, e kapa di kueru di dolfein ku tin riba dje i e skerm pa entrada di e tent di reunion,

²⁶i e kortinanan di plenchi, e skerm pa e entrada di porta di e plenchi ku tin tur ront di e tabernakel i e altar, i nan kordonnan i tur e ekipo pa nan sirbishi; i tur loke mester wordu hasi, ta nan mester hasi.

²⁷Henter e sirbishi di e yu hombernan di e gersonitanan, den tur loke nan mester karga i den tur nan trabou, mester wordu hasi segun e ordu di Aaron ku su yu hombernan; i abo mester enkarga nan ku tur e kosnan ku nan ta responsabel pa karga.

²⁸Esaki ta e sirbishi di e famianan di e yu hombernan di e gersonitanan den e tent di reunion, i nan responsabilidatnan mester ta bou di direkshon di Itamar, yu homber di saserdote Aaron.

²⁹"Pa loke ta e yu hombernan di Merari, bo mester konta nan segun nan famianan, segun e hendenan di e kasnan di nan tatanan;

³⁰for di trinta ana p'ariba te ku sinkuenta ana bo mester konta nan, tur ku drenta sirbishi pa hasi e trabou di e tent di reunion.

³¹Awor esaki ta loke nan ta responsabel pa karga pa henter nan sirbishi den e tent di reunion: e tablanan di e tabernakel, su baranan, su pilarnan ku su pianan,

³²i e pilarnan ront di e plenchi ku nan pianan, nan stakanan i nan kordonnan, huntu ku tur nan ekipo i huntu ku tur nan sirbishi; i pa nan nomber bo mester enkarga kada homber ku e artikulonan spesifiko ku e mester karga.

³³Esaki ta e sirbishi di e famianan di e yu hombernan di Merari, konforme henter nan sirbishi den e tent di reunion, bou di direkshon di Itamar, yu homber di saserdote Aaron."

³⁴Asina Moises i Aaron i e lidernan di e kongregashon a konta e yu hombernan di e koatitanan segun nan famianan, i segun e hendenan di e kasnan di nan tatanan,

³⁵for di trinta ana p'ariba te ku sinkuenta ana, tur hende ku a drenta sirbishi pa traha den e tent di reunion.

³⁶I nan hombernan konta segun nan famianan tabata 2.750.

³⁷Esakinan ta e hombernan konta di e famianan di e koatitanan, tur ku tabata sirbi den e tent di reunion, ku Moises i Aaron a konta konforme e ordu di SENOR pa medio di Moises.

³⁸I e hombernan konta di e yu hombernan di Gerson segun nan famianan, i segun e hendenan di e kasnan di nan tatanan,

³⁹for di trinta ana p'ariba te ku sinkuenta ana, tur ku a drenta sirbishi pa traha den e tent di reunion--

⁴⁰nan hombernan konta segun nan famianan, segun e hendenan di e kasnan di nan tatanan, tabata 2.630.

⁴¹Esakinan ta e hombernan konta di e famianan di e yu hombernan di Gerson, tur ku tabata sirbi den e tent di reunion, ku Moises i Aaron a konta konforme e ordu di SENOR.

⁴²I e hombernan konta di e famianan di e yu hombernan di Merari segun nan famianan, segun e hendenan di e kasnan di nan tatanan,

⁴³for di trinta ana p'ariba te ku sinkuenta ana, tur ku a drenta sirbishi pa traha den e tent di reunion.

⁴⁴I nan hombernan konta segun nan famianan tabata 3.200.

⁴⁵Esakinan ta e hombernan konta di e famianan di e yu hombernan di Merari, ku Moises i Aaron a konta konforme e ordu di SENOR pa medio di Moises.

⁴⁶Tur e hombernan konta di e levitanan, ku Moises i Aaron i e lidernan di Israel a konta, segun nan famianan i segun e hendenan di e kasnan di nan tatanan,

⁴⁷for di trinta ana p'ariba te ku sinkuenta ana, tur ku por a drenta pa hasi e trabou di sirbishi i e trabou di kargamentu den e tent di reunion.

⁴⁸I nan hombernan konta tabata 8.580.

⁴⁹Konforme e ordu di SENOR pa medio di Moises nan a wordu konta, kada un segun su sirbimentu of kargamentu; asina esakinan tabata su hombernan konta, meskos ku SENOR a ordena Moises.