Read Papantla Totonac Numbernan 6 Bible Online

Numbernan 6 - Papantla Totonac bible

Numbernan 6

¹SENOR a bolbe papia ku Moises, bisando:

²"Papia ku e yunan di Israel i bisa nan: 'Ora ku un homber of muhe hasi un promesa spesial, e promesa di un nazareo, pa dedika su mes na SENOR,

³e mester apstene su mes di bina i bibida sterki; e no mag bebe binager, sea traha di bina of di bibida sterki, ni e no mag bebe djus di wendruif, ni kome wendruif fresku of wendruif seka.

⁴Tur e dianan di su separashon e no mester kome nada ku ta wordu produsi dor di mata di wendruif, for di pipita te na kaska.

⁵'Tur e dianan di su promesa di separashon nabaha no mag pasa riba su kabes. E mester ta santu te ora ku e dianan, pa kual el a separa su mes na SENOR, keda kumpli; e mester laga e kabei riba su kabes krese bira largu.

⁶Tur e dianan di su separashon na SENOR e no mag yega serka di un morto.

⁷E no mester hasi su mes impuru pa su tata ni pa su mama, pa su ruman homber ni pa su ruman muhe ora nan muri, pasobra su separashon na Dios ta riba su kabes.

⁸Tur e dianan di su separashon e ta santu pa SENOR.

⁹'Ma si un hende muri repentinamente banda di dje, i e kontamina su kabes konsagra, e ora ei e mester feita su kabes riba e dia di su purifikashon; e mester feit'e riba e di shete dia.

¹⁰E ora ei riba e di ocho dia e mester trese dos tortelduif of dos pichon pa e saserdote, na entrada di e tent di reunion.

¹¹I e saserdote mester ofrese esun komo un ofrenda pa pika i e otro komo un ofrenda kima, i hasi ekspiashon p'e pa su pika pa motibu di e morto. I e mesun dia ei e mester konsagra su kabes,

¹²i mester dedika na SENOR su dianan komo nazareno, i mester trese un lamchi machu di un ana komo un ofrenda di kulpa; ma e dianan prome lo keda anula, pasobra su separashon tabata kontamina.

¹³'Awor esaki ta e lei pa e nazareo. Ora ku e dianan di su separashon keda kumpli, e mester hiba e ofrenda na entrada di e tent di reunion.

¹⁴I e mester presenta su ofrenda na SENOR: un lamchi machu sin defekto di un ana komo un ofrenda kima, un lamchi muhe sin defekto di un ana komo un ofrenda pa pika, un karne chubatu sin defekto komo un ofrenda di pas,

¹⁵i un makutu di pan buskuchi sin zurdeg di harina fini meskla ku zeta, i oblea sin zurdeg hunta ku zeta, huntu ku nan ofrenda di mainshi i nan ofrendanan di bibida.

¹⁶'E ora ei e saserdote mester presenta esakinan dilanti di SENOR i ofrese su ofrenda pa pika i su ofrenda kima.

¹⁷Tambe e mester ofrese na SENOR e karne chubatu komo un sakrifisio di ofrendanan di pas, huntu ku e makutu di pan buskuchi sin zurdeg; di e mesun manera e saserdote mester ofrese su ofrenda di mainshi i su ofrenda di bibida.

¹⁸'E ora ei e nazareo mester feita su kabes dedika na entrada di e tent di reunion, i kohe e kabei dedika di su kabes pone riba e kandela ku tin bou di e sakrifisio di ofrendanan di pas.

¹⁹'I e saserdote mester kohe skouder di e karne chubatu, ora ku a kaba di hereb'e, i un pan buskuchi sin zurdeg for di e makutu, i un oblea sin zurdeg, i pone nan den man di e nazareo despues ku el a feita su kabei dedika.

²⁰E ora ei e saserdote mester zoya nan komo un ofrenda di zoyamentu dilanti di SENOR. E ta santu pa e saserdote, huntu ku e pechu ofresi pa medio di zoyamentu i e pia ofresi pa medio di halsamentu; i despues e nazareo mag bebe bina.'

²¹"Esaki ta e lei di e nazareo ku ta priminti su ofrenda na SENOR konforme su separashon, ademas di kualke otro kos ku e por duna; konforme su promesa ku e ta hasi, asina e mester hasi konforme e lei di su separashon."

²²E ora ei SENOR a papia ku Moises, bisando:

²³"Papia ku Aaron i ku su yu hombernan, bisando: 'Asina boso mester bendishona e yunan di Israel. Boso mester bisa nan:

²⁴"Ku SENOR bendishonabo i wardabo;

²⁵ku SENOR hasi Su kara resplandese riba bo, i tene miserikordia di bo;

²⁶ku SENOR halsa Su kara riba bo, i dunabo pas."'

²⁷"Asina nan mester invoka Mi nomber riba e yunan di Israel, i e ora ei Ami lo bendishona nan."