Read Papantla Totonac Numbernan 5 Bible Online

Numbernan 5 - Papantla Totonac bible

Numbernan 5

¹E ora ei SENOR a papia ku Moises, bisando:

²"Ordena e yunan di Israel pa saka tur leproso i tur esnan ku tin un derama i tur esnan ku ta impuru pa motibu di un morto, for di e kampamentu.

³Boso mester saka tantu homber komo muhe; boso mester saka nan pafo di e kampamentu pa nan no kontamina nan kampamentu kaminda Mi ta biba meimei di nan."

⁴I asina e yunan di Israel a hasi i a saka nan pafo di e kampamentu; meskos ku SENOR a papia ku Moises, asina e yunan di Israel a hasi.

⁵E ora ei SENOR a papia ku Moises, bisando:

⁶"Papia ku e yunan di Israel: 'Ora ku un homber of muhe komete kualke di e pikanan di humanidat, aktuando infielmente kontra SENOR, i e persona ei ta kulpabel,

⁷e ora ei e mester konfesa su pikanan ku el a komete, i e mester hasi restitushon kompleto pa su maldat, i anadi na dje un di sinku parti, i duna esaki na esun ku el a hasi malu.

⁸Ma si e homber no tin famia na kende restitushon por wordu hasi pa e maldat, e restitushon ku a wordu hasi pa e maldat mester bai na SENOR pa e saserdote, ademas di e karne chubatu di ekspiashon, ku kual ekspiashon a wordu hasi p'e.

⁹Tambe tur kontribushon ku ta pertenese na tur e regalonan santu di e yunan di Israel, ku nan ta ofrese na e saserdote, mester ta di dje.

¹⁰Asina kada hende su regalonan santu mester ta di dje; kiko ku un hende duna e saserdote, mester ta di dje.'"

¹¹E ora ei SENOR a papia ku Moises, bisando:

¹²"Papia ku e yunan di Israel, i bisa nan: 'Si esposa di un homber bai den mal kaminda i ta infiel na dje,

¹³i un homber tene relashon kune sin ku su esposo hana sa esaki i e no wordu detekta, ounke ku e esposa a kontamina su mes, i no tin testigu kontra dje i e no a wordu sorprendi den e akto,

¹⁴si un spiritu di yalursheit bin riba e homber i e bira yalurs riba su esposa ora ku el a kontamina su mes, of si un spiritu di yalursheit bin riba e homber i e ta yalurs riba su esposa siendo ku e esposa no a kontamina su mes,

¹⁵e ora ei e homber mester hiba su esposa serka e saserdote, i mester hiba komo un ofrenda pa su esposa un desimo parti di un efa di harina di puspas; e no mester basha zeta riba dje, ni pone sensia riba dje, pasobra ta un ofrenda di mainshi di yalursheit, un ofrenda di mainshi di konmemorashon, un rekordatorio di inikidat.

¹⁶'E ora ei e saserdote mester hasi e muhe hala serka i pon'e para dilanti di SENOR,

¹⁷i e saserdote mester kohe awa santu den un wea di klei; i e mester kohe poko di e stof ku tin riba flur di e tabernakel i pone esaki den e awa.

¹⁸E ora ei e saserdote mester pone e muhe para dilanti di SENOR i los kabei di e muhe, i pone den su man e ofrenda di mainshi di konmemorashon, ku ta e ofrenda di mainshi di yalursheit; i e saserdote mester tin den su man e awa marga ku ta trese maldishon.

¹⁹Anto e saserdote mester pone e muhe hasi un huramentu i mester bisa e muhe: "Si ningun homber no a drumi ku bo i si bo no a bai den mal kaminda i a komete impuresa, siendo bou di outoridat di bo esposo, sea liber di e awa marga aki ku ta trese maldishon;

²⁰sinembargo, si bo a bai den mal kaminda, siendo bou di outoridat di bo esposo, i si bo a kontamina bo mes i un homber ku no ta bo esposo tabatin relashon ku bo,"

²¹(e ora ei e saserdote mester hasi e muhe hura e huramentu di maldishon, i e saserdote mester bisa e muhe), "ku SENOR hasibo un maldishon i un abominashon meimei di bo pueblo dor ku SENOR ta hasi bo hep seka i bo barika hincha;

²²i e awa aki ku ta trese maldishon lo bai den bo stoma i hasi bo barika hincha i bo hep seka." 'I e muhe mester bisa: "Amen, Amen."

²³'E ora ei e saserdote mester skirbi e maldishonnan aki riba un rol, i e mester laba kita nan den e awa marga.

²⁴E ora ei e mester hasi e muhe bebe e awa marga ku ta trese maldishon, pa asina e awa ku ta trese maldishon bai den e muhe i kousa amargura.

²⁵I e saserdote mester kohe e ofrenda di mainshi di yalursheit for di man di e muhe, i zoya e ofrenda di mainshi dilanti di SENOR i hiba esaki na e altar;

²⁶anto e saserdote mester kohe un man yen di e ofrenda di mainshi komo su ofrenda di konmemorashon i kima esaki riba e altar, i despues e mester hasi e muhe bebe e awa.

²⁷Ora ku el a hasi e muhe bebe e awa, e ora ei lo sosode ku si e muhe a kontamina su mes i tabata infiel na su esposo, e awa ku ta trese maldishon lo bai den su kurpa i kousa amargura, i su barika lo hincha i su hep lo seka, i e muhe lo bira un maldishon meimei di su pueblo.

²⁸Ma si e muhe no a kontamina su mes i ta limpi, e ora ei e lo ta liber i lo hana yu.

²⁹'Esaki ta e lei di yalursheit: ora ku un esposa, siendo bou di outoridat di su esposo, bai den mal kaminda i kontamina su mes,

³⁰of ora ku un spiritu di yalursheit bin riba un homber i e ta yalurs riba su esposa, e ora ei e mester hasi e muhe para dilanti di SENOR, i e saserdote mester ehekuta henter e lei aki riba dje.

³¹Ademas, e homber lo ta liber di kulpa, ma e muhe ei mester karga su kulpa.'"